Read Banggai HOSEA 6 Bible Online

HOSEA 6 - Banggai bible

HOSEA 6

¹Israel mian-miano bantile, “Maimo naabali doi TEMENENO. Yanamo komokosokitiyo kita, bai Yana koidan naikon komoaline. Yanamo komo tabase, bai Yana koidan naikon komobungusiyo konda dedeng-dedeng.

²Lua kai tolu kooloyo nia lalomo Yana naikon aline mo kita, tukon kita naikon tubo doi Nalindungiano lalomo.

³Tobikon doiya maimo nda berusaha tutuu sulano TEMENENO natinganiyo kita. Yana tantu mo lubat doi kita buno pana nalubatan, tukon buno udan mombetokio kobuta doi napupusan koudan tempono.”

⁴Bai TEMENENO bantile, “He Israel tukon Yehuda! Indee komo sio kukubaiyo tukon komuyu? Komu kokila doiya-Ku mosobit lapus buno bunumkai soilu dodowa soono.

⁵Doiyamo kosabapo Yaku sumbolio Daku nabi-nabi sulano napelenggene doi komuyu Daku kaputusan baikon komuyu sio poinukum tukon linopu. Daku minooton luwedoi komuyu lapamo tokita tukon tontong.

⁶ Yaku, yase tuuno komuyu tingonio Yaku tukon sidutu mamasikene Yaku, luwedoi komuyu mosua tukon mososubakon sosuba doiya-Ku.

⁷Bai buno Adam, komuyu akiyenggenemo komu perjanjian tukon Yaku.

⁸Gilead meeng kokota momoono tukon kulokisan tukon mangakatean.

⁹Imam-imam doi kotadoo buno meeng kopotongian pondikuk mopepete komian moalon. Doi loloon mosasalaane kotampat mangakatean! Saibino kulokisan yanila lakukene tukon sangajaiyo.

¹⁰Doi Israel Yaku kitayo meeng kolobo mominatakuton; Dakuumat kodikitiyo kobutongo tukon mososubaiyo kopilogot.

¹¹Mengenai komuyu, he Yehuda miano, Yaku lapamo tataapkanggene kotempo sulano Kuukume komuyu sabab mukakabai.”