Read Banggai DANIEL 5 Bible Online

DANIEL 5 - Banggai bible

DANIEL 5

¹Daano kooloyo meeng Tomundo Belsyazar mokubai lamean molame tuuno tukon yana mongundang sololoon komian motatandak konasambu, sulano napo monginum anggur.

²Daanoon yanila moinum-inum, Belsyazar maparentakene sulano nainala komangko-mangko mosoni tukon suasa, tamano Nebukadnezar, namangko-mangko linambas, moluwedoi TEMENENO Na Bonua doi Yerusalem, Tomundo Belsyazar namaksuud sulano sasaibino domianoo motatandak kona sambu, konapobolo-boloki, konapobolo-boloki piala tukon yana susuungo, napo monginum anggur moluwedoi mangko-mangkodoo.

³Aki namalumbit kona maparentakanano maka lubato komian mobabayo domangko-mangkodoo doiyana tukon sambuno lapa doiya yanila sasaibino monginumo anggur moinabos doi mangko-mangkodoo.

⁴Daanoon yanila moinum-inum yanila ngganggaale kodewa-dewa mokinubai luwedoi mosoni, suasa, tambaga, kayung tukon batu.

⁵Aki namalumbit koidan tokita komeeng kobangkapi limano motulise komeeng kolangge doi kamali sasanggalo doi tampat momadialan tuuno mo kanakon lampu laango, sampe tomundo Belsyazar kitayo tukon tontong.

⁶Yana mbombokon tuuno tukon matakuto sampe lolondong kotuulo.

⁷Doibundu yana wookon makabi tulung doi sasaibino komian mopandoy nujum, patanggal, mopake paisu tukon mian mopandoy balekengan bituwon pauno sulano nainuang. Salataa yanila lubat, tomundo Belsyazar bantile, “Indee komo moola bacayo dotulisanoo tukon komo moola popitoikene doiyaku, yaku naikon beena pakean batomundoan doiyana juba mosamelaon tukon inoon moluwedoi mosoni salaku paloosan nainodotiiyan. Sangalaasan naiya yaku naikon angkate nateali ponguasa kotoluno doi kubatomundoan lalomo.”

⁸Sasaibino komian mopandoy tuuno yanila laakon luwe momaju, bai akiyokai komeeng komian doi yaniladoo komo moola bacayo dotulisanoo kai komo moola popitoikene koalatino doi tomundo Belsyazar.

⁹Tomundo Belsyazar tosuungi konamatakutan tukon mbombokono koidan; tukon koidan sasaibino konasambu motatandak yanila pusingo.

¹⁰Salataa Tomundo Belsyazar tinano lengele sasaibino kotomundo mobabasal kona sambu tukon Tomundo Belsyazar nawowookonan yana lubat tukon usok doi lameanoo lalomo. Maka nabantile, “Tubokai sidutu-posidutukon ikoo daku Tuan! Ikoo daku Tuan tanangkanggene konoamu tukon inaimo mombombokon.

¹¹Sabab doi ku Tuan nabatomundoan lalomo daano komeeng komala-malane konoano momoono tukon dewa-dewa naroh momoliyous. Doi tempo kotamamu natealian tomundo, domianoo tokita kobukutiino konapandoiyan, pangalatian tukon kebijaksanaan, mopokakana sasaibino kodewa-dewa napandoiyan. Tamamu Tomundo Nebukadnezar odudukemo yana teali mokatuaiyo sasaibino komian mopandoy batanggal, mopandoy batanggal mopake paisu, komian modaano kona motoiyan tukon mian mopandoy balekengan bituwon pauno.”

¹²Yana luar biasa pandoy tukon bijaksana tukon yana pandoy tuuno moalatikanggene koolumon, moola toiyo korahasia tukon moola pecahkanggene komasaala-masaalah mosulit. Doiya mianoo kosambuno Daniel, bai tomundo sombuikene Beltsazar. Jadi uwangemo iyana. Pasti yana pailukene dotulisanoo alatino doi ku Tuan.”

¹³Aki namalumbit doibundu Daniel binabamo namangadap doi tomundo. Salataa yana lubat tomundo sadaiyo doiyana, “Kai ikoomo Daniel, do Yahudidoo miano mosinakukon, molapamo tamanggu angkute luwedoi tano Yehuda?

¹⁴Yaku lengele baikon konoamu moono tukon dewa-dewa naroh momoliyous, tukon baikon ikoo daano komu pandoiyan, pangalatian, tukon hikmat mo luar biasa.

¹⁵Sasaibino komian mopandoy batipu tukon komo pandoy patanggal mapake paisu yanila lapamo soba-sobae mobacae natulisan nia tukon napopitoikene koalatino doiyaku. Bai aki napo moola.

¹⁶Jadi diabudodoo maka nasodo kutoiyo baikon ikoo moola toiyo bantile korahasia tukon moola mupecahkanggene kosoal-soal mosulit. Tobikon doiya kalu ikoo moola bacayo natulisan nia tukon ikoo moola popitoikene koalatino doi yaku, yaku naikon beena doikoo pakean batomundoan doiyamo jubah mo samelaon tukon inoon mosoni salaku paloosan pongodotiiyan. Sangalaasan naiya yaku naikon oduduke ikoo teali ponguasa kotoluno doi kubatomundoan nia lalomo.”

¹⁷Sambuno lapa doiya Daniel timbiliyo, “Ikoo daku Tuan aki napalaluu mobeenggu dotambodoo, beekenemo doi mian bailonggon. Yaku moola mobacayo dotulisanoo tukon moola kualatikanggene komakasuuto doi ku Tuan.

¹⁸Ko Mian Bisa Moinakatandak Tuuno kubaiyo Nebukadnezar, daku Tuan tamano teali tomundo mongginaal tukon beena nababasalan tukon natololongolan.

¹⁹Sabab nababasalan, sampe komian moluwedoi sasaibino kobangsa, kobangsa benseno, tukon sasaibino kosilingan, yanila moombokon tukon matakutene doiyana. Kalu yana yase momangakate mian, yana pasti moakateyo domianoo. Kalu yana salamatene komian, pasti domianoo yana salamatene. Yana akatandake kai ekependeyo komian tolongo lolo doi namongiasan akiyo komo kabalatan.

²⁰Bai salataa yana tealimo sombong, matikas konoano tukon kejam tuuno, yana ngginolinggon luwedoi nakursii batomundoan tobikondoiya lapuso kona tanggaan.

²¹Kobanggapi badaang siikayo iyana tukon kona akal tealimo pokakana koiyayon naakal. Yana pottuboy tukon keledai mosolot, makaan bulung pokakana kosapi, tukon moolo doi lipu motobuka sampe baimo linggous komo mbetokiiyo. Konapupusan yana akuiyomo baikon ko Mian Bisa Moinakatandak Tuuno kuasaiyo kobanggapi nabatomundoan tukon dobatomundoanoo Yana moola beekene doi indee komiano molapamo Yana piliyo.

²²Bai kona malane, doiyamo ikoo daku Tuan susuungo, aki muiyase rendahkanggene kodilimu, maukai daku Tuan natoiyomo sasaibino doiya.

²³Ikoo daku Tuan todudul ikoo katandake kodilimu tuuk doi TEMENENO doi surgaa tukon ikoo barani momosumbolii mian mobabayo usok komangko-mangko molapamo linambas luwedoi TEMENENO Na Bonua. Maka doku Tuan tukon sasaibino kopagawe mobabasal konatugas, sasaibino konapo boloki piala monginum anggur moluwedoi mangko-mangkodoo. Doku Tuan tolongo ngganggaale kodewa-dewa mokinubai luwedoi mosoni, suasa, tambaga, besi, kayung tukon batu, doiya dewa-dewa moaki namoola mokita kai namoola ndongoliiyo kolobo alalo kai momangalatikene koioila. Daku Tuan aki naoodotiiyo ko Mian Bisa motantukanggene daku Tuan natuboan kai namatean tukon komo tataapkanggene daku Tuan naloloon tuboan.

²⁴Doiyamo kosababpo ko Mian Bisa kapatuwo dolobodoo limano sulano natulise Kona teteba.

²⁵Naiyamo dotulisanoo, ‘Inait, inait, tinimbang, inobos.’

²⁶Tukon naiyamokai koalatino: Inait, doiya daku Tuan naloonu bapamarentaan ko Mian Bisa lapamo aite, tukon opupusemo;

²⁷tinimbang, doiya koalatino daku Tuan lapamo tinimbang tukon linaato baikon aki namonondok;

²⁸inobos; doiya koalatino baikon daku Tuan nabatomundoan inoboso tukon bineekono doi Media tukon Persia miano.”

²⁹Aki namalumbit Belsyazar parentayomo kona pagawe-pagawe sulano napekeikene kojubah mosamelaon doi Daniel bulungo. Tukon koidan yana oduduke Daniel teali ponguasa kotoluno doi nabatomundoan lalomo.

³⁰Doi popookoo koidan inakatemo Belsyazar dotomundoo Babel.