Read Banggai DANIEL 8 Bible Online

DANIEL 8 - Banggai bible

DANIEL 8

¹Doi taun kotoluno Tomundo Belsyazar nabapamarentaan, yaku malaat pokita koluano.

²Doi pokitadoo lalomo yaku laate kodilinggu doi propipinsi Elam, doi Sudan, Persia naibu kota. Yaku kokondong doi naloolanian ko Ulai Paisunobatango,

³tukon doi paisudoo bibilo tokita komeeng kodomba langgilo modaano kolua kotanduko mobulusan, komeeng bulusan tukon daanoon mosoodo tukon komeeng paupalus tukon motuamo.

⁴Yaku kitayo dodombadoo langgilo batanduk taalikon talise, lembet tukon lalom. Akiyokai komeeng koiyayon momoola sasalaane kai moluput luwedoi nakuasa. Yana moola kubaiyo kolangge-langge oilamo kona kinilakon tukon teali sombong.

⁵Daanoon yaku mosilepiyo, tokita komeeng kombembe langgilo moobu-obulen luwedoi talise sembeleng pintosiiyo kodunia. Sabab nabulenan momodoling tuuno sampe koaino aki nasinggile kobuta. Doi matano molua antarano daano komeeng kotanduko mosusuungan.

⁶Dombembedoo langgilo yana loolaniyo dodombadoo langgilo yaku mokitayo doi paisubatangodoo bibilo, maka nabuleniyo motanduke tukon naganasan.

⁷Yaku palatikanggene yana seraange dodombadoo langgilo. Sabab naganasan sampe yana tanduke dodombadoo langgilo tobikon doiya dodombadoo tanduko molua teali moloto. Dodombadoo langgilodoo muyuko sampe aki namoola molawane. Yana talambiton doi buta tukon piniipiik, tukon akiyo komeeng komian momoola tulungiyo iyana.

⁸Dombembedoo langgilo pololokono babasal. Bai salataa yana polong doi nakakuasaan napupusan, molotomokai dotandukodoo mobabasal, maka doi tampat namolotoanoo kotanduko tubo kosanggapo kotanduko mosusuungan, suwe-suwele sangalaasan kona batudowan.

⁹Dotandukoo mosangkap daano komeeng motubo kotanduko mopopoisik koidan, moteali babasal tuuno tukon kona kakuasaan bebelan taalikon lalom, taalikon tolopot tukon taalikon doi lipu molame tuuno.

¹⁰ Dotandukoo tealimo babasal sampe sukup kona bukuanan tuuk naseraangano kosuludadu surgaa doiyamo bituwon-bituwon pauno, bai daano kobula-bulaa doi yaniladoo sinakukon doi buta tukon piniipiiko.

¹¹Tukon koidan yana tantange kosuludadu surgaa talengano, yana atadeyo kososuba sosubakon oloyo mosinosubakon doi panglimadoo, tukon lomboyo kobonua kaledaan motuuk doiyana.

¹²Jadi doiya kosinggato komian indaa tambuuno mobaladosa tukon akimo napo mososubakon sosubakon-sosubakon moteali napo kawajiban. Tukon kokaledaan motutuu sinakukono doi buta. Dotandukoo sidutu untung doi sasaibino kona kokubai.

¹³Doibundu yaku lengele komeeng komalaekat mobantile doi malaekat bailonggon, “Polong bulaando kona kalumbitkai sasaibino komo tokita doi pokitadoo lalomo naikon kona banggadudulan? Polong doi tempo oilanokai dolalimdoo mobabasal nasoboliyo kososuba oloyo? Polong doi tempo oilanokai dosuludadudoo surgaa tukon dobonuadoo kaleda napiniipikan?”

¹⁴Salataa lapa doiya maka kulengele komeeng komalaekat koidan motimbiliyo, “Polong 1.150 kooloyo koidan. Daanoon mobuno doiya kona kalumbit maka kososuba kinobian tukon sosuba dowa-dowa aki nasinosubakon. Kalu lapamo doiya maka nabinangun koidan kobonua kaledaan.”

¹⁵Salataa yaku daanoon mokakaate sulano kupahamiyo koalatino dopokitadoo, aki namalumbit kokondong doi salaanggu kolangge meeng mopokakana kobanggapi.

¹⁶ Doibundu koidan yaku lengele koalal mouwang luwedoi Ulai Paisunobatango sembeleng, kona bantilano, “Gabriel, tarangkanggenemokai doiyana dopokitadoo.”

¹⁷Maka Gabriel mokokondong doi salaanggudoo yana loolaniyakumo. Yaku teali matakut tuuno, sampe yaku tolubang. Gabriel bantile doi yaku, “Eh banggapi mofanaa, ikoo siokai mutoiyo baikon dopokitadoo doiyakai mengenai loonu napupusan.”

¹⁸Yana daanoon mobasalita, yaku padut. Bai yana taaniyaku tukon tulungiyaku mokokondong koidan. Maka nabantile,

¹⁹“Yaku naikon pailukene doikoo oila naikon komo teali salaku akibat Mian Bisa naliitan. Sabab dopokitadoo kona maksuut doiyamo loonu napupusan.

²⁰Domba langgilodoo yaku mokitayo, modaano kotanduko lua, doiya lambangkanggene kobatomundoan Media tukon Persia.

²¹Dombembedoo langgilo lambangkanggene kobatomundoan Yunani, tukon dotanduko mosusuungan mo tubo doi matano molua antarano doiya koalatino tomundodoo tumbeno.

²²Dotanduko mosangkap mosuwol salataa dona molotoanoo dotanduko tumbeno, koalatino baikon ko batomundoan Yunani naikon tongobos-obos teali sangkap kobatomundoan, bai akiyokai komeeng komo pokakana konabukuanan dobatomundoanoo tumbe-tumbeno.

²³Adukon naikon laate konapupusan dobatomundoan-batomundoanoo, kalu naikon kokulokisan pololokono badaang maka naikon suwol komeeng kotomundo momotikas konoano, tukon pandoy batipu.

²⁴Yana naikon teali bukuan tuuno, bai bolikon nabukuanan susuungo. Yana naikon lubatene kosilakaan mominatakuton tuuno tukon oilamo kona kinubai tataap untung. Yana naikon akateyo komian-mian motambongan barani tukon Mian Bisa naumat.

²⁵Sabab napandoiyan, kona batipu-batipuan naikon untunggene. Yana naikon babanggaakene kodilino, tukon aki namebee poingotii looluk bai yana akateyomo kabus komian mobadaang. Tukon koidan yana barani molawane ko Tomundo Mo Babasaltuuno. Bai iyana inakate manas bolikon banggapi nabukuanan.

²⁶Pokita tentang sosubakon kinobian tukon dowa-dowa molapamo tinarangkanggon doikodoo, doiya tutuu naikon teali. Bai sasaibino doiya naikon teali doi loonu salaando modaanoon momalumbit; jadi inaikai mosalitaikene doi indeemokai komiano.”

²⁷Doibundu yaku muyuko tobikon doiya yaku masakito bula-bulaa kooloyo kona kalumbit. Salataa yaku totobo luwedoi kumasakitanoo maka yaku banguno koikoidan tukon yaku abalimo molakukene daku tugas-tugas motuuk doi tomundo. Bai susa tuuno konoanggu mopikikene dopokita-pokitadoo tukon koidan mo aki kumoola pahamiyo.