Read Banggai HOSEA 13 Bible Online

HOSEA 13 - Banggai bible

HOSEA 13

¹Doilooluk ko Efraim benseno inodotii tobikon kalukai daano ko parentah luwedoi benseno doo, kobense-benseno bailon doi Israel matakut. Bai Efraim benseno baladosa sabab sosubaiyo kopilogot tobikon doiya naikon kabus.

²Polong diabudodoo do Efraim mianodoo daano momeenggon momokubai dosa; yanila kubaiyo kotimbalang-timbalang moluwedoi suasa sulano napososubaiyo — dotimbalangoo mokinubai luwedoi banggapi naakal tukon dokubaiyanodoo luwedoi banggapi limano komo kubaiyo. Tukon koidan yanila bantile, “Pososubakenemokai kopososubakon doi timbalang-timbalang nia” Aneh tuuno, kobanggapi moumayo kosapi pauno timbalango!

³Tobikon doiya domian-mianoo naikon lapus buno alibus kai soilu doi dodooa soono. Yanila naikon buno labuwe batango motuul mombuul mopuule doi bagilingan gandum, tukon buno tibolung mo tobuat luwedoi pipa lalomo.

⁴TEMENENO bantile, “Yakumo ko TEMENENO mu Mian Bisa, mobabayo komuyu tobuat luwedoi Mesir. Komuyu akiyo kopo TEMENENO tolongo Yaku. Yakumo kai tolong komu pasalamat.

⁵ Doi lipu mo tuul doi padang lalomo, Yakumo komodagaiyo komuyu.

⁶Bai salataa komuyu daanomo doi tano monondok tukon komuyu bobosul tukon biai, komuyu teali babanggal tukon tolimingganaku-Mo.

⁷Tobikon doiya Yaku naikon osinggange komuyu buno singa. Buno macan tutul Yaku naikon tahane komuyu doiloloon.

⁸Yaku naikon lobosiyo komuyu buno tomisi molapus kona pau-pau. Yaku naikon bending-bendinge komuyu. Buno singa Yaku naikon sokowo komuyu doi mutampat, tukon buno iyayon mobarani Yaku naikon bending-bendingiyo komuyu.

⁹Yaku naikon manasemo komuyu, he bangsa Israel! Tukon indemo kai komomoola tulungiyo ikoo?

¹⁰ Komuyu makabi tomundo tukon katua bai inandokai yanila saibino diabudodoo? Yanila molaamo salamatene komu rayat?

¹¹ Tukon Yaku nggimal beena tomundo doi komuyu, tukon nggimal tuuno Kutobiyo yanila abali.”

¹²TEMENENO bantile, “Lalim tukon Israel nakasalahan lapamo tinulis, tukon konatinulisan inabos.

¹³Israel anoon konakasampatan tuuk motubo, bai yana todudul longas sabab aki nagunakanggene kasampatanoo. Yana buno pau lumbon momosabito sosuune bai aki nayase tobuat luwedoi tinano nakodutan.

¹⁴ Bangsa nia akikai Kusalamatene luwedoi kuasa mian mate nadunia. He matean, pelenggenemokai komupanakit! Limangemo komulimang domobasilakadoo! Yaku akimo kumamasikene nabangsa nia koidan.

¹⁵Maukai ko Israel namonondokkan buno bulung momolumbang, bai yaku naikon makapatu mombuul tolopot momoonas luwedoi padang lalomo. Dombombuloo naikon kubaiyomo sasaibino kopaisu matano tukon bubung-bubung, teali mooti, tobikon doiya lapusokai kolobo modaano koanggano.