Read Banggai YEHESKIEL 46 Bible Online

YEHESKIEL 46 - Banggai bible

YEHESKIEL 46

¹TEMENENO Moinakatandak Tuuno bantil, “Tataapon babasal talise mosasalaane kobasalean lalom sio natataap totutup noom koloyo balimangan kona kalumbit. Tataapon tolongo moola binuka doi oloyo Tadean tukon Lamekanano ko Bituwon Boolu.

²Doi oloyo-oloyo doo mobalakuasa sio nausok luwedoi basalean tonggulungo loloiyo ruang babasal maka kokondong doi Tataapon posokolo bibilo, daanon sasaibino koimam mosusobakon sosubakon mosinua tukon paladamean luwedoi mobalakuasa. Doi tataapono babasal doo yana sio nasosuba sosubaiyo ko TEMENENO, maka taus. Doibundu polong popook tataapono aki namoola tinutupi.

³Doi tataapon saalano doo koidan, saibino korayat sio sosuba sosubaiyo ko TEMENENO samba kooloyo Tadean tukon lamekanano ko Bituwon Boolu.

⁴Doi oloyo Tadean mobalakuasa sio namososubakon doi TEMENENO sosubakon mosinua moluwedoi noom kodomba langgilo, saibino moakiyo kona sasat.

⁵Polaing tukon domba langgilo doo sio nasinusubakon doi TEMENENO koidan sosubakon gandum songgulo pitu sembeleng koliter nakadaang tukon polaing samba kodomba napau, sio namosusobakon gandum nakadaang yana namongiasan. Samba sosubakon gandum sio napinolainggon tukon mosinosubakon tolu koliter zaitun lisosono.

⁶Doi Lamekanano doi bituwon Boolu mosinosubakonoo sio nabaino meeng kosaapi langgilo, noom kodomba napau,

⁷poolaing tukon samba kosaapi langgilo tukon mbembe langgilo, yana sio mosusobakon gandum kona kadaang songulo pitu maka sembelng koliter, tukon polainggene samba kodomba napau, bulaa tolong mololoi namongiasan. Samba kososubakon gandum sio napinolonggon tukon tolu koliter zaitun lisosono mosinosubakon.

⁸Kalu mobalakuasa mobakaleda doi Kubonua yana sio nausok mololoi ruang babasal, tukon namulean lolo doi naloloono koidan.

⁹Kobalikko, kalu doi oloyo-oloyo babasal korayat lubat sulano na balkaledaan doi TEMENENO, maka yanila mousok mololoi tataapon babasal doi lembet, kona mulean sio namololoi tataapon babasal doi lalom, namulean sio namoola mololoi tataapon babasal doi lembet. Mian-mian pinatang momule alo doi loloon moiloloi doi tempo nausokan; yanila sio namule loloiyo tataapon babasal doi sembeleng.

¹⁰Mobalakuasa sio usok doi TEMENENO Na Bonua posinggat-singgat tukon rayat tukon namulean kai sio posinggat-singgat koidan.

¹¹Doi oloyo-oloyo lamean tukon lamekanano, polaing samba kosaapi langgilo tukon samba kodomba langgilo sio nasinosubakon gandum nakadaang songulo pitu maka sembeleng koliter, tukon polaing samba kodomba napau, bulaando kai mololoi mian moiyase bakaleda. Samba sosubakon gandum sio napinolainggon tukon mosinosubakon tolu koliter zaitun lisosonoo.

¹²Kalu mobalakuasa yase mobeena mosinosubakon sukalela doi TEMENENO, mau mobuno sosubakon mosinua maukai sosubakon paladamean, maka tataapon taikon talise mosasalaane kobasalean lalomo sio nabinuka tuuk yana. Yana sio mososubakon sosubakene doo tukon cara mopokakana buno nailalukanggon doi oloyo Tadean, bai yana mosobit mule, tataapono sio natinutup koidan.”

¹³TEMENENO bantil, “Samba kooloyo doi tempo dodooa, meeng kodomba napau konaumur meeng kotaun tukon moaki daano kona sasat sio nasinosusobakon tuuk sosubakon mosinua doi TEMENENO.

¹⁴Bolikon doiya, samba kododooa sio sinosubakon koidan lua kokilogram gandum tukon meeng koliter zaitun lisosono sulano napinotongikon tukon gandum doo. Doiyamo sosubakon gandum mosamba kooloyo sio nasinosubakon doi TEMENENO; aturan berlaku tuuk sidutu-posidutukon.

¹⁵Samba kododooa, sio sidutu sinosubakon doi TEMENENO: meeng kodomba napau, sosubakon gandum tukon zaitun lisosono.”

¹⁶TEMENENO Moinakatandak Tuuno mobee parentah bantile, “Kalu berkuasa maparentah bekeena kosembeleng luwedoi nabuta pusaka doi meeng komian kona malane, buta doo, teali namalane koona tukon bunokai napuli nabuat.

¹⁷ Bai kalu balakuasa doo bekeene kosembeleng luwedoi nabuta pusaka doi naata meeng, buta doo naikon abali teali balakuasa doo koona doi Taun Mangabalinggonan. Buta doo daanon konamo tukon tolongo yana tukon namala-malane tolongo komoola aloyo banggaduduul buta doo.

¹⁸Balakuasa doo moaki namoola mangala soisik luwedoi narayat nabuat pusaka. Tolongo butano susungo momoola mobineekon doi namala-malane tobikon doiya akiyo moola meeng komian kai luwedoi Kuumat moola pinoalason luwedoi koona nahak.”

¹⁹Doibundu mala-malane doo babayo yaku mololoi tataapon doi tataapon babasallo bibilo, doi kombiang-kombiang molious mosasalaane kolembet. Kombiang-kombiangoo sinadiakon tuuk saibino koimam. Mala-malanedoo tudeo koruangan bunduno taikon doi talise,

²⁰tukon bantile, “Doi tampat nia saibino koimam sio nabatibulu sosubakon potolos lalim tukon sosubakon posoboli rugi tukon pakano sosubakon gandum, sulano soisik doo luwedoi sosubakon momoliyous doo aki nabinaba doi basalean tonggulunggo tobikon nasilakayo korayat.”

²¹Doibundu yana babayo yaku doi basalean tonggulongo tukon okitakene doi yaku baikon doi sangkap kopasuno, suwe-suwele daano kobasalean molobian popoisik, nakobulus luakolono kometer tukon kobintingo sungulo lima kometer.

²³Samba kokintalo binoilingi beton batu, tukon doi beton doo danon kopoolu-poolu.

²⁴Mala-malane doo bantil doi yaku, “Naiyamo dapur-dapur tampat peleleani-peleleani TEMENENO Na Bonua tibuluwo sosubakon-sosubakon rayat mososubakene.”