Read Banggai DANIEL 9 Bible Online

DANIEL 9 - Banggai bible

DANIEL 9

¹ Doi taun komeengo Darius do Medianoo miano nabapamarentaan, konamalane Ahsyweros luwedoi batomundoan Babel, yaku Daniel, momabaca-baca buku-buku agama. Yaku pikikene baikon kalu turut ko TEMENENO nabantilan doi nabi Yeremia, kokota Yerusalem tataap molombo pitu kolono kotaun kona kalumbit.

³Tobikon doiya yaku sambeang tukon tutuu doi TEMENENO Mian Bisa tukon makabi maasi. Yakukai bapuasa tukon mapake toik karung maka kuosulang doi ambata bunggono.

⁴Sasaibino daku bangsa nadosa yaku mangakukene doi TEMENENO ku Mian Bisa. Daku bantileno, “TEMENENO Mian Bisa, ikoo babasal, tukon kami odotiiyo ikoo. Ikoo sidutu tapaatiyo komu perjanjian tukon buktikanggene komu maasi mosidutu-posidutukon doi yanila momamaasikene ikoo tukon mo lakukene oila komu pinarentakon.

⁵Kami baladosamo, kami mokubaimo lokis, tukon kami lakukanggenemo kokasalahan. Kami malawane tukon lumbaiyomo komu parenta tukon koidan kami isamo luwedoi muaturan-aturan.

⁶Akimo mai ndongoliiyo sasaibino konabi, komu peleleani-peleleani, molapamo basalita luwedoi sambumu domai tomundo-tomundo, doi sasaibino kokatua, sasaibino komai mbumbu tukon sasaibino komai bangsa.

⁷Oh TEMENENO, komu tindakan tataap momeenggon tukon adil, bai kami tolongo lubatene komaa motuuk doi dilinggami, doiyamo kami sasaibino mondoong doi Yudea tukon Yerusalem tukon sasaibino komian mopomeenggon komai bangsa molapamo Ikoo biyele doi tano-tano moodoon tukon moloolani sabab aki napo setia doi-Koo.

⁸Komai tomundo-tomundo, sasaibino komai katua tukon komai mbumbu lapamo lakukene kolangge-langge mominamaakon tukon baladosamo doi-Koo, oh TEMENENO.

⁹Ikoo pongompuni uuno tukon maasi uuno maukai mai lapamo lawane Ikoo.

¹⁰Akimo mai lengele koalalo-Mu, oh ko TEMENENO komai Mian Bisa, salataa musomboliiyano mai tubo loingiyo loingiyo komu hukum-hukum molapamo Ikoo beekanggami lolo doi sasaibino konabi tukon Domu peleleani-peleleanidoo.

¹¹Posaapon ko Israel miano lapamo lumbaiyo Komu hukum-hukum tukon aki napo yase ndongoliiyo koalalo-Mu. Kami baladosamo doikoo, tobikon doiya Ikoo lubatenemo kokutuk doi kami molapamo totulis doi Musa Nabuku, Domu peleleanidoo.

¹²Ikoo mokubai tindakan tapaat tuuno pokakana komo lapamo Ikoo perjanjikene doi kami tukon doi sasaibino komai penguasa. Ko Yerusalem lapamo Ikoo hukume sabab sasaibino kokota doi dunia nia akiyo komo liise kona begalan.

¹³Sasaibino kobalaa mototulis doi Musa Nahukum lalomo Ikoo lubatene doikami. Bai maukai nabuno doiya, oh TEMENENO komai Mian Bisa kami daano motataap tolake sulano mai kubaiyo nasanaang konoamu. Kami tataap aki mai yase tinggale komai dosa-dosa tukon koidan aki mai yase mopalatikanggene komu otunggul-otunggul.

¹⁴Oh TEMENENO komai Mian bisa, ikoo, lapamo hukume kami tukon balaa molapamo ikoo siapkanggene; komu tindakan momeenggon tapaat tukon adil, bai aki mai ndongoliiyo koalalumu.

¹⁵Oh TEMENENO, komai Mian Bisa, Ikoo tudoikanggamimo komu kuasa luwedoi mubabaano komuumat tobuat luwedoi Mesir, tukon domu kuasadoo tataap ninonook. Kami baladosamo tukon mokubaimo kasalahan.

¹⁶Ikoo belayomo kami doi loonu looluk, tobikon doiya inaimokai monggimoliiyo ko Yerusalem Mukota susuumu, Mubunggul bunggono momoliyous. Luwe domai dosa tukon mai mbumbu nakulokisan, maka sasaibino komian mopoloolanikon kami yanila silepiyo pepende tuuno ko Yerusalem tukon motuuk doi umat-Mu.

¹⁷Oh komai Mian Bisa, ndongoliiyokai daku sambeang tukon daku kakabi. Bangunemokai koidan Komu bonua molapamo rinusak manas, kindendekemokai sulano sasaibino komian natoiyo baikon ikoomokai ko Mian Bisa.

¹⁸Oh ko Mian Bisa, ndongoliiyo kami, mbalenggamikai tukon palatikanggenekai komai sakisaawan tukon koidan kokota namanasan mosinombuikon luwedoi sambu-Mu. Kami sambeang doi-Koo bolikon sabab mai jasa-jasa, bai sabab Ikoo maasi uuno.

¹⁹TEMENENO, ndongoliikamikai, ampunikamikai, palatikanggamikai tukon kosobitenemokai komu tindakan! Inaikai momalu-malumbit, sulano sasaibino komian natoiyo baikon Ikoomokai ko Mian Bisa. Sabab ko Yerusalem tukon Komuumat daanokai Mumilik motulen.”

²⁰Yaku banggadudul momeenggon mosambeang tukon yaku akuiyo dakudosa tukon daku bangsa Israel nadosa tukon koidan yaku kabiyo doi TEMENENO ku Mian Bisa sulano nabangune koidan Kona bonua momoliyous.

²¹ Daanoon yaku mosambeang, Gabriel yaku molapamo kitayo doi kupokitadoo lalomo loolukon, yana benga doi yaku taalikon. Doiya kotempono pososinggat komian namososubakonan sosubakon kinobian.

²²Maka Gabriel tarangkanggene buno naiya, “Daniel, yaku lubat sulano kutomboniikon mopikikene doramalanoo.

²³Salataa ikoo tambuuno momakabi doi Mian Bisa, yana mebeemo potimbili. Yaku lubat mopelenggene sabab Yana mamaasikonggon. Jadi, ndongoliiyokai namono-monondok kalu yaku daanoon motarangkanggene koalatino dopokitadoo.

²⁴Pitu luunggon napitu kolono kotaun doiyamo koloonu Mian Bisa mo tataapkanggene tuuk nabebaskangganano komu bangsa tukon domu kotadoo momoliyous luwedoi napo dosa tukon napo kulokisan. Sasaibino kodosa naikon inampuni tukon kokaadilan moposidutukon naikon kinoonggol, sampe dopokitadoo tukon doramalanoo naikon teali buktiino, tukon ko TEMENENO Na Bonua momoliyousoo naikon binuktikanggon doi TEMENENO.

²⁵Catatekai tukon pahamiyokai naiya: Pitu luunggon napitu kotaun naikon toliis, tambuun doi tempo tinobuatonan koparenta sulano nabinangun koikoidan ko Yerusalem, polong doi nalubatan komeeng kokatua Mian Bisa mopiliyo. Doi tempo nom kolono lua kotaun kona kalumbit kololoon-loloon tukon kobakaas kota Yerusalem naikon binangun koikoidan, sulano doloonudoo namoono tukon susaan.

²⁶Doi napupusan dolounudoo do Mian Bisadoo nakatua pinili naikon inakatemo, bai akiyokai kona sala. Maka lubatokai komeeng kotomundo nasuludadu mobukuan, maka namanase kabus kokota Yerusalem tukon koidan ko TEMENENO Na Bonua. Dolounudoo napupusan naikon lubat pokakana kolomba momababa polobosian tukon konamanasan kabus, pokakana ko Mian Bisa molapamo tataapkanggene.

²⁷ Tomundodoo naikon mokubai perjanjian motutuu tukon badaang komian pitu kotaun kona malumbitan. Doi napotangaiyan doloonudoo, Yana naikon atadeyo kona linakukanggonan kososuba tukon basosubakonan. Doibundu daano kolangge meeng mominatakuton mosinombuikon Kulokisan mobamanas naikon inabos doi TEMENENO Na Bonua tukon naikon tataap daano indaa polong iyana moabese idoo bai tinepak balaa molapamo Mian Bisa tataapkanggene tuuk doiyana.”