Read Banggai HOSEA 10 Bible Online

HOSEA 10 - Banggai bible

HOSEA 10

¹Israel buno anggur batango mobadaang kosaono. Pollokon tosungi kona kaasan, pollokon badaang kobalabaan nakinubai. Pollokon namakmur, pollokon mondok koidan konapo uno-uno bapilogotan yanila mososubaiyo.

²Mian-mian konoano lokis, diabudodoo sio tanggunge kona lalim akibato. Ko Mian Bisa naikon manase konapo balabaan, tukon lubange kotuwol-tuwol napo pilogot uuno.

³Akimo kai namalumbit koidan yanila naikon bantile, “Kita akiyono konda tomundo sabab kita aki ndamatakutene ko TEMENENO. Oila kotakoso komeeng kotomundo doi kita?”

⁴Yanila babanggal tukon mokubai perjanjian moaki nabisa tukon mokoot perjanjian moakiyo kotakoso. Kohukum pinasakon tobikon kona akiyon nadil tubo buno lobo mosinakakon doi asi mokanakon racun; molapamo binadung.

⁵Modungoliyo kota Samaria naikon matakut; yanila tukon imam-imam moleleaniyo saapi mokinubai luwedoi mosoni doi Beteloo naikon poloon tukon kokiil sabab saibino kobapilogotan namonondokan lapuso.

⁶Pilogotoo naikon biningkat doi Asyur sulano nabineekon doi tomundo babasal. Israel moloingikon dorencanadoo mokubaiyo yanila malaat maa tukon pototulai.

⁷Samaria naikon manaas tukon kotomundono binaba taus buno meeng kopatolo kayung paisu molaline.

⁸ Bakas-bakas doi bunggul-bunggul doi Betel Israel miano natampat sosubaiyano kopilogot, naikon minanas. Sonit tukon bulung naikon tubo doi napo balabaan. Maka yanila naikon wookon doi bunggul-bunggul, “Tonggupiomo kami!” tukon doi bunggul-bunggul, bungkono, “Tapakemo kami!”

⁹ TEMENENO bantile, “Tambun natealian doi Gibea, Israel miano akiyon koidan tade mokubai lalim lawane Yaku. Sabab doiya doi Gibea yanila koidan naikon kanakon polobosian.

¹⁰Yaku naikon lobosiyo komian-mian mokubai lalim, tukon ukume yanila. Bangsa-bangsa naikon pomeenggon tuuk molawane yanila, tukon yanila naikon hinukum sabab donapolalimo mobadangan.

¹¹Looluk ko Israel buno saapi mongula molinatimo monondok, tukon moiyase motudo-tudongiyo kogandum. Yaku aki napalalu mopasange kogandal doi oluno momonondokoo. Bai budodoiya yaku lapamo putusiyo sulano napakisayo balimang babalat. Yaku sumboliiyo Yahuda napobabadung buta, tukon yaku sumboliiyo Israel mobakaluk.

¹² Yaku bantile, ‘He Israel! Bukayo koasi boolu motuuk doi butomu, tiposiyo kalibuang naadilan, tukon pupuiyo kobalakat hasilo doi natutuwan mukilakanano Yaku. Sabab laatemo kotempono ikoo unggoliyo Yaku, mu TEMENENO. Yaku naikon lubat tukon udonia ikoo tukon Kubalakaat-balakaat.’

¹³Bai ikoo kubayo kobalino; ikoo usahakanggene kokulokisan, tukon mopupui moaki naadil. Ikoo makaano hasilo mubakakalaan.” TEMENENO bantile koidan, “He bangsa Israel, sabab komuyu balaanggene komu kereta-kereta polobosian tukon badaang komu suludadu-suludadu,

¹⁴maka komu rayat naikon kanakono polobosian, tukon saibino komu benteng naikon minanaso. Kondondoongoo naikon buno doi oloyo Tomundo Salman namanasano kota Bet-Arbel doi polobosian lalomo, tonggoling koibu-ibu polaing kona pau-pau.

¹⁵Doiyamo naikon komo teali tukon komuyu. He modungoliyo ko Betel, sabab komuyu lakukenemo kokulokisan mobabasal. Doi tempo dodoa soono, minulaimo kopolobosian, tukon kopotommundo naikon mate.”