Read Banggai DANIEL 1 Bible Online

DANIEL 1 - Banggai bible

DANIEL 1

¹ Tolu kotaun salataa Tomundo Yoyakim nabapamarentaan doi Yehuda, Nebukadnezar tomundo Babel, yana lubotiiyo tukon seraange ko Yerusalem.

² Ko TEMENENO pataikenemo yana nalungguiyo Tomundo Yoyakim tukon yana rampase kosoobos moluwedoi kololonggu modaano koolino doi TEMENENO Na Bonua. Komian yana motaane, yana babayo doi bonua puli Babel miano napilogot, tukon lolonggu modaano koolino yana morampase, yana abese doi bonua pulidoo gudang-gudango.

³Doibundu tomundo parentayo Aspenas, mokapalaiyo korumah tangga doi tomundo nakamali, sulano napiliyo doi antara ko Israel miano motinaan doiyana moimoiya kopemuda mokaturunan tomundo kai mokaturunan sambu-sambu.

⁴Doiyaniladoo sio pemuda moakiyo kona cacat. Yanila sio natambongan, sikolah tinggi, pandoy tukon luas kona pongatahuan tukon pantas nabalimang doi tomundo nakamali lalomo. Aspenas sio naotunggule yanila babacaan tukon batulisan silingan Babel.

⁵Kotomundo koidan tantukanggene baikon konapai kinaan tukon konapai ininum sio napokakana komo sinadiakon motuuk doi tomundo naanggota kaluargaa. Salataa tolumo kotaun, yanila sio napomangadap doi tomundo sulano napobalimang doi tomundo nakamali.

⁶Doi antara dopomuda-pomudadoo talaat koidan Daniel, Hananya, Misael tukon Azarya, yanila sasaibino luwedoi Yehuda benseno.

⁷Komo kapalaiyo korumah tangga doi tomundo nakamali yana soboliyo kosambu-sambunoila tealimo: Beltsazar, Sadrakh, Mesak tukon Abednego.

⁸Tukon Mian Bisa natulungan, Aspenas seange tukon mamaasikene Daniel. Daniel mokubai tetel sulano naaki nakubaiyo lokis kodilino tukon kinaan tukon namonginuman anggur doi tomundo nakamali, tobikon doiya yana sio nakabiyo doi Aspenas sulano namakabi kinaan bailonggon.

¹⁰Aspenas bantile, “Tomundo susuungo lapamo tataapene baikon komu kinaan tukon ininum, jadi kalu turut napandapat baikon ikoo tokita aki musehat luwedoi pemuda-pemuda bailonggon, pasti yaku inakatemo.”

¹¹Doibundu Daniel pikikene dolanggedoo tukon pengawal mobatugas Aspenas mosumboliiyo sulano nauruse Daniel tukon dotulanodoo motolu. Daniel bantile,

¹²“Ujikami 10 kooloyo; tukon komu bineekon kami mokaane tolongo kauloon tukon paisu.

¹³Kalu lapamo 10 kooloyo, maka mukitayo bulaando kona posasalaan komai ndondoong tukon dopemuda-pemudadoo bailon nandondoong momakaan kinaan kotomundo molapamo tataapkanggene, maka nasodo mumangala kaputusan monurut mupokita.”

¹⁴Dopadagaidoo satuju tukon adakanggenemo dopercobaanoo kona kalumbit songulo kooloyo.

¹⁵Salataa dotempodoo kabuso, yanila tokita lobian kona posehatan tukon bukuanan tukon sasaibino dopemuda-pemudadoo momalaato kinaan moluwedoi tomundo nameja.

¹⁶Mulai doiya dopengawaloo akimo koidan nasidokiiyo doi yanila kokinaan tukon moininum molapamo tomundo tataapene, bai baimo kaulon tukon paisu tolong.

¹⁷Ko Mian Bisa beena dopemudadoo mosangkap hikmat tukon pandoiyan. Sangalaasan doiya Daniel koona binee koidan pandoiyan motoiyo tarangkanggene kopokita tukon monii.

¹⁸Doi napupusan tolu kotaun kona sikolaan dotomundodoo motantukenemo. Aspenas babayo dopemudadoo momangadap doi tomundo Nebukadnezar.

¹⁹Salataa posalitai tukon yanila sasaibino, dotomundodoo laatemo baikon Daniel, Hananya tukon Azarya yanila lobiyoniiyo kotulano bailonggon doi sasaibino kolangge kaliangano. Doibundu koidan yanila balimango doi tomundo nakamali lalomo.

²⁰Sasamba luunggon kotomundo nakomukakene kopersoalan mopalaluu katarangan tukon patimbongii, yana kitayo baikon dopemudadoo mosangkap naotunggul tukon napo tanggapan lobian songulo luunggon lipat kona posasalaan tukon sasaibino koperamal tukon ahli monii natanggapan-tanggapan modaano doi posaapon kona batomundoan.

²¹Daniel tataap balimang doi kamali polong doi Tomundo Kores moluwedoi Persia nataklukangganano ko Babel.