Read Banggai YEHESKIEL 47 Bible Online

YEHESKIEL 47 - Banggai bible

YEHESKIEL 47

¹ Mala-malane doo babayo yaku abali doi tataapon usokan TEMENENO Na Bonua. Yaku kitayo paisu lomba luwedoi tataapon adeno taikon doi talise, buno TEMENENO Na Bonua mosasalaane kotalise. Paisu doo lomba luwedoi tataapon bilit saalano TEMENENO Na Bonua taikon lalom mololoi taikon lalom luwedoi balabang doo.

²Doibundu mala-malane doo babayo yaku sumbut aloi doi tataapon babasal naikon taikon doi lembet tukon babayo yaku doi tataapon babasal taikon talise. Paisu batango popoisik doo lomba luwedoi lalom tataapon babasal doo bibilo.

³Daanon moukule tokong, mala-malane doo babayo yaku malaing solok paisu batango doo ko talise kona kodoon 500 meter, maka sumbuliyo yaku mopintasio. Doi tampatoo paisuno tolongo potimbang koaino sumbango.

⁴Doibundu yana ukure 500 meter koidan, tukon paisuno polong doi tuulo. Yana ukure 500 meter koidan, tukon paisuno polong doi pako.

⁵Daanon koidan yana ukule kona kodoon 500 ko meter, tukon idoo kopaisuno atean tuuno tuuk iloloi tukon ampakon ai-ai. Kalu mian yase mopintosio siokai yana kayok.

⁶Maka mianno bantil doi yaku, “He banggapi moakiyo kotakoso, polaatingkanggene naia saibino mono-monondok.” Doibundu yana babayo yaku abali mololoi paisubatango,

⁷tukon yaku kitayo baikon lua kopaisu batanggo doo bibilo daanon badaang tuuno kokayung.

⁸Yana bantil doiyaku, “Paisubatango nia lomba ko talise loloiyo natanonia tukon loloiyo Paisunobatango Yordan Pepelakono sasalaane ko Tobun Mate. Kalu paisuno polong atean doi Tobun Mate, maka paisu tobun momotono tosoboli tukon paisu matabal.

⁹Doiyaandomo paisu batango nia lobaan, idoo koidan naikon talaat saibino kolupano ikan tukon iyayon bailon. Paisu Tobun Mate naikon kinubai teali namatabal, tukon doiyaando kai paisu doo lomba, idoo naikon daanon kotuboan.

¹⁰Luwedoi nalubat-lubatan kopaisu doi En-Gedi polong doi paisu nalubat-lubat doi En-Eglaim, tambikon-tambikon bibilo naikon lame tukon saibino kotolosabangan mopitale yanila nabuani idoo. Saibino kolupano koikan naikon daanon doi paisu doo lalomo, buno modaano doi Tobun Tanga lalomo.

¹¹Bai paisu doi lapetak-lapetak tukon paya-paya doi tobun bibilo kinobulusan doo aki naikon teali matabal, bai kai paisu bunokai ti muson naluwean.

¹² Doi nakinobulusaon paisu batango lua doo bibilo saibino kolupano kokayung mosao-saoh tubo. Kayungoo loono aki namoloyu, tukon kosaoh-saohno akiyo ko nakabusan. Kayung-kayungoo naikon kohasilo saoh-saohno moola samba kobituwon, sabab paisu molombaiyo lomba luwedoi TEMENENO Na Bonua. Kosaoh-saohno teali kinaan tukon loon-loono daano kogunano tuuk pakuli.”

¹³TEMENENO Moinakatandak Tuuno bantil, “Naiama kobuta kalalatano naikon moinobos doi songulo lua ko Israel benseno. Yusuf benseno matalima lua koobos.

¹⁴Yaku lapamo basumpah baikon buta doo naikon kubeena doi mumbumbu. Sabab doiya, mangalamo buta doo tukon ebesemo naadil doi antara komuyu.

¹⁵Kallatanno doi lembet sembeleng mulaimo tambuno luwedoi Tobun Tanga mosasalaane ko talise polong doi kota Hetron, kona tujuiyo doi Hamat, banggadudul kokota Zedad,

¹⁶ko Berota tukon Simbraim (kota-kota doo talaat doi antara kota Damsyik tukon kota-kota Hamat). Doi bundu kokota Hazar-Enan, doi kalatan kota Hauran.

¹⁷Jadi kallatan taikon lolon inatambun luwedoi Tobun Tanga polong doi talise, kokota Hazar-Enam Enan; maka lipu Damsyik tukon Hamat daanon doi lembet sembeleng kallatanno.

¹⁸Kallatanan doi talise sembeleng kona tujuiyo doi lalom, luwedoi meeng kotampat antara lipu Damsyik tukon lipu Hauran. Jadi Yordan Paisubatango bunomokai kallatan antara buta Israel doi talise sembeleng tukon Gilead doi talise sembeleng polong doi Tamar doi Tobun Mate bibilo.

¹⁹Doi lalom sembeleng kallatan motuduiyo kobalat daya, luwedoi Tamar doi paisu matano Kades-Meriba, maka doi talise tobun Mesir kallatano nakobulus polong doi tobun tanga.

²⁰Kallatano doi talise sembeleng komo batasio Tobun Tanga, maka kosaalaano doi lembet doi meeng kotampat doi talise sembeleng loloon usokan ko Hamat.

²¹Ebesemo butadoo doi antara komuyu, loloiyo Israel bense-benseno;

²²tukon buta doo daanon kopau-pau mosinung idoo, sio koidan namalaat obos luwedoi buta doo. Yanila sio inanggon buno anggota tuuno luwedoi bangsa Israel, tukon yanila sio turut inundi tuuk sulano namaalat buta doi tempo nainobosan kobuta doi antara Israel bense-benseno.

²³Samba komo lubat dungol sio nabinee buta posinggat ko Israel benseno doi yayaa kona dungolan. Yaku, TEMENENO Moinakatandak Tuuno lapamo basilingan.”