Read Banggai HOSEA 4 Bible Online

HOSEA 4 - Banggai bible

HOSEA 4

¹TEMENENO popalakalai tukon komo ndungoliyo natano nia. He Israel, ndongoliyo oila Kona binantil, “Doi tano nia akiyo kesetiaan kai seang, tukon modungoliyo aki naakuiyo Yaku salaku Mian Bisa.

²Yanila batotopi, bai yanila aki natapatio; yanila bakakala mangate, pondikuk, tukon baloloa. Kulokisan tosungi tukon komangakatean tuundu-potuundu.

³Tobikon doiya tano nia naikon teali motuul, tukon sasaibino motubo idoo naikon mate. Sasaibino kokaliangano koiyayon doi dapang, doi buta tukon doi tobun naikon manas.”

⁴TEMENENO bantile, “He sasaibino koimam, inaikai daano komo asalakene kai monggimoliiyo Dakuumat, sabab komuyu mo Daku sinalakon!

⁵Oloyo popook komuyu mokubai kesalahan, bunomo koidan sasaibino konabi. Tobikon doiya Yaku, maka naikon manasemo ko Israel, tinanmu.

⁶Komuyu saibino koimam, aki popadulio Yaku, maka Kuumat lakon aki namapadulikon Yaku, tobikon doiya yanila silalaka. Komuyu tolake Daku otunggul-otunggul. Jadi, Yaku lakon naikon tolake komuyu, tukon mupau-pau aki naikon Kuakuwo salaku Ku imam-imam.

⁷Pololokon komuyu tosuungi badaang, pololokon komuyu baladosa doiya-Ku, he koimam-imam! Tobikon doiya komu ndondong naikon Kuboliyo: Komuyu aki naikon poinodotii koidan baimokai tinotulai.

⁸Komuyu teali kaasa sabab Kuumat nadosa, tobikon doiya komuyu yase sulano yanila banggadudul baladosa.

⁹Maka komuyu yase naikon sakisaa pokakana buno rayat! Yaku naikon ukume komuyu pokakana tukon pokokubai-kokubai.

¹⁰Komuyu naikon makaan luwedoi sosubakon-sosubakon mosinosubakon, bai komuyu naikon tataap malaal. Komuyu naikon sosubaiyo koilah-ilah molumbang, bai komodungolikon tataap aki tosuungi, sabab komuyu tinggalakumo sulano pososubaiyo koilah-ilah bailonggon.”

¹¹TEMENENO bantile, “He umat-Ku, mau kai anggur momalumbit maukai anggur mobolu akienggenemo komukemampuan motuuk doi mubapikiran mosehat.

¹²Komuyu makabi otunggul luwedoi meeng kopatolo kayung! Meeng kotongkat popitoikene doi komuyu oilamo kopoimas toiyo! Komuyu buno meeng koboloki moteali baloloa; komuyu tinggale Yaku tukon salakanggene kobutonggu doi ilah-ilah bailon.

¹³Doi tampat-tampat mososubakon pilogot doi bunggul-bunggul bunggono tukon bungkuko, komuyu mososubakon-sosubakon, tukon mosua kamangian doi kayung-kayung babasal adeno momasalimbung sabab dotampatoo tanaang. Bai oilakai konaakibat? Muboi-boine teali baloloa tukon mumonianan-monianan momoluko baloloa!

¹⁴Bai Yaku naikon aki Kuukume donapokokubaidoo, sabab mau komuyukai ampakon doi mian momobaloloa-baloloa mobalimang doi bonua-bonua bapilogotan, tukon polaing yanila komuyu mososubakon sosubakon doi ilah. Tutuu bisa nabantilan nia: ‘Bangsa moakiyo konapangalatian tentang Mian Bisa naikon tuwong.’

¹⁵He komuyu Israel miano, komuyu aki posetia doiya-Ku! Bai Yaku moinikene Yehuda aki namokubai kasalahan mopokakana! Inai bakaleda doi Gilgal kai doi Betel. Inai batotopi tukon TEMENENO sambuno motubo.

¹⁶He Israel miano komuyu touddul motikas konoamiu! Bulaando Yaku moola padagai komuyu buno domba doi padang lalomo?”

¹⁷Umat Israel tatariko doi pilogot. Sabab doiya sodiikenemo yanila.

¹⁸Sambuno lapa malangu sabab badaang koanggur naininum, yanila baloloa tukon sanaang konoano. Yanila yase tuuno natinotulai kalu bainokai moinodotii.

¹⁹Tobikon doiya yanila naikon lapus buno pinuul mombuul. Yanila naikon malaat maa sabab sosubakon sosubakon yanila mososubakene doi ilah-ilah.