Read Banggai DANIEL 6 Bible Online

DANIEL 6 - Banggai bible

DANIEL 6

¹Sambuno Belsyazar inakate, Darius Median miano kuasaiyo kokamali batomundoan. Doiya kosinggato konaumur nom kolonomo lua kotaun.

²Darius ebesemo kona batomundoan teali sakat lua kolono kopropinsi suwe-suwele meeng kogubernur komo parentayo.

³Daniel tukon dotulanodoo molua yana angkate sulano napo awasiyo sasaibino dogubernuroo sulano kotomundo naaki narinugikanggon.

⁴Aki namalumbit totingoniimo Daniel nalimang lobiyoniiyo kona monondokan tukon sasaibino dogubernuroo tukon pengawas-pengawas bailonggon nalimang. Tobikon doiya, kotomundo yase mooduduke yana nateali ponguasa posaapon kobatomundoan.

⁵Bai sasaibino dogubernuroo tukon dopengawas-pengawasoo yanila kakaate mounggoliiyo Daniel nakasalahan-kasalahan mau natolongo soisik, sabab Daniel setia tukon jujur tukon koidan yana aki nalalai doi natugas lalomo tukon aki namokubai kasalahan.

⁶Maka napo bantile, “Kita tolongo laate Daniel nakasalahan doiyamo langge modaano konapotaamian tukon kona agama.”

⁷Doibundu yanila singgat-singgat moampakon mangadap doi tomundo tukon yanila bantile, “Oh daku Tuan Tomundo Darius, taaniyomokai kotomundo sidutu-posidutukon!

⁸Tuan nabatomundoan kami sasaibino komo uruse, mau sasaibino kopengawas, sasaibino kogubernur, kogubernur nawakil-wakil tukon kosambu-sambu bailonggon, kami lapamo pomeenggon mousulkanggene sulano Tuan nakaluare kosurat parentah mosio natinaati tukon tutuu. Jadi siokai Tuan naparentakene sulano tolukolono kooloyo kona kalumbit sio naakiyo komeeng komian momoola pinataikon sulano namopolonggi kakabi doi meeng kodewa kai banggapi, alaasene tolongo doi mai Tuan. Indee komiano komo lumbaiyo doparentadoo sio nasinakukon doi singa naleeng lalomo.

⁹Kami kabiyo sulano komai Tuan natandatanganiyo dosurat parentadoo sulano nateali undang-undang doi Media tukon Persia moaki namoola cinabut koikoidan.”

¹⁰Doibundu Darius tandatanganiyomo dosurat parentadoo.

¹¹Salataa Daniel ndongoliiyo tentang dolanggedoo, maka yana mulemo doi nabonua. Kona kamar doi tingkat atas daano kolombo-lombongo momangadap taalikon doi Yerusalem. Buno nakabiasaan, yana sambeang doi na Mian Bisa tukon nggaale tolu lunggon meeng kooloyo tukon yana somba totuku doi lombo-lombongoo motobuka salaano.

¹²Salataa Daniel namusuh-musuh yanila kitayomo Daniel daanoon mosambeang doi na Mian Bisa,

¹³yanila sasaibino ampakono momangadap doi tomundo sulano napo kalaakene Daniel. Yanila bantile, “Baanggon aki nalapamo Tuan tandatanganiyo kosurat parenta mopantane sasaibino komian sulano kotolukolono kooloyo kona kalumbit naakiyokai komeeng komian momoola mopolonggon kakabi doi meeng kodewa kai banggapi alaasene tolongo doi ku Tuan susuungo? Tukon koidan, baikon indee komiano komo lumbaiyo doparentadoo yana naikon sinakukon doi singa naleeng lalomo?” Dotomundodoo timbiliyo, “Takainomo, tukon doparentadoo tealimo undang-undang doi Media tukon Persia moakimo namoola cinabut koikoidan.”

¹⁴Doibundu koidan yanila bantile doi tomundo, “Daniel yana meeng komian mosinakukon luwedoi Yehuda, aki naanggayo daku Tuan tukon tolongo pandang entenge doparentadoo. Yana sambeang tukon taatur tolu luunggon meeng kooloyo.”

¹⁵Salataa tomundo Darius lengele doiya yana teali susa tukon matakut, sampe yana mounggolii akal sulano nasalamatene Daniel. Polong kinobian tomundo Darius nabapiki-bapikilan.

¹⁶Doibundu koidan domian-mianoo abalimo koidan momangadap doi tomundo tukon yanila bantile, “Daku Tuan, siokai daku Tuan naneneeke baikon kalu koundang-undang Media tukon Persia, koparenta tomundo mokaluaremo aki namoola bino-binolii.”

¹⁷Salataa lapa doiya tomundo maparentakenemo sulano Daniel nalinako maka nasinakukon doi singa naleeng lalomo. Tomundo bantile doi Daniel, “Boliisi komu Mian Bisa ikoo mososubaiyo tukon setia nasalamatene ikoo.”

¹⁸Salataa lapa tomundo basilingan doi Daniel maka nainala komeeng kobatu mobabasal maka nainabos doi leengoo babano, tukon tomundo Darius caape dobatudoo tukon caap batomundoan tukon sasaibino komo babasal kona tugas nacaap, sampe akiyonokai komeeng komian mobarani bebeaskanggene Daniel luwedoi singa-singadoo.

¹⁹Sambuno lapa doiya tomundo Darius mulemo doi nakamali. Yana aki naiyase kaan kai nahinibur. Tukon koidan doi popokoo yana aki namoola moolo.

²⁰Doitempo nasubuan tomundo Darius banguno tukon taus moso-mosobit doi singa naleengoo.

²¹Salataa yana polong indaa, yana uwangokai tukon alalo mosusa, “Daniel, Mian Bisa motubo napeleleani! Oilakai komu Mian Bisa ikoo mososubaiyo tukon setia yana moolamo nasalamatonggon luwedoi singa-singadoo?”

²²Maka longolokai Daniel alalo motimbiliyo dotomundodoo, “Tubomokai Tuan sidutu-posidutukon!

²³Ata na Mian Bisa utusemo Kona malaekat sulano natutupe dosingadoo babano sampe aki napo bula-bulaandeke yaku. Ko Mian Bisa salamatanaku sabab Yana toiyo baikon ata akiyo Kona kokubai mosala motuuk doi Mian Bisa kai doi ku Tuan.”

²⁴Bukan maen kona sanaangan tomundo noano tukon koidan yana maparentakenemo sulano Daniel natinobuatonggon doi leengoo lalomo. Salataa doparentadoo linakukono, tokita kobukutiino baikon Daniel aki napokolon mau natolongo soisik, sabab yana mangangga doi na Mian Bisa.

²⁵Doibundu koidan tomundo Darius maparentakene mian sulano nalakoyo domianoo mokalaakene Daniel. Maka yanila tukon napau-pau tukon konapo bolo-boloki sinakukono doi singa naleengoo lalomo. Akiyoon napo polong doi leenggo nadasar, dosinga-singadoo sambaremo yanila tukon manasemo kobuku-bukunoila.

²⁶Salataa lapa doiya Tomundo Darius makapatu surat doi mian moluwedoi sasaibino kobangsa, kobangsa benseno tukon silingan doi posaapon kodunia kona bantilano, “Dame tukon aman!

²⁷Yaku parentayo sasaibino komian modaano doi kubatomundoan wilayano sulano namatakutene tukon odotiiyo ko Mian Bisa Daniel mososubaiyo! Yana doiyamo ko Mian Bisa motubo sidutu-posidutukon, Kona maparentaan popupuson koloonu. Kona batomundoan aki namungkin mosilaka. Kona kakuasaan akiyo kona kabusan.

²⁸Yana moola masalamaton tukon mongoluput, kubaiyo komujizat tukon langge mominasaindinggon doi timbu mau doi dunia. Daniel sinalamatono, luwedoi singa-singa nasokuwano.”

²⁹Bunokai doiya Daniel tataap tatandak kona sambu tinaani salataa Darius tukon Koresy do Persiadoo miano natealian tomundo.