Read Banggai DANIEL 3 Bible Online

DANIEL 3 - Banggai bible

DANIEL 3

¹Daano kotempo meeng Tomundo Nebukadnezar mokubai meeng kopatung mosoni kona katandak 27 kometer tukon kona kebelan adukon 3 kometer. Yana bangune doi antara Dura doi propinsi Babel.

²Doibundu Nebukadnezar undange sasaibino kotomundo wilayah, sasaibino kogubernur, bupati, pongotunggul negara, bendahara, hakim, tukon sasaibino kokapala daerah sulano napo lubat hadiriyo koupacara peresmian dopatungoo molapamo yana bangune.

³Salataa yanila sasaibino lubato tukon kokondongo doi patungoo salaano,

⁴bakumandomokai dotomundodoo naajudan tukon alalo mobabasal, “Utus-utus moluwedoi bangsa-bangsa bailonggon, bangsa benseno tukon komo posasala kosilingan! Pondongoliiyokai natomundo nia naparenta:

⁵Kalu kotorompet bulungano, molinoolaing suling alalo, kasapi, rebab, gambus, serdam tukon musik-musik bailonggon, maka utus-utus sasaibino siopo somba mososubaiyo dopatung mosonidoo molapamo Tomundo Nebukadnezar bangune.

⁶Indee komian komo aki nataatiyo naparenta nia, sio napo sinakukon doi bilat lalomo mokolot-kolot.”

⁷Salataa doalat musikoo bulungano sasaibino komian moluwedoi sasaibino kobangsa, kobangsa benseno tukon komo posasala kosilingan, yanila sasaibino somba mososubaiyo dopatung mosonidoo.

⁸Daano komoimoiya ko Babel miano gunakanggene kokasampatan sulano napo silakayo ko Yahudi miano.

⁹Yanila bantile Tomundo Nebukadnezar, “Tubokai daku Tuan sidutu-posidutukon!

¹⁰Daku Tuan lapamo tobuatene koparentah baikon kalu koalat-alat musiik bulungano, sasaibino komian sio nasomba tukon sosubaiyo dopatung mosonidoo,

¹¹tukon indee komo aki nataatiyo doparentadoo yanila sio napo sinakukon doi bilat lalomo mokolot-kolot.

¹²Bai daano komoimoiya ko Yahudi miano molapamo daku Tuan beena tugas sulano nakuasaiyo kobapamarentaan doi propinsi Babel yanila tolongo pandang entenge daku Tuan naparentadoo. Yanila doiyamo Sadrakh, Mesakh tukon Abednego. Domian-mianoo aki napoiyase monggaale daku Tuan napilogot-pilogot tukon aki koidan napo somba doi ku Tuan napatung mosoni kinubai.”

¹³Salataa tomundo lengele doiya yana nggimal tuuno, maka namebee parentah sulano domianoo motoluila nabinaba mangadap doiyana.

¹⁴Tomundo mansadai doiyanila, “Sadrakh, Mesakh tukon Abednego! Kai bisa moaki poiyase mososubaiyo dakupilogot-pilogot tukon aki koidan poiyase mosomba doi patung mosoni yaku mokekendengedoo?

¹⁵Nah, diabudodoo, kai komuyu basadia tuuk mosomba tukon pososubaiyo dopatungoo doitempo musiik nabulunganan? Kalu komuyu aki poiyase, komuyu naikon banggadudul mosinakukon doi aung lalomo mokolot-kolot. Tukon oilamo ko pilogoto komo naikon moola nasanggup mosalamatene komuyu luwedoi kukuasa?”

¹⁶Sadrakh, Mesakh tukon Abednego timbiliyo, “Tomundo momulia, kami aki naikon mai sobayo mobelayo kodilinggami.

¹⁷Kalu ko Mian Bisa kami mososubaiyo moola nasalamatene kami luwedoi aungoo mokolot-kolotoo tukon luwedoi ku Tuan nakuasa, pasti iyana lakukene doiya.

¹⁸Bai kalu andeno iyana aki nalakukene doiya koidan, siokai daku Tuan natoiyo baikon kami aki naikon mai nggaale daku tuan napilogot tukon aki koidan mai sosubaiyo ko patung mosoni daku Tuan mokekendengedoo.”

¹⁹Maka pololokono tosuungi Tomundo Nebukadnezar nanggimalan doi Sadrakh, Mesakh tukon Abednego, sampe koduduso teali memela buas. Yana monggisumboliikene sulano koaung nakinubai pitu luunggon paku konamoonasan luwedoi mobiasamo.

²⁰Maka yana sumboliiyo komoimoiya komian mobukuan tuuno sulano keete Sadrakh, Mesakh tukon Abednego, tukon sakukene yanila doi aungoo lalomo modaanoon mokolot.

²¹Tukon mosobit domianoila motolu kinooto mosoot doi nadaanoan yanila mobapake lengkap, doiyamo tukon nabokukum, jubah, nasongko tukon napakean bailon, maka nasinakukon doi aungoo lalomo mokolot-kolot.

²²Tongo sabab tomundo naparentah namomoonasan, maka doaungoo kinoonaso tuuno sampe doaungoo suayo mate komian-mian mobingkate Sadrakh, Mesakh tukon Abednego doi aungoo bibilo.

²³Bunomokai doiya, toluila domianoo mokoot mosoot otuwong doi aungoo mo dulep-dulep.

²⁴Sosinggot Tomundo Nebukadnezar ngginggim tuuno. Yana kokondong tukon mosobit maka nawookon doi sasaibino kona pegawe, “Bolikonkai domo buddodoo kita moboboiyo kotolu komian tukon sakukene yanila doi aungoo lalomo?” Yanila timbiliyo, “Takainomo bisa, ikoo daku Tuan.”

²⁵Tomundo timbiliyo, “Bai bulaando yaku mokitayo kosanggapo komian moamba-ambakon doi aungoo tanga-tangano? Yanila aki natokoot tukon tutuu aki nabula-bulaa. Tukon domo sangkapoo kondondoongo pokakana kodewa.”

²⁶Maka Nebukadnezar koolaniyo doaungoo tataapono tukon wookon, “Sadrakh, Mesakh tukon Abednego, Mian Bisa Moinakatandak Tuuno napeleleani! Tobuatokai luwedoi aungokon!” Maka tobuatokai yanila.

²⁷Sasaibino tomundo nawakil, sasaibino kogubernur, bupati, tukon pagawe-pagawe bailonggon boilingiyo domianoo motolu tukon kitayo baikon yanila tutuu aki doaungoo nasinggile. Aki namokopul konapai buuk, tukon konapai pakean bai aki napupul, maukai tibolung boono bai akiyo doi yanila.

²⁸Maka bantilokai tomundo, “Nggaalekai Sadrakh, Mesakh tukon Abednego na Mian Bisa sinosubai. Yana lapamo utuse Kona malaekat sulano nasalamatene domo toluila Kona peleleani momaanga doiya-Na. Yanila laanemo daku parentah tukon lobian moiyase mate maka baino mososubaiyo kai monggaale doi indeemo kopilogoto sabab yanila tongo maangga doi napo Mian Bisa susuungo.

²⁹Tobikon doiya yaku maparentakene baikon sasamba komian doi meeng kobangsa, bangsa benseno kai oilamo kosilingano, momabantil pototulai doi Sadrakh, Mesakh tukon Abednego na Mian Bisa sinosubai, naikon pinotol-potoli tukon naikon linamas kona bonua tukon tinealikon bonua lapono timbunano. Sabab akiyo kopilogot momoola mokubai oila komo lapamo Mian Bisadoo lakukene.”

³⁰Salataa lapa doiya tomundo libakene Sadrakh, Mesakh tukon Abednego napangkat, sampe yanila teali sambu-sambu motatandak doi propinsi Babel.