Read Banggai HOSEA 2 Bible Online

HOSEA 2 - Banggai bible

HOSEA 2

¹Tobikon doiya kotulano naponguanggon “Mian Bisa Naumat” tukon “TEMENENO no Minamaasikon.”

²TEMENENO bantile, “He Kupau-pau, tinamu bolikon Kuboloki koidan tukon Yaku bolikon nalangkai. Tobikon doiya urusuno yana sulano naakimo nabaloloa koidan.

³Kalu yana tataap baloloa, yaku naikon liate konapakean sulano natalalau buno doi tempo nasinungan. Naikon yana Kutealikene buno buta motuul tukon mokindolon, tobikon doiya yana mate molou.

⁴Komuyu, napau-pau, naikon aki Kumamasikene; komuyu sinung luwedoi baloloan.

⁵Kotinamu baloloa aki natoiyo komaa. Yana tolongo bantile, ‘Tadukai kuampakon doi kubibian-bibian mobeenggu kinaan tukon monginum, kotoik wol tukon toik lenan, zaitun lisisono tukon anggur.’

⁶Tobikon doiya yaku naikon kurunge yana tukon mosolot sonito, tukon tutupe kona loloon tukon pagar beton.

⁷Yana naikon lelenggene kona bibian-bibian, bai aki naikon napolong doi yanila. Yana naikon umboliiyo yanila, bai aki naikon naposunggene yanila. Maka nabantile, ‘Yaku naikon abali doi kulangkai tumbeno; loluk daku ndondoong monondok tuuno bai diabudodoo akimo.’

⁸Tinamu aki naakuiyo baikon Yakumo komobeena yana gandum, anggur, zaitun lisosono tukon sasaibino komosoni, suasa yana mopakeo tuuk mososubaiyo ko Baal.

⁹Tobikon doiya, doi loonu bapupuian Yaku naikon abali tarike Daku bineekon, doiyamo gandum tukon anggur, tukon wol tukon lenan Yaku mobeekene doiyana salaano napakeyo.

¹⁰Naikon Kulauwo yana doi saibino kona bibian salaano. Akiyo komeeng komian kai luwedoi yanila moola sobiiyo yana luwedoi Kukuasa.

¹¹Sasaibino kona lamean naikon Kuberentio, mau lamean taunan maukai lamean bituwon tukon oloyo-oloyo Tadean; kona tutuan, sasaibino kobaagaman lamekanano.

¹²Yaku naikon manase koanggur bata-batango tukon ara, bataa-batango sabab menurut yana doiya patambo doi naleleaniano konabibian. Naikon Yaku kalikene koanggur asi-asino tukon ara asi-asino teali mosolot; iyayon-iyayon mobarani naikon komomanase.

¹³Yaku naikon ukume yana sabab oloyo-oloyo mopakeyomo sulano namosua komangian doi Baal, tukon bahias tukon naperhiasan sulano nalelenggene kona bibian, tukon toliminggene tuuno Yaku. Yaku, TEMENENO, lapamo basilingan.”

¹⁴TEMENENO bantil, “Tobikon doiya Yaku naikon babayo yana doi padang lalomo; indaa yana naikon Kubudikio tukon bantilan-bantilan babianan.

¹⁵ Naanggur asi-asino naikon Kuabalinggene doiyana, tukon Kasusaan Pepelako naikon Kutealikene tataapon moinian. Indaa yana lolobotiyo Yaku buno doi tempo natabokonan, salataa yana sodo sumbut doi Mesir.

¹⁶Maka yana naikon bantile Yaku nalakai, tukon bolikon koidan na Baal.

¹⁷Yaku aki naikon pataikene yana mobantile yaku Baal kosambuno koidan, tobikon komian naikon toliminggene kosambuno.

¹⁸Doi tempo doo Yaku naikon mokubai perjanjian tukon saibino koiyayon kalingano sulano naaki napo nggabute Dakuumat. Yaku naikon berentio sasaibino kopolobosian tukon yaku saakene kopolobosian pokakana luwedoi Kuumat natano doo, tukon kubaiyo yanila tubo tukon sanaang tukon aman.

¹⁹Israel, ikoo naikon Kutealikene Kuboloki, boloki mosah tuuk posidutukon. Ikoo naikon Kumamasikene tukon sidutu kilakene; Yaku naikon lakukene kojujur tukon molole.

²⁰Pokonoi Daku perjanjian, ikoo naikon Kunikaikon. Ikoo naikon akuiyo Yaku buno mu TEMENENO susumu.

²¹Doi tempodoo kala Daku umat Israel sambeang, Yaku naikon ndongoliyo yanila. Luwedoi timbu Yaku kubaiyo lubat koidan tobikon kobuta hasilo gandum, anggur tukon zaitun lisosono.

²³ Naikon Kukubaiyo Daku umat tubo monondok tukon tataapono doi yanila tano. Doi yanila mosinumbuikon ‘Mo Aki Nasineseang’ naikon Kutudoikene baikon yanila Kubibian. Tukon doi yanila mo sinumbuikon ‘Bolikon Kuumat’ naikon Kubantile, ‘Komuyu Kuumat.’ Yanila naikon timbiliyo buno naia, ‘Ikoomo komai Mian Bisa.’ ”