Read Banggai DANIEL 4 Bible Online

DANIEL 4 - Banggai bible

DANIEL 4

¹Naiyamokai Tomundo Nebukadnezar napengumuman yana mopopitoikene doi sasaibino komian moluwedoi sasaibino kobangsa, bangsa benseno tukon sasaibino kosilingan doi posaapon kodunia: “Dame tukon aman!

²Yaku yase mobasalitene kolangge mososibong tukon mominasaindinggon ko Mian Bisa Moinakatandak Tuuno molapamo lakukanggene doiyaku.

³Bukan maen Kona hebatan kolangge mososibong! Yana molakukanggene mominasaindinggon! Ko Mian Bisa naikon teali tomundo posidutukon. Yana kuasaiyo popupuson koloonu.”

⁴Yaku ndoong tukon aman doi kukamali lalomo tukon daku tuboan sanaang tuuno.

⁵Bai daano kopopook meeng yaku daanoon momoolo yaku olumon maka kukitayo komeeng kopokita mokubaiyo susa tuuno konoanggu.

⁶Doibundu yaku uwange sasaibino komian mopandoy tuuno doi Babel sulano napo tarangkanggene doolumonoo alatino doiyaku.

⁷Bai salataa lubat sasaibino koperamal, komian mopandoy batanggal mapake paisu, komian modaano kona motoiyan tukon sasaibino komian mopandoy mokubaiyo kobarekengan kobituwon pauno maka kusalitaikene daku olumonoo doi yanila, bai akiyokai komeeng doi yaniladoo komo moola tarangkanggene koalatino.

⁸Doibundu Daniel mosinombuikon koidan Beltsazar mopokakana daku dewa sambuno. Daniel konoano moono tukon dewa-dewa naroh moliyous, Maka kusalitaikene doku olumonoo doiyana koidan, maka kubantile doiyana,

⁹“Eh, Beltsazar, ikoomo komo katuaiyo komian modaano kona motoiyan, tukon yaku toiyo baikon ikoo moono tukon dewa-dewa momoliyous naroh, sampe akiyokai komeeng korahasia motosookon doikoo. Tobikon doiya lengelekai daku olumonia, tukon tarangkanggenekai koalatino.

¹⁰Salataa yaku daano momoolo, yaku olumon maka kukitayo komeeng kokayung batango motatandak tuuno.

¹¹Kobatango babasal maka namatikas. Kotubono polong doi timbu, tobikon doiya sasaibino komian doi dunia moola kitayo.

¹²Koloono monondok tuuno tukon kosaono badaang tuuno, tukon sasaibino komian doi dunia samba momakaan. Koiyayon-iyayon mombo solo yanila momoolo doi kayungo suukano tukon kotomisi-tomisi mokubai telea doi langa-langaano. Tukon sasaibino komahluk motubo doi dunia moola nakaane kosaono.

¹³Salataa yaku daano mopikipikikene daku pokita, maka kukitayo komeeng komalaekat moobulus luwedoi surgaa; yana tokita bato-batotobo tukon yana bada-badagai.

¹⁴Tukon alalo mobabasal yana bantile, ‘Petapeyomokai kayungdoo tukon popoto-potoliyokai kolanga-langaano, poliatekai koloono tukon posabulekai kosaono. Posiikayokai koiyayon-iyayon momoolo doi kayungo suukano tukon kotomisi-tomisi momokubai telea doi langa-langaano.

¹⁵Bai posobiiyomo kotuolo natotinggal doi buta lalomo. Poboboiyokai tukon rante besi maka tambaga maka potinggale doi padang lalomo. Posobiiyomokai nambinetokii soilu, tukon natubo potuboy koiyayon-iyayon maka tumbu-tumbuhan.

¹⁶Posobiiyomokai kobanggapi naakal natobolii buno iyayon naakal kona kalumbit pitu kotaun.

¹⁷Doiyamo komai kaputusan kami malaekat-malaekat mobada-badagai tukon mobato-batotobo. Komai pinalaluu doiyamo sulano doiyayaamo komian naakuiyo, baikon ko Mian Bisa Moinakatandak Tuuno kuasaiyo kobanggapi nabatomundoan tukon dobatomundoanoo Yana beekene doi indeemokai komiano Yana mopiliyo, tukon kai doi mian moakiyo koanggano doi dunia nia!’ ”

¹⁸Eh Beltsazar, doiyamokai doku olumonoo. Diabudodoo bantilemokai koalatino doiyaku. Sabab akiyokai komeeng komian mopandoy tuuno modaano doi kubatomundoan nia komo moola popitoikene koalatino doiyaku, bai mungkin ikoo moola, sabab ikoo moono tukon dewa-dewa naroh momoliyous!

¹⁹Salataa yana lengele doiya, Daniel mosinombuikon koidan Beltsazar, yana ngginggim tukon masainding moimoiya kotempo. Lapa doiya Tomundo Nebukadnezar bantile doiyana, “Beltsazar, inaikai momatakut sabab doolumonoo tukon koalatino.” Salataa lapa doiya Beltsazar yana timbiliyomo, “Daku tuan, bukan maen konamonondokan kalu ande-andeno dokajadian-kajadianoo koalatino tolongo kanakon doi Tuan namusuh-musuh tukon bolikon doi Tuan komo kanakon.

²⁰Kayungdoo batango motatandak doku tuan mokitayo, sampe kotubono polong doi timbu, tukon sasaibino kobanggapi doi dunia moola kitayo.

²¹Koloono-loono monondok tuuno tukon kosaono badaang tuuno sampe kobanggapi doi dunia samba momakaan. Koiyayon-iyayon moola moolo doi kayungo suukano, tukon kotomisi-tomisi mokubai telea doi langa-langaano.

²²Oh ikoo daku Tuan, ikoomokai kayungdoo batango motatandak tukon momatikas. Daku Tuan nababasalan tosuungi polong doi timbu, tukon daku Tuan nakakuasaan luas tuuno polong doi dunia bunduno.

²³Daku Tuan koidan kitayo komeeng komalaekat mobulus luwedoi surgaa tukon bantile, ‘Potapeyomokai naiya kayung batango nia tukon potatalemokai, bai kobangguto posobiiyomokai natotinggal doi buta lalomo. Poboboiyokai tukon rante besi maka tambaga maka potinggale doi padang lalomo. Popataikenemo kolinggous nambetokiiyo tukon napotuboy koiyayon-iyayon pitu kotaun kona kalumbit.’

²⁴Ikoo daku Tuan, naiyamokai koalatino dopokitadoo, tukon naiyamokai ko Mian Bisa Moinakatandak Tuuno nakaputusan motuuk doi ku Tuan susuungo.

²⁵Komasyarakat naikon siikayo daku Tuan tukon ikoo daku Tuan potuboy tukon iyayon-iyayon doi padang. Pitu kotaun ikoo daku Tuan naikon makaan bulung pokakana kosapi tukon ikoo moolo doi lipu moakiyo kosoopan, sampe tolongo linggous komo mbetokiiyo doi popook. Kalu lapamo doiya maka daku Tuan naikon naakuiyo baikon ko Mian Bisa Mo Tatandak tuuno yana kuasaiyo ko banggapi nabatomundoan, tukon dobatomundoanoo yana beekene doi mian yana mopiliyomo.

²⁶Sasaibino komalaekat maparentakene sulano kayungdoo tuwolo nasinobiimo natotinggal doi buta lalomo. Doiya koalatino baikon ikoo daku Tuan ikoo naikon teali tomundo koidan kalu Tuan akuiyomo baikon tolongo Mian Bisa komo kuasaiyo posaapon kodunia.

²⁷Tobikon doiya ikoo daku Tuan siokai muturutiyo nai ata nia naotunggul. Ikoo daku Tuan inaimokai momokubai dosa koidan, bai lakukenemokai komo monondok tukon komo adil, tukon seseangekai komian motalalais. Kalu Tuan loingiyo doiya pasti Tuan tataap sanaang tukon aman.”

²⁸Sasaibino doiya tealimo doi dilinggu susuunggu, tobikon doiya yaku pailukene doi Tomundo Nebukadnezar.

²⁹Songulomo kotaun molapa doi tempo kuamba-ambakonan doi basa-basanaangan doitingkat babo doi ku Tuan nakamali doi Babel,

³⁰yaku bantilemo, “Kitayo, bukan maen konahebatan kokota Babel! Yakumokai komo bangune teali pusat negara sulano natokita kobukutiino daku kakuasaan tukon daku bukuanan, daku babasalan tukon daku inodotiiyan!”

³¹Akiyoon napupus daku salita yaku lengelemo komeeng koalal moluwedoi timbu tukon bantile, “Tomundo Nebukadnezar, ndongoliiyokai naiya! Komu kakuasaan salaku tomundo lapamo inala luwedoi ikoo.

³²Ikoo naikon siniika luwedoi banggapi badaang, tukon ikoo pottuboi koiyayon-iyayon doi padang. Pitu kotaun kona kalumbit ikoo makaan bulung pokakana kosapi. Kalu lapamo doiya maka muakuiyo baikon ko Mian Bisa Moinakatandak Tuuno kuasaiyo kobanggapi nabatomundoan tukon dobatomundoanoo Yana beekenemo doi indee komiano Yana mopiliyomo.”

³³Doi tempodoo koidan, dobantilan-bantilanoo tealimo bukutii. Yaku, Nebukadnezar siniikamo luwedoi mian badaang tukon makaan bulung pokakana kosapi. Kobutonggu mbinetokii linggous, kona buuk bulusan pokakana koalay buluno tukon kolimanggu kolukupo pokakana kotomisi bungguno kona bulusanan.

³⁴Salataa dotempodoo mopitu kotaun lapamo toliis, yaku lelengeya doi timbu, maka naabali koidan daku kasadaran. Tukon koidan yaku nggaalemo ko Mian Bisa Moinakatandak Tuuno. Yaku somba tukon yaku akabasale Yana motubo sidutu-posidutukon. “Ko Mian Bisa naikon teali tomundo sidutu-posidutukon. Kona kuasa popupuson koloonu.

³⁵Kobangsa-bangsa doi dunia akiyo koalatino. Ko Mian Bisa kuasaiyo komalaekat doi surgaa tukon kobanggapi doi dunia. Akiyokai komeeng komian momoola lawane Kona mongiasan akiyo komo moola sadaiyo oila Kona linakukanggon.”

³⁶Salataa abalimo koidan kokasadaran doiyaku, maka kobabasalan, kongginaalan kona tololongolan daku batomundoan ko Mian Bisa abalinggenemo doiyaku. Daku pagawe tukon sambu mobabasal, yanila sambutaku, tukon yaku inabalinggon doi kubatomundoan, tukon koikoidan daku inodotiiyan lobian Kona babasalan luwedoi tumbe-tumbeno.

³⁷Jadi diabudodoo yaku, Nebukadnezar nggaalemo ko Mian Bisa, yaku akatandake tukon odotiiyo ko Tomundo Surgaa. Sasaibino Konakokubai kana tukon adil, tukon Yana moola boliiyo komian mosombong noano.