Read Banggai YEHESKIEL 8 Bible Online

YEHESKIEL 8 - Banggai bible

YEHESKIEL 8

¹Doi tanggal kolimano bituwon konoomo doi taun konoomo lalomo tempo kami nasinakukonan, saibino komo katuaiyo komian-mian mosinakukon yanila lubat doi kubonua tukon osu-osulang tukon yaku. Sosi-sosinggot TEMENENO Moinakatandak Tuuno konakuasa kuasaiyomo yaku.

² Yaku lelengea tukon kitayo meeng kolobo mopokakana kobanggapi. Luwedoi oako badombakon bilit yana tokita buno aung, tukon luwedoi oako taikon doi bungguk yana montontilan-montontilan buno tambaga mosinaluk.

³Yana obulusene meeng kolobo mobunokai limano, maka alitakayo dakubuuk. Lapa doiya doi batokitaan doo, yaku Mian Bisa Naroh bingkate tatandak doi dapang tukon babayo doi TEMENENO Na Bonua doi Yerusalem, doi tataapon usokan doi dunggon lalomo taikon doi lembet. Idoo talaat kopilogot timbalango molapamo osumbutene ko Mian Bisa nanggimalan.

⁴ Maka yaku mokita talaang momontontilan kopalosano Mian Bisa Israel nadaanoan, buno kukinita salataa yaku daano doi Kebar Paisunobatango bibilo.

⁵Mian Bisa bantil doi yaku, “He banggapi moakiyo kotakoso, mbalengekai taikon doi lembet.” Yaku tulutiyo, tukon doi balabang sembeleng lolani kololoon usokan, kukitayo kopilogot molapamo suungiyo ko Mian Bisa doo nanggimalan.

⁶Mian Bisa bantil doi yaku, “He banggapi moakiyo kotakoso, oila kukinita modaanon teali? Palatikanggenemokai kokakabai-kakabai mominosikiton ko Israel mianno nakinubai, modedenggene yaku luwedoi Ku Bonua! Maimo, naikon Kutudoikene doikoo lange-lange molobian madikit koidan.”

⁷Maka Yana babayo yaku doi tataapon usokan doi kital tonggulungo tukon Yana okitaikene meeng kobuang doi beton.

⁸Yana bantil, “He banggapi moakiyo kotakoso, kabasalemokai buang nia.” Lapa kukubaiyo, kukitayo komeeng kotataapon.

⁹Nabantile doi yaku, “Usokokai tukon kitayokai kokubai-kokubai molokis tukon mominosikiton yanila mokubaiyo idoo.”

¹⁰Yakukai usok tukon mokita. Pasanggal-pasanggalo luangannoo binubungai tukon saibino kobindana lupano tukon iyayon-iyayon bailonggon moharam, koidan rupa-rupa kopilogot gambalo ko Israel mian-mianno mososubaiyo.

¹¹Pitukolono komian mokatuaiyo kobangsa Israel modaano idoo, tongusokon Yaazanya Safan napau. Suwe-suwele mataani meeng kotampat mosuan kamangian mopuul konatibolung.

¹²Mian Bisa bantil doi yaku, “He banggapi moakiyo kotakoso, ikoo kitayo oila sasaibino kokatua Israel nakinubai tukon aki nabiok-biok? Yanila bakaleda doi luangan lalomo mo moonoh pilogot tukon alasan baikon Yaku lapamo tinggale buta nia tukon aki nakitayo yanila nakokubai.”

¹³Maka TEMENENO bantil doi yaku, “Ikoo naikon kitayo yanila mokubaiyo kolobo mo minatakuton tuuno koidan.”

¹⁴Maka Nababayo yaku doi tataapon babasal doi lembet TEMENENO Na Bonua tukon Naokitakene doi yaku komoluko-moluko mo mandaunggene Dewa Tomus namatean.

¹⁵TEMENENO masadai doi yaku, “He banggapi moakiyo kotakoso, ikoo kitayo langge doo? Daano badaang koidan mo minatakuton tuuno.”

¹⁶Nababayo yaku doi TEMENENO Na Bonua kitalo lalomo. Mololani kotataapon usokan doi lalomo momoliyous, doi antara balabaang tukon liasan, daanon koluakolono lima komian. Yanila totonggulunge komo moliyous lalomo tukon sosuba taikon tolopot sosubaiyo kooloyo matano nasumbutan.

¹⁷TEMENENO bantile doi yaku, “He banggapi moakiyo kotakoso, kukitayo doiya? Yehuda mian-mianno nia aki nabiaikene kalu tolongo kubaiyo kolangge mo minatakuton doo tukon kubaiyo kona tindakan-tindakan moakiyo konaseang doi posaapon kotano. Yanila kubaiyo saibino dimbaa, doi Ku Bonua lalomo tukon kubaiyo Yaku nggimal tuuno koidan. Kitayomo bulaando yanila mototulaiyo Yaku tukon cara molokis tuuno nia!

¹⁸Yanila naikon lasakanggene Kunggimalan tuuno! Yaku aki naikon maafkanggene tukon moompunio yanila. Maukai yanila wokonggenekai kona sambeang doi Yaku tukon namotikasan-motikasan, Yaku aki kuyase mondongolii!”