Read Banggai YEHESKIEL 45 Bible Online

YEHESKIEL 45 - Banggai bible

YEHESKIEL 45

¹Akiyoon buta doo inobos-obos tuuk teali buta pusaka tuuk samba kobenseno, sio nainalaas meeng koobos tuuk TEMENENO. Buta doo nakobulus sio songulolua sembeleng kokilometel, tukon nakebelak songulo kokilometel. Posaapon lipu doo nabinantilan moliyous.

²Tuuk TEMENENO Na Bonua minasadiakon luwedoi buta doo sembeleng mosangkap kopasuno, kona ukulan lua kosakato lima kolono kometer samba kobibilo, tukon binoilingi lapangan lua kolono lima kometer kona kebelak tukon sio idoomo TEMENENO Na Bonua nakinokondongan.

³Sembeleng luwedoi buta doo, kona kobulus songulo lua sembeleng kometer, tukon lima kokilometer kona kebelak sio nasinadiakon kobangunano TEMENENO Na Bonua, doiyamo lipu mo moliyous tuuno.

⁴Butadoo moliyous, tukon sinadiakon tuuk saibino ko imam mobalimang mokubaiyo kokaledaan doi TEMENENO Na Bonua. Sembeleng luwedoi buta doo naikon teali tampat tuuk yanila nabonua, tukon sembeleng koidan tuuk TEMENENO Na Bonua.

⁵Sembeleng koidan luwedoi buta doo nakabasal songulo lua sembeleng kokilometer kali lima kokilometer sio nasinadiakon tuuk Lewi mianno mobalimang doi TEMENENO Na Bonua lalomo. Idoo naikon kinokondong kota-kota doiyaa yanila moola dungol.

⁶Doi buta mo moliyous doo bibilo, sio nainalas meeng kobutano konakobulus songulo lua sembeleng kokilometer, tuuk meeng kokota momoola indee tolong modungoliyo luwedoi bangsa Israel.

⁷Tuuk mobalakuasa komo maparentah sio kai nasinadiakon kobuta. Buta doo tobinggakon luwedoi kallatan taikon oloyo sopokan lipu moinalaas tuuk TEMENENO doo, polong doi Tobun Tanga, tukon luwe kallatan taikon talise lipu moinalaas doo, polong doi pokallatanan taikon talise tano doo. Jadi kona kobulus pokakana tukon nakobulus luwedoi meeng koobos buta mobinekon doi Israel bense-benseno.

⁸Buta doo teali mobalakuasa koona momaparentah doi buta Israel, sulano yana aki nalalainggene koidan Daku umat, bai kai beena lipu molobian doo teali Israel bense-benseno koona.

⁹TEMENENO Moinakatandak Tuuno bantil, “Sukupo lapa mulalim-lalim, he saibino mobalakuasa doi Israel! Atadeomo komutindakan motodudulo tukon molalainggene korayat doo. Lakukenemo oila komo bisa tukon moadil. Siokai inaimo koidan komuyu siikayo Daku umat luwedoi yanila nabuta. Yaku, TEMENENO Moinakatandak Tuuno mamparentakene doiya doikoo.

¹⁰Pakeomo kobatimbangan tukon ukuran mokana:

¹¹Meeng koefa tuuk ukulan bahan momotuul sio napokakana koantoko tukon meeng ko bat tuuk moukule kobahan moel. Kona ukulan siokai nameeng kohomer. Jadi ukulan doo sio nabunonaia: 1 homer = 10 efa = 10 bat

¹²Mutimbangan sio nabunonaya: 1 Sikal = 20 gera 1 mina = 60 syikal

¹³Naiyamo kodasal ukulan sulano natataapkanggene mosinosubakon-sinosubakon: gandum: 1/60 Obos luwedoi muhasil bapupuian jawawut: 1/60 Obos luwedoi hasil mubapupuian zaitun lisosono: 1/100 Obos luwedoi hasil kayung-kayung (Ukulemo mololoi bat: 10 bat = 1 homer = 1 kor) domba: meeng kodomba luwedoi samba lua kosakato kodomba puuso. Komuyu sio pososubakene kosubakon gandum, sosubakon mosinua, tukon sosubakon paladamean, sulano mulalim-lalim nainompuni. Yaku, TEMENENO Moinakatandak Tuuno mobeena perentah tuuk doiya.

¹⁶Saibino modungoliyo tano doo sio namababa mosinosubakon-sinosubakon doo doi mobalakuasa naparentah doi Israel.

¹⁷Yanamo komoola mongoli iyayon mopiniala tuuk sosubakon mosinua tukon bahan-bahan tuuk sosubakon gandum tukon sosubakon anggur tuuk sasaibino bangsa Israel doi oloyo-oloyo babasal, Lamekanano Bituwon Boolu, oloyo-oloyo Tadean tukon oloyo-oloyo babasal bailon. Yana sio nasadiayo sosubakon potolos lalim, sosubakon gandum, sosubakon mosinua tukon sosubakon paladamean tuuk manggabi ampun tuuk bangsa Israel.”

¹⁸TEMENENO Moinakatandak Tuuno bantil doi Naumat, “Doi tanggal meeng bituwon komeengo, komuyu sio koliyousio. Daku bonua tukon mososubakon meeng kosaapi mongula langgilo moaki daano konasasat.

¹⁹Imam sio namangala sauh luwedoi sosubakon potolos lalim doo, maka soutikene doi kubonua tataapono posokol-posokolo, koidan doi balabang mosangkap kopasuno, tukon doi tataapon babasal posokol-posokolo mosasalane kobasalean lalomo.

²⁰Kubaiyomo buno doiya koidan doi tanggal kopituno bituwon doo sulano samba komian molapamo mokubai lalim tukon aki sangadayo kabai aki natoyo. Tukon caradoo doiya komuyu dagaitomo naikon Daku Bonua namoliyousan.

²¹ Doi tanggal sungulo sangkap bituwon komeengo, komuyu sio polamekene Lamean Paskah. Pitu kooloyo kona kalumbit saibino komian makaan roti moakiyo koragino.

²²Doi oloyo komeengo, mobalakuasa maparentah sio mososubakon meeng kosaapi langgilo tuuk sosubakon potolos lalim tuuk butongo tukon sasaibino korayat.

²³Lamekananodoo nakalumbit mobanggadudul pitu kooloyo doo, samba kooloyo yana sio mososubakon doi TEMENENO pitu kosaapi langgilo tukon pitu kodomba langgilo moakiyo kosasato; maka nasuayo tubo-tubo. Samba kooloyo yana koidan sio mososubakon meeng kombembe langgilo tuuk sosubakon potolos lalim.

²⁴Bailon doo, sio namososubakon gandum songulo pitu sembeleng koliter konakadaang tuuk samba kosaapi langgilo tukon tolu koliter zaitun lisosono tuuk samba kodomba langgilo.

²⁵ Doi Lamean Sandung Loon, mo tinambun doi tanggal songulo lima bituwon kopituno, samba kooloyo kona kalumbit pitu kooloyo mobalakuasa sio namososubakon sosubakon-sosubakon mopokakana, doiyamo sosubakon potolosan lalim, sosubakon mosinua, tukon sosubakon gandum tukon zaitun lisosono.”