Read Banggai YEHESKIEL 5 Bible Online

YEHESKIEL 5 - Banggai bible

YEHESKIEL 5

¹TEMENENO bantil, “He banggapi moakiyo kotakoso, mangalamo sabel momamangan tukon pakeomo doiya tuuk daliyo kabus kona janggut tukon mubuuk. Lapadoiya timbangemo buuk doo doi timbangan maka ebesemo teali tolu koobos.

²Soobos tolu sio musuayo doi kota doo tanga-tangano lapa doiya molobosian tademo. Soobos tolu koidan sio ikoo taniyo komu sabel tukon boilingiyo kota doo. Tukon soobos tolu labino sio muluanggene doi dapang, maka Yaku naikon lelenggene tukon Kusabel.

³Tinggolikene kai soisik luwedoi buuk doo tukon bunggusemo doi jubah lipato lalomo.

⁴Doibundu alayo soisik koidan luwedoi mubuuk sakukenemo doi aung lalomo sodiiyomo namokopul. Luwe idoo aung naikon badoidanggito posapon kobangsa Israel.”

⁵TEMENENO Moinakatandak Tuuno bantile, “Kitayo naiamo ko Yerusalem. Kota nia kuabese doi dunia nia pusoino, tukon negara-negara bailon nabinoilingi.

⁶Bai Yerusalem tolakemo Dakuparentah tukon tokita kulokis tuuno luwedoi bangsa-bangsa bailon, tadukai aki nataat luwedoi negara-negara nabinoilingi. Yerusalem aki natulutiyo Daku parentah-parentah tukon aki nayase taatio Daku ukum-ukum.”

⁷TEMENENO Moinakatandak Tuuno bantile, “He Yerusalem, ndongoliyo! Ikoo aki mutaatio Daku parentah-parentah tukon Daku ukum-ukum, ikoo lobian malawan luwedoi bangsa-bangsa bailon mubinoilingi, tukon loingiomo dobangsa-bangsa doo naadat-adat.

⁸Maka Yaku, TEMENENO Moinakatandak Tuuno, okitakene baikon Yaku danon mumusuh. Ikoo naikon Kuukume doi bangsa-bangsa bailon salaano.

⁹Sabab saibino mukakabai Kumisikitene, modungolikon naikon Kuukume mobabalat moakiyon naidan Kulakukene tukon aki naikon Kulakukene koidan.

¹⁰ Tama tina naikon kaane konapau susungo tukon napau kaane kona Tama tina. Bunokai doiya yanila naikon Kuukume, tukon modaano tubo Kupoalasene doi sasaibino kojurusan.

¹¹Yaku daanon Mian Bisa mo tubo, TEMENENO Moinakatandak Tuuno, tukon naiamokai Dakubantilan: Sabab ikoo lapamo kodikitio Daku Bonua tukon sasaibino mukakabi molokis tukon minatakuton. Yaku naikon akabuse ikoo akiyo koampun.

¹²Doi tolu koobos mupanduduk naikon mate sabab panakit tukon malalan mo teali kota doo. Doi tolu koobos naikon kinoloti tukon sabel doi kota tonggulungo, tukon doi tolu koobos koidan naikon Kusabukene doi sasaibino kojurusan tukon naikon Kulelenggene-lelenggene tukon sabel.

¹³Ikoo naikon lasakanggene kona nggimalan tuuno tukon Kumangamukan polong Yaku tanang. Lapa doiya saibino doo teali, ikoo naikon anggayo baikon Yaku, TEMENENO, basilingano doikoo sabab Yaku nggimolikon doi muakian molole.

¹⁴Ikoo naikon tolongo teali bakas-bakas tukon bangsa-bangsa motikunggon naikon totulaiyo ikoo; samba komian moalo naikon badodonggon doi ikoo.

¹⁵Kalu Yaku nggimal tukon nggimal tuuno doi koo tukon ukume ikoo, saibino kobangsa motikumemo ikoo naikon matakutene. Yanila naikon totulaiyo ikoo tukon kitayo ikoo toluwe.

¹⁶Yaku naikon manasemo palasadian mukinaan tukon sodiikene mupanduduk namalaal. Yanila naikon alamiyo komalaalan nasusaan, buno pana matano mamangan motadul tukon manase ikoo.

¹⁷ Kosilakaan bailon malaalan naikon Kulubatene koidan panakit mobiol-biol, konggimalan tukon polobosian tuuk moakateo komu mian, tukon iyayon-iyayon mobarani tuuk moakateo yanila napau-pau. Yaku, TEMENENO, basilingano.”