Read Banggai DANIEL 12 Bible Online

DANIEL 12 - Banggai bible

DANIEL 12

¹ Komalaekat momapake dopakeanoo linen bantile koidan, “Doitempodoo naikon suwol komalaekat mobabasal doiyamo Mikhael mubangsa napelindung. Doibundu daano koidan koloonu mosusa tuuno moakiyo kona bunowan salataa nadaanoan kobangsa-bangsa. Bai sasaibino komian moluwedoi mubangsa kosambuno mototulis doi Mian Bisa Nabuku lalomo, naikon sinalamaton.

² Badaang doi yaniladoo komo matemo bai naikon tubo koidan; kosoobos toupiyo kotuboan moposidutukon, tukon kosoobos koidan naikon toupiyo kokulokisan tukon sakisaawan moposidutukon koidan.

³Sasaibino kokatua mopandoy yanila lalaangan pokakana kotimbu laango. Tukon yanila molapamo mongotunggul mian mobadaang sulano napo lakukanggene oila komo monondok tukon adil, yanila lalaangan pokakana kobituwon-bituwon pauno motataap kolaango sidutu-posidutukon.”

⁴ Maka domalaekatoo bantile koidan daiyaku, “Daniel, diabudodoo tutupemo dobukudoo, tukon caapemo segel sulano natataap totutup polong doi napupusan koloonu. Badaang komian naikon momosoba-soba solidikiyo oila komo sementara teali. Bai donapo usahadoo tolongo sia-sia.”

⁵Doibundu yaku kitayo kolua komala-malane. Komeeng kokondong doi paisubatango bibilo taalikon naimbaa, tukon komeeng koidan kokondong doi paisubatango bibilo taalikon indaa.

⁶Komeeng mansadai doi meengoo mokokondong loolani tukon dopaisudoo batango matano, “Oilakai kotempono nakajadian-kajadian nia mominasaindinggon kona pupusan?”

⁷ Domianoo momeeng koidan yana tidekene kolimano luluwa doitimbu. Yaku lengele yana mobatotopi luwe Mian Bisa moposidu-sidutukon tukon bantile, “Dokajadian-kajadianoo naikon banggadudul tolu sembeleng kotaun kona kalumbit. Kalu pupuso ko Mian Bisa nasinakisaawan, maka dokajadian-kajadianoo mominasaindinggon pupuso koidan.”

⁸Sasaibino dona binantiloo doiya tutuu yaku mondongoliiyo, bai aki kupahamiyo. Maka kumansadai, “Tuan, bulaando sasaibino naiya naikon kona pupusan?”

⁹Yana timbiliyo, “Ampakonokai diabudodoo, Daniel, sabab nabantilan-bantilan nia sio nasinookon tukon rinaasiakanggon polong doi napupusan koloonu.

¹⁰ Badaang komian moinuji tukon mokiniliyousi. Komian molokis aki napo mangalatikene tukon koidan tolongo yanila banggadudul momokubai langge-langge molokis; tolongo yanila mopandoy komo moola mangalatikene.

¹¹ Luwedoi tempo kososubakon oloyo natinadeiyan doiya kosinggato kona tinambuunan komeeng kolangge mominatakuton mosinombuikon Kulokisan mobamanas kabus nakinoonggolan, tukon doiya nalapa 1.290 kooloyo.

¹²Jadi kinatauwankai yanila motataap setia polong doi oloyoko 1.335.

¹³Ikoo Daniel, setiakai polong doi napupusan. Ikoo naikon mate, bai ikoo naikon tubo koidan maka mumantalima tambo doi napupusan koloonu.”