Read Banggai HOSEA 11 Bible Online

HOSEA 11 - Banggai bible

HOSEA 11

¹ TEMENENO bantile, “Yaku mamasikene ko Israel salataa daanoon doi napoipoisikan, Kuuange Daku pau doo sumbut luwedoi Mesir.

²Bai pollokon Kuuange Daku pau doo pollokon yana badodonggon doiya-Ku. Yana mababa sosubakon tukon mosua kamangian tuuk Baal tukon ilah-ilah bailonggon.

³Baikai Yakumo komo otunggule ko Israel naampokonan, tukon Yaku lebeke poseang-seangan. Yakumo kai komo pialayo yana bai yana aki naiyase momangakukene.

⁴Tukon sasaibino Daku peseseang, Kukolanio yana doiya-Ku. Saibino kona penderitaan Yaku kalikene namimilaan, tukon namonondokan konoanggu Yaku beena kaan.

⁵Ko Israel miano akimo napoiyase abali doiya-Ku, tobikon doiya sio napo abali doi Mesir, tukon kobangsa Asyur naikon parentayo yanila.

⁶Komoluko konapo semangatan popolonggon doinapo kota-kota lalomo, kotaapon-tataapon mobabasal naikon rinusak, tukon Daku umat minanaso. Doiya teali sabab yanila loingiyo kona mongiasan susuungo,

⁷tukon yanila kakatikas motinggala-Ku. Tobikon doiya yanila pinipiik, bai akiyo komo sodiiyo yanila maukai napo wookon momakabi tulung.”

⁸ TEMENENO bantile, “He Israel, aki naminolokon ikoo Kusodiiyo kai Kutinggale. Moolakai ikoo Kumanase buno Adma? Kai Kukubayo buno Zeboim? Aki napolong konoanggu molakukene langge doo, sabab Daku seanggano todudulo babasal doiikoo!

⁹Ikoo aki naikon Kuukume doi kunggimalan lalomo; ikoo aki naikon kumanase koidan. Sabab Yaku, Mian Bisa, bolikon banggapi. Yaku Momoliyous, lolainge ikoo, tukon akimo Kunggimoliikon koidan.”

¹⁰TEMENENO bantile, “Kumian naikon loingiyo Yaku kalukai Yaku ngaaton buno singa tukon konapo musuh-musuh lalondongo. Daku mian mosoi sobit lubat luwedoi taikon doi talise tuuk sosubayo Yaku.

¹¹Luwedoi Mesir yanila lubat mosobit buno tomisi, tukon luwedoi Asyur buno lapanting tambuno. Maka yanila kubabayo koidoo donapo bonua. Yaku, TEMENENO, mo basilingan.”