Read Banggai HOSEA 1 Bible Online

HOSEA 1 - Banggai bible

HOSEA 1

¹ Naiyamo koteteba TEMENENO mobeekene doi Hosea Beeri napau doi tempo kobatomundoan Yehuda napotu-tunduan ko Tomundo mobapamarenta mulai Tomundo Uzia, Yotam, Ahas tukon Hizkia komo maparenta, tukon Yerobeam Yoas napau bapamarenta doi batomundoan Israel.

²Salataa TEMENENO basilingan tumbe-tumbeno doi bangsa Israel tukon palanalaanku lalo doiyaku ko TEMENENO bantile, “Hosea, kilayo komeeng komian moiyase baloloa, tukon mupau-pau koidan naikon teali buno yana. Daku umat pokakana buno domubolokidoo; yanila aki nasetia doiya-Ku, tukon tinggalemo Yaku.”

³Maka yaku kilayo komeeng koboine kosambuno Gomer Diblaim napau. Salataa lapa yana mosung pau kami kotumbenno komo malaat pau malaneno,

⁴ TEMENENO bantile doiyaku, “Sumbuikene domupaudoo Yizreel sabab aki namalumbit koidan Yaku naikon ukume kotomundo Israel, sabab yaku lakukene komangakatean, nambumbu, doi Yizreel. Yakumo naikon komo opopuse Yehu nakaturunan nabamarentaan.

⁵Doi tempodoo Yaku naikon lutakemo kosuludadu Israel nabukuanan doi Yizreel Pepelakono.”

⁶Doi bundu daku boloki doo suunge komai pau koluano, meeng kopau molukono. TEMENENO bantil doi yaku, “Hosea sumbuikene domupau doo ‘Mo Aki Naminamaasikon’, sabab Yaku aki naikon kumamasikene koidan kobangsa Israel, tukon akimo koidan kuompunio yanila.

⁷Bai kobangsa Yehuda naikon yaku mamasikene. Yaku TEMENENO yanila na Mian Bisa, naikon salamatene yanila, bai bolikon tukon polobosian, koidan bolikon tukon sabel kai pana kai adalan tukon molokitiyo.”

⁸Salataa domai paudoo koluano akimo nasusu, dakuboloki tianano koidan maka nasuunge koidan komeeng mian kopau malaneno.

⁹TEMENENO bantil doiyaku, “Sumbuikene domupaudoo ‘Bolikon Kuumat’; sabab ko Israel miano bolikon Kuumat, tukon Yaku bolikon yanila na Mian Bisa.”

¹⁰Bangsa Israel naikon teali badaang buno bone doi tobun; tobikon doiya aki namoola inukur kai nainait. Diabododoo Mian Bisa bantile doi yanila, “Komuyu bolikon Kuumat” bai naikon lubat kotempono yana naikon bantil doi yanila, “Yakumo Mian Bisa motubo tukon komuyu Kupau-pau!”

¹¹Bangsa Yehuda tukon bangsa Israel naikon abali pinotongikon. Yanila naikon mongoduduk meeng kokatua, tukon yanila naikon tuboi tukon monondoko koidan konapotano. Tutuu Yizreel naoloyo naikon teali oloyo mobabasal!