Read Banggai YEHESKIEL 9 Bible Online

YEHESKIEL 9 - Banggai bible

YEHESKIEL 9

¹Lapa doiya yaku molongol Mian Bisa masadai, “Lubatokai dimbaa he mian-mian naikon ampakonkene Kuukuman doi kota nia. Babayomo musinapang-sinapang.”

²Sosinggot lubat noom komian luwedoi tataapon babasal taikon Lembet TEMENENO Na Bonua tonggulungo sembeleng, suwe-suwele mababa sinapang. Polaing tukon yanila daano komian konapakean lenan mo makanggi potulis. Yanila usok tukon kokondong lolani kobalabang tambaga.

³Maka kolaango montotilang kopalosano Mian Bisa Israel nadaanoan, palapiit luwedoi kerub-kerub, maka biol luwedoi natampat tumbeno doo kotataapon osokan doi TEMENENO Na Bonua. Maka TEMENENO monguang mian mobapake lenan doo Nabantile,

⁴ “Potausokai doi sasaibino kokota pasuno tukon beena palosan samba komian bonggoto molasayo sedih tukon susah sabab saibino kokubai minatakuton mokinubai doi kota doo.”

⁵Yaku molongol Mian Bisa bantile doi mian-mian bailonggon. “Yana lengelemokai doi sasaibino kokota pasuno tukon mangakatemo samba komian akiyo koampun.

⁶Akateomokai saibino komian mala-malane: tukon moluko, motuamo tukon motabokon malane tukon pau-pau. Bai inai mosinggile mau meeng komian tolong modaano kopalosanno doi bonggoto. Tambunokai luwe dimbaa, luwedoi Ku Bonua nia.” Maka yanila tambunggenemokai yanila nalimang tukon mangakate saibino mokatuaiyo ko Israel modaanon kokondong doi TEMENENO Na Bonua.

⁷Mian Bisa bantil doi yanila, “Kodikitiomokai Ku Bonua nia! Konoiomokai konakintal-kintal tukon bajan-bajan. Tambunemokai!” Maka yanila doo tambunemo mangakate mian-mian doi kota doo lalomo.

⁸Konakalumbit batembelian doo kinubai, Yaku susunggu daano idoo. Yaku sosuba tukon masadai, “TEMENENO Moinakatandak Tuuno, bunodoiya Ikoo nggimalo doi Yerusalem tobikon Kuakateo saibino komian modaano doi Israel nia?”

⁹Mian Bisa motimbili, “Israel mian-mianno tukon Yehuda lapamo mokubai lalim mo babasal tuuno. Yanila mokubaiyo mangakatean doi saibino kotampat, tukon Yerusalem kinoditi tukon kulokisan. Yanila bantile baikon Yaku, TEMENENO kitayomo nalipunia tobikon akimo laate kitayo yanila nakakabai.

¹⁰Yaku akimo naikon mamasikene yanila. Naikon Kukabaiyo doi yanila oilamo yanila nakinubai doi mian bailon.”

¹¹Lapadoiya mian mo bapakean lenan doo abali tukon popitoikene doi TEMENENO, bantile, “Saibino ko TEMENENO naparentah lapamo tolimang.”