Read Banggai DANIEL 10 Bible Online

DANIEL 10 - Banggai bible

DANIEL 10

¹Doi taun kotoluno Tomundo Koresy nabapamarentaan luwedoi Persia, daano komeeng koteteba mobinuktikanggon doi Daniel alias Beltsazar. Dotetebadoo tutuu, bai maaling tuuno naminangalatikon. Salataa nakakatean mopahamiyo Daniel mantalima katarangan tentang dotetebadoo alatine doi meeng kopokita lalomo.

²Doiya kosinggato yaku daanoon mobalatapa tolu kominggu konakalumbit.

³Doi tempodoo motolu kominggu aki kumakaan kinaan momaamis kai sail; aki kumonginum anggur, tukon koidan aki kusiduwo dakubuuk.

⁴Doi tanggal lua kolono sangkap bituwon komeengo doi taunoo, yaku daanoon mokokondong doi Tigris Paisunobatango bibilo mobabasaloo.

⁵ Yaku lelengea, maka kukitayo komeeng komian momapake pakean moluwedoi lenan tukon pokoot owako luwedoi mosoni tulen.

⁶Kobutongo lalaangan pokakana kopermata, koduduso madialan pokakana kodidip laango, tukon komatano kolot-kolot pokakana kobilat. Kolimano tukon aino nggilep pokakana kotambaga mobinilas, tukon koalalo kalu nalinongol pokakana komian badaang alalo.

⁷Tolongo susuunggu komo kitayo dopokitadoo. Komian mopolaing-laing yaku aki napo kitayo, bai yanila teali matakut sampe yanila bulen maka napo basapiton.

⁸Yaku tininggalo susuunggu idoo, maka kupalatikanggene dopokitadoo mokubaiyaku ngginggim. Yaku muyuko tuuno tukon kodudusonggu pucat tuuno.

⁹Salataa yaku ndongoliiyo koalalo, yaku tolubang padut sampe yaku tanggalaup doi buta.

¹⁰Doibundu daano komian limano mosinggilaku tukon kubaiyaku bangun maka kuladanggene kolimanggu tukon kotuulonggu doi buta.

¹¹Domalaekatoo bantile doi yaku, “Daniel, ko Mian Bisa mamasikonggon. Banguno tukon kokondongokai maka mundongoliiyokai naiya kubantilan-bantilan nia tukon mono-monondok. Yaku nia inutus molubotiikon.” Salataa yana bantile dolanggedoo, yaku tongokondong tukon mbombokon kodilinggu.

¹²Maka nabantile doiyaku, “Daniel, inai momatakut. Ko Mian Bisa ndongoliiyomo komu sambeang salataa doi oloyo tumbeno ikoo mangalamo kaputusan sulano mupependeyo kodilimu sulano muteali pandoy. Yaku lubato salaku potimbili musambeang.

¹³ Komalaekat molindungiyo kobatomundoan doi Persia lawanaku lua kolono meeng kooloyo konakalumbit. Maka Mikhael yana meeng komalaekat mokatuaiyo komalaekat baibailonggon, yana lubat motulungiyaku. Yaku tinggale yana indaa, doi Persia.

¹⁴Yaku lubotiikon sulano ikoo mumoola mangalatikene oila naikon komo teali doi mubangsa. Naiya pokita nia doiyamo tentang oloyo doi salaando.”

¹⁵Salataa yana bantile dolanggedoo, yaku tootuku tukon akimo kumoola basilingan.

¹⁶Doibundu domalaekatoo mobuno banggapi ulule kolimano tukon singgile kosuunggu bibilo. Yaku bantile doiyana, “Tuan, napokita nia tolongo kubaiyaku susa konoanggu sampe yaku muyuko tuuno.

¹⁷Yaku pokakanamo komeeng koata mokokondong sasalaane konatuan. Bulaando kona tealian kubasilingan doi Tuan? Dakutenaga akiyono tukon daku ansaang madipot tuuno.”

¹⁸Boobus koidan yana singgilakumo, maka kurasayo tosuungimo daku tanaga tukon kubukuanan.

¹⁹Yana bantile, “Ko Mian Bisa mamaasikonggon, tobikon doiya inaikai mosusa tukon momatakut, ayo, tealimo bukuan!” Daanon mobantile dolanggedoo, yaku rasayo lobiano daku bukuanan koidan tukon yana bantile koidan, “Soba basilingan, Tuan. Tuan, suungiyomo daku bukuanan.”

²⁰Boobus koidan yana timbiliyomo, “Kai ikoo toiyo bulaando yaku molubat doikoo? Komaksuuto doiyamo sulano kupailukonggon oila komo totulis doi Buku Kebenaran. Diabudodoo sio kuabalimo sulano kupolobosi molawane komalaekat molindungiyo ko Persia. Kalu lapamo doiya komalaekat molindungiyo ko Yunani maka naikon nalubat. Akiyokai naikon komo tulungiyaku alaasene Mikhael, malaekat molindungiyo ko Israel, domu negaradoo.