Read Banggai YEHESKIEL 6 Bible Online

YEHESKIEL 6 - Banggai bible

YEHESKIEL 6

¹TEMENENO bantil doi yaku,

²“He banggapi moakiyo kotakoso, tanggakene kobunggukon-bunggukon Israel, tukon pelenggenemokai Kuteteba tentang ukuman tuuk yanila.

³Sumboliyokai yanila mondongolii tukon palatikanggene oilamokai Yaku, TEMENENO Moinakatandak Tuuno bontiikene doi bunggukon-bunggukon doo, koidan doi bunggul-bunggul mo motombing-motombing tukon pepelakon-pepelakon. Bisa, Yaku naikon kilime kosabel tuuk manase kotampat-tampat sosubaiyano kopilogot.

⁴Balabang-balabango naikon linubang tukon namosuan-mosuan kamangian naikon pinasa. Saibino komian idoo naikon inakate doi napilogot salaano.

⁵Yaku naikon kubaiyo kobajan-bajan Israel mianno tasabukon; tukon yanila buku-bukuno naikon Kusabukene doi potikunggon kobalabang-balabang doo.

⁶Saibino kokota naikon inakionggon, saibino kobalabang tukon napilogot manas popisai, namosuan-mosuan kamangian mana-manaso, tukon sasaibino oila yanila nakinubai naikon lapus.

⁷Doi yayaa daano komian motangakate, tukon yanila mosalamat naikon toiyo baikon Yakumokai ko TEMENENO.

⁸Songobos soisik luwedoi yanila naikon Kuluputkanggene luwedoi bakolotan doo bai yanila naikon pinoalasonggon doi antara bangsa-bangsa;

⁹indaa yanila tubo doi masakukonan lalomo. Maka yanila naikon neneeke doi Yaku tukon mangalatikene baikon Yaku ukume tukon totulaiyo yanila sabab yanila noano aki namolole doi Yaku. Yanila tinggaleno Yaku tukon lilike kopilogot salaku posoboli Yaku. Maka yanila naikon toluwe tukon yanila butongo susungo sabab saibino kokulokisan tukon komisikitan molapamo yanila lakukene.

¹⁰Maka yanila naikon toyo baikon Yakumokai ko TEMENENO tukon baikon saibino kopoingotii Kubineekon bolikon panganukon-panganukon moakiyo kotakoso.”

¹¹TEMENENO Moinakatandak Tuuno bantil, “Poloonggenekai! Mandaunggenekai! Kokiliyokai tukon poloong sabab saibino Kulokisan tukon misikitan molapamo bangsa Israel lakukene. Yanila naikon mate sabab polobosi, malaal tukon panakit mobiol.

¹²Yanila saibino naikon lasakanggene Kunggimalan namomulukan. Komian-mian mo modoon doi masakukonan naikon tuwong masakit maka mate; mololani naikon namate polobosian lalomo tukon labino naikon mate malaal.

¹³Bajan-bajan naikon tasabukon doi antara pilogot-pilogot tukon potikunggon kobalabang-balabang mobininggakon doi samba kobunggul mo tatandak, tukon doi samba kobunggulkon puuto, doi bilit samba kokayung momolumbang tukon samba kokayung mobabasal, palus kobantilan, doi yayaakai yanila mosua sosubakon tuuk yanila napilogot. Maka samba komian naikon toiyo baikon Yakumokai ko TEMENENO.

¹⁴Ya, Yaku naikon Kutidekene kolimanggu tukon momanase yanila natano, tobikon teali kiis tuuno, tambun luwedoi Padang lalom taikon doi lalong polong doi kota Ribla doi lembet. Luwedoi tampat-tampat ko Israel mianno modungoliyo, akiyo komeeng naikon mosalamat. Maka toiyomokai saibino komian baikon Yakumokai ko TEMENENO.”