Read Banggai HOSEA 5 Bible Online

HOSEA 5 - Banggai bible

HOSEA 5

¹TEMENENO bantile, “Ndongoliyo, he saibino koiman! Palaatikanggene, he Israel miano! Ndongoliyo, he mian-mian turunan tomundo! Ukuman lapamo tuwong doi komuyu. Sabab, komuyu siokai pomohakimi tukon adil, bai kobolino komuyu tealimo buno palako doi Mizpa, buno tolong doi Tabor Bunggulo,

²tukon buno buang moatean doi Sitim. Tobikon doiya Yaku naikon ukume komuyu saibino.

³Yaku toiyo sasaibino tentang kobutomu, he Israel! Aki nanggola ikoo rahasiakene kolobo moluwedoi Yaku. Ikoo sosubaiyo kopiligot tukon aki koidan musetia doi Yaku. Tobikon doiya mumian-mian akimo namoloingi mososuba doi Yaku.”

⁴Kulokisan Israel miano mokubaiyo tealikene yanila akimo namoola abali doi yanila na Mian Bisa. Yanila lapamo kinuasai mososubaiyan pilogot, tobikon yanila naakimo napadulio ko TEMENENO.

⁵Bangsa Israel nababanggaalan tokita tukon tontong, tukon teali bukutii yanila nasalah. Akibat napolalim yanila takait tukon tuwong, tukon bangsa Yehuda tatalaing mootuwong.

⁶Yanila taus unggolio ko TEMENENO tukon mababa domba tukon saapi tuuk sosubakon; bai saibino akiyo kotakoso. Sabab TEMENENO tinggalemo yanila, tukon yanila aki nalaate posunggene Yana.

⁷Yana aki nasetia doi TEMENENO, yanila napau-pau bolikon napau-pau. Tobikon doiya, akimo namalumbit koidan yanila naikon minanaso posingkat tukon yanila naasi-asi.

⁸Puuke kotorompet doi Gibea! Longolikene kopalosan ponguang molobosi doi Rama! Longolikene kokakuweisonan polobosian doi Betel! Maimo, Benyamin miano, potauso polobosi!

⁹Israel naikon silaka, sabab lubato kooloyono, tuuk moukume yana. Ndongoliyo he rayat Israel, lobodoo tantu naikon teali.

¹⁰TEMENENO bantile, “Yaku nggimal sabab katua-katua Yehuda lapamo lobosio ko Israel tukon rampase kona buta. Tobikon doiya Yaku naikon lubotikene koukuman doi yanila buno lomba.

¹¹Israel sinakisa; yana lapuso kona hak doi nabuta; sabab yana batahan momakasi tulung doi mo tutuu bai aki namoola tulunge yana.

¹²Doiyamo kosabapo Yaku naikon manasemo kobangsa Israel tukon manasemo ko Yehuda miano.

¹³Bangsa Israel tukon bangsa Yehuda sadario konapondondoong molokis, maka Israel taus doi Asyur tuuk mangkabi potombonii luwedoi tomundo babasal. Bai tomundo doo aki natulungio kai kinendeke yanila konapondondoong.

¹⁴Buno singa molobosi, bunomodoiya Yaku naikon lobosiyo ko Israel miano tukon Yehuda. Yaku susunggu naikon mobending-bending yanila, maka Kutinggale. Kalu Yaku sumboliiyo yanila taus, akiyo komeeng komian momoola, sobiiyo yanila.

¹⁵Dakuumat naikon Yaku tinggalemo sampe sukupo konapasusaan sabab nalalim-lalim, maka napolubat unggoliyo Yaku. Mungkin doi naposusaan lalomo, yanila naikon berusaha mopososuung tukon Yaku.”