Read Banggai DANIEL 11 Bible Online

DANIEL 11 - Banggai bible

DANIEL 11

¹Iyanamokai komo tinugaskanggon sulano namotombonii tukon nabelaaku doi taun komeengo Darius do Mediadoo miano nabapamarentaan.

²Tukon oilamo daku pinailukon doikoo doiya tutuu.” Domalaekatoo bantile, “Tolu kotomundo bailonggon naikon maparenta doi Persia, doibundu maka namaparenta kotomundo kosanggapo mokaasa tuuno liisiyo kobailonggon. Doi napupusan konakakuasaan tukon nakasaan, yana lobosiyo kobatomundoan Yunani.

³Doibundu naikon suwol komeeng kotomundo motambongan barani. Yana naikon maparenta batomundoan mobabasal tuuno tukon suka-suka momokuabai meeng kolangge.

⁴Bai doi napupusan kona kasaan, kona batomundoan mapasa tukon tongobos-obos teali sangkap koobos. Kotomundo-tomundo mobolikon natulunan naikon maparenta salaku posoboli yana, tukon aki napo bukuan pokakana iyana.

⁵Kotomundo tano lalom naikon teali bukuan. Bai daano komeeng kona panglima naikon liisiyo kona bukuanan, tukon yana naikon maparenta batomundoan molobian kona babasalan koidan.

⁶Bula-bulaa kotaun doibundu kotomundo tano lalom naikon mokubai meeng kopomeenggonan tukon tomundo tano lembet tukon yana pokilaikene kona boine dotomundodoo tano lembet. Bai dopomeenggonanoo aki nabataanggon, tukon boinedoo inakate, bunomolakon konalakai tukon konapau tukon naata-ata moantekene yanila.

⁷Aki namalumbit salataa lapa doiya, daano komeeng komian boinedoo pulino naikon komo teali tomundo. Yana naikon lubat seraange kotomundo tano lembet nasuludadu, serbuuwo konabenteng tukon yana lungguiyomo.

⁸Doitempo naabalian doi Mesir, yana naikon babayo mule konamusuh nadewa tukon pakakas mosoni tukon suasa molapamo sinosubakon doi dewadoo. Bula-bulaa kotaun konakalumbit yana akimo nalobosiyo kotomundo lipu doi lembet.

⁹Doibundu kotomundo tano lembet naikon serbuuwo kotano lalom, bai yana linobosi tukon undur tukon yana abalimo doi natano susuungo.

¹⁰Maka kotomundo-tomundo lembet namalaneila yanila bato-batotobomo sulano napo molobosi tukon yanila kombulemo kosuludadu mobadaang tuuno. Doiyaniladoo daano komeeng momaju lubat molobosi pokakana kopaisu lomba. Doi nabaserbuan koluano luunggon yana seraange komusuh nabenteng.

¹¹Sambuno buno doiya nggimalo kotomundo lalom, tukon yana maju doi polobosian mohebat lawane kotomundo tano lembet. Tukon doi napo polobosianoo lalomo yana komo manaang.

¹²Doibundu yana bangga-banggaalo sabab namanaangan tukon koidan mobadaango kona musuh inakate, bai kona kakuasaan aki nabataanggon malumbit.

¹³Tuuk koluano luunggon tomundo tano lembet yana mokombulo pasukan mobabasal, tukon liisiyo kona badaangan doi nasuludadu tumbeno. Kalu laatemo kotempono, yana naikon palabiyok momaju tukon nasuludadu mobadaang tukon napo perlengkapan mobadaang tuuno.

¹⁴Tukon koidan badaang komian moiyase seraange kotomundo tano lembet. Tukon daano kobula-bulaa komian mokejam doi mubangsa, Daniel naikon liit koidan sabab yana lapamo mokita komeeng kopokita. Bai aki napo manaang.

¹⁵Doibundu kotomundo tano lembet naikon kepungemo komeeng kokota modaano kobentengo tukon yana rebuutemo. Kosuludadu tano lalom aki naikon nabataanggon, tukon kona pasukan-pasukan pinili koidan aki napo moola lawane.

¹⁶Dotomundodoo tano lembet yana kubaiyo sasaibino doiya akiyo komo moola lawane. Tobikon doiya yana dudukiyomo kobuta molame tuuno tukon yana kuasaiyomo tuuno.

¹⁷Doibundu kotomundo tano lembet naikon siapkanggenemo sasaibino kona suludadu sulano naseraange kotano lalom. Sabab namaksut mokuasaiyo sasaibino kona musuh nabatomundoan, yana naikon mokubai meeng koposotujuian tukon yana tukon pokilakene kona boine tukon dotomundodoo Mesir; bai dona niatoo aki nateali.

¹⁸Salataa lapa doiya yana naikon seraangemo kobangsa-bangsa doi tobun bibilo, tukon badaang kona linunggui. Bai daano komeeng komian mo katuaiyo komian molulubaton yana naikon atadeyo dopototulaidoo yana mo lakukanggene, tukon koidan yana naikon balase dopototulaidoo motuuk doi yana.

¹⁹Dotomundodoo tano lembet naikon abalimo doi natano benteng-bentengo, bai yana linunggui tukon akiyo kobilitano tentang iyana.

²⁰Komo soboliyo iyana meeng kotomundo naikon mosumboliiyo kona pagauwe mokejam tuuno sulano namokombul lulu, tukon pakisaa sulano tosuungi kona batomundoan nakasaan. Doitempo moaki namalumbit dotomundodoo inakatemo, tukon sinookon tukon koidan yana mate bolikon doi polobosian lalomo.”

²¹Domalaekatoo bantile koidan, “Kotomundo naikon molubat momaparenta doi tano lembet yana meeng komian mohina tukon aki napantas teali tomundo. Bai yana naikon lubat aki nasinangka-sangka tukon yana rebuute kokadudukan tomundo tukon batipuan.

²²Sasaibino kosuludadu molawane yana, tukon koidan ko Imam Agung, bai yana sasapuwo bilisii tukon akateyo kabus.

²³Yana akiyenggene koperjanjian-perjanjian mosodo kinubai tukon bangsa-bangsa bailonggon. Tukon yana naikon pololokono mobukuan, maukai iyana nabaino maparenta negara mopoipoisik.

²⁴Tukon napandoiyan mobatipu yana moola lubat rampase kodaerah-daerah mosubur doi tempo kobanggapi narasaano aman idoo. Yana lakukanggene oila komo akiyoon nabiasa nambumbu lakukanggene. Maka naebe-ebese doi sasaibino komian molinambas konalangge tukon nakaasaan linaat doi polobosian lalomo. Yana naikon mokubai siasat sulano naseraange kotampat-tampat modaano kobentengo, bai kotempono mosobit kabus.

²⁵Doibundu tukon nabaranian yana naikon mokombul suludadu mobadaang sulano naseraange kotomundo tano lalom molapamo bato-batotobo molawane iyana tukon suludadu mobukuan tukon badaang tuuno. Bai kotomundo tano lalom aki namoola bataanggon sabab yana hinianatino.

²⁶Kona pongotunggul mopososoki tukon iyana naikon yanila tuwengemo iyana. Badaang kona suludadu-suludadu momate tukon kona suludadu mosinapu bilisii.

²⁷Doibundu dotomundodoo molua yanila osulang doi meeng komeja tukon yanila kaan posinggat-singgat, bai daano konapo maksut molokis, tukon yanila suwe-suwele pokala-kalai. Bai konapo tetel aki nateali sabab kotempono akiyoon napolong.

²⁸Doibundu dotomundodoo tano lembet abalimo doi natano susuungo tukon sasaibino kona langge linambas iyana molaate bai babayomo koidan. Konatetel sio namanase kabus ko Mian Bisa naumat naagama. Yana kubaiyomo kona kokubai sasaibino maka naabali doi natano susuungo.

²⁹Bula-bulaa kotempo doibundu yana naikon seraange kotano lalomo koidan, bai koakibato posasala tukon doi tumbe.

³⁰Sabab ko Roma miano tukon konapokapal-kapal naikon lubat luwedoi Siprus tukon lobosiyo yana, sampe yana teali matakut. Sabab doiya yana abalimo tukon liit tuuno maka nakakaate momanase kabus ko Mian Bisa naumat naagama. Yana loingiyo naikon konapo otunggul molapamo murtad luwedoi agamadoo.

³¹ Boobus koidan yana makapatumo pasukan-pasukan mokulokisanggene ko TEMENENO Na Bonua. Yanila naikon akiyenggene kososubakon oloyo tukon kuatkanggene komeeng kolangge mominatakuton mosinombuikon Kulokisan momakamanas kabus.

³²Sabab dotomundodoo napandoiyan batipu yana bujuke komian motinggalemo konaagama, sulano napo yase motomboniiyo yana. Bai komian motaat doi Mian Bisa yanila naikon barani molawane iyana.

³³Komian mopandoy mokatuaiyo korayat yanila tealikene badaango komian momangalati. Bai tuuk bula-bulaa kotempo namalumbitan, daano kobula-bulaa komian naikon inakate sabab polobosian tukon bilat, tukon koidan bula-bulaa komian naikon ndinikuk tukon tinaan.

³⁴Domangakateanoo daanoon moambakon banggadudul, ko Mian Bisa Naumat naikon malaat soisik kopotombonii, bai badaang komian mopomeenggon tukon yanila bai tolongo napo kopontingan susuungo.

³⁵Kosoobos moluwedoi katua-katuadoo mopandoy naikon tangakate, bai doiya tolongo buno ujian doi umat, sampe yanila teali murni. Dolanggedoo naikon banggadudul polong doi napupusan koloonu, doiyamo ko Mian Bisa naloonu tinataapkanggon.

³⁶ Ko Tomundo lembet naikon mokubai tindakan oilamo konoano nainiyas. Tukon nasombongan yana bantile baikon sasaibino kodewa akiyo komo liisiyo yana, tukon koidan yana bantil ko Mian Bisa Moinakatandak Tuuno taduyaku komo babasal. Sabab dona kokubaidoo mobuno doiya maka ko Mian Bisa naliitan pupuso. Sabab oila komo lapamo Mian Bisa tataapkanggene sio nalinakukanggon looluk.

³⁷Dotomundodoo akikai napopusinggon mau indee kodewano nambumbu mososubaiyo, tongusokon sasaibino koboine nadewa ngginaal. Bai yana aki namangga dodewa-dewadoo sabab yana anggape kobutongo liisiyo kona babasalan doi yanila.

³⁸Kobalino, yana tolongo odotiiyo kodewa nambumbu moakiyoon nabiasa sosubaiyo, doiyamo dewa pelindung benteng-benteng. Yana naikon mososubakon mosoni, suasa, permata tukon sosubakon-sosubakon bailonggon momaaling koolino doi dewa nambumbu moakiyoon nabiasa sosubaiyo.

³⁹Yana naikon mopili komian mososubaiyo kodewa lulubaton sulano napo seraange kobenteng-benteng momoonggol. Indee komo akuiyo dodewadoo yana binee pongodotii mobabasal tukon kadudukan motatandak tukon buta salaku tambo.

⁴⁰Kalu adukono konapupusan kotomundo lembet nakakuasaan, naikon lubat kotomundo lalom moseraange yana. Maka kotomundo tano lembet kakaate mobalase doseranganoo. Yana mapake kereta polobosian mo badaang, adalan tukon kapal polobosian. Yana lubat tukon serbuuwo pokakana kopaisu molomba, tukon badaang kotano konapo linambas.

⁴¹Tukon koidan kobuta momonondok tuuno yanila serbuuwo, tukon doi nasongu-songuloan kololoono komian napo inakate. Bai ko Edom nabatomundoan-batomundoan, Moab tukon kosoobos mopenting luwedoi Amon nabatomundoan naikon yanila olupute.

⁴²Doitempo napo dudukiyano dobatomundoan-batomundoanoo, kobatomundoan doi Mesir akikai naluput.

⁴³Doi Mesir yanila marampas mosoni tukon suasa tukon koidan buat bailon momaaling koolino. Komo bantuwo yana doiyamo Libia tukon Sudan miano.

⁴⁴Maka kobilita doi tolopot tukon lembet tealikene komian ngginggim, tobikon doiya yanila molobosi tukon mati-matian sampe badaang komian moinakate.

⁴⁵Tukon koidan yana naikon mokubai sandung batomundoan doi napotangaiyan kotebun tukon bunggul doi TEMENENO Na Bonua natangabosan. Bai doibundu yana matemo tukon akiyokai komeeng komian momoola tulungiyo iyana.”