Read Banggai HOSEA 9 Bible Online

HOSEA 9 - Banggai bible

HOSEA 9

¹He kobangsa Israel, inaimokai koidan polamekene kopooloyo-oloyo mobabasal pokakana kobangsa-bangsa bailonggon. Komuyu tinggalemo kopo Mian Bisa tukon akimo posetia doiya-Na. Doitempo bapipikian gandum, komuyu balukene kobutomuyu doi Pilogot Baal salaku mian mobaloloa, tukon komuyu sanaang momatalima gandum komuyu moanggape doiya domo pilogotoo napatambo doi komuyu!

²Bai akimo namalumbit koidan kabuso dopogandum tukon pozaitun lisisono, maukai anggur naikon kabuso.

³Komuyu he kobangsa Israel, aki naikon potataap dungol doi lipu TEMENENO mebukene komuyu. Komuyu sio abali doi Mesir, tukon sio pomakaan kinaan moharaam doi Asyur.

⁴Doi tano-tano doo komuyu aki naikon malaat mososubakon anggur tukon sosubakon iyayon sulano ko TEMENENO noano nasanang. Mukinaan naikon kubaiyo samba komian momakakaan teali najis, buno kinaan mokinaan doi upacara bakuburan. Domu kinaano tolongo ikoo komo boindaa bosul; mau natango soisik akiyo komo binaba doi TEMENENO Nabonua sulano nasinosubakon.

⁵Doi agama oloyono mobabasal motuuk doi odotiiyano ko TEMENENO, aki naikon pomoola malakukon oioila doi polamekananodoo.

⁶Kalukai kosobaan lubat, tukon komuyu binaba doi tano bailon, maka komototinggal doi antara komuyu naikon Mesir mian-miano komo pototongikene sulano napoinakate tukon kinibul doi Memfis! Kobulung tukon sonit naikon tubo tonggupio kotampat-tampat mubonua lapono tukon mubarang-barang suasa modaano koanggano.

⁷ Kalu laatemo kotempono kubahukuman doi talimaano koposoboli kokubai, Israel naikon rasakanggene! Komuyu bantile, “Nabii mokinuasai roh nia bodoh! Yana tindo!” Komuyu bantile buno doiyo sabab komuyu mosikitene tuuno doi yaku tobikon doiya komu lalim babasal tuuno.

⁸Mian Bisa utuse yaku salaku nabi sulano koingolikene komuyu Konaumat, bai doiyaando daku tausan, komuyu berusaha motalunggene yaku buno tomisi. Doi Mian Bisa kona natano susungoo ikoo nabi-nabi konarayat musuwo.

⁹ Komu kakabai kulokis tuuno bunomo Gibea miano nalinakukon. Mian Bisa naikon neneeke komu kasalahan tukon ukume komuyu sabab mulalim:

¹⁰ TEMENENO bantile, “Salataa tumbe-tumbeno Yaku posunggene ko Israel, Yaku sanaang buno mian moposunggon anggur saono doi padang lalomo. Salataa tumbe-tumbeno yaku kitayo komu mbumbu yaku sanang buno mian mokitayo kona hasil ara saono. Bai salataa yanila taus doi Bunggul Peol, yanila tambuno mososubaiyo ko Baal tobikon yanila teali madikit buno donapoilah yanila mokilakene.

¹¹Ko Israel nababasalan naikon benga kokilapus buno tomisi akiyo naikon komo tianan, tukon akiyon kopau-pau mosinung.

¹²Bai maukai nadaano kopau-pau mosinung tukon mokinabasal, yanila naikon Yaku alayo; akiyo komeeng komiankai naikon Yaku sodiikene tubo. Silakamo komuyu, he bangsa Israel, kalu kai Yaku otinggale komuyu!”

¹³TEMENENO, Yaku kitayo konapo pau-pau molinolonggon tukon moinakate.

¹⁴Oilakai daku kinabi doi-Koo motuuk doi mian-mianoo? Tealikene konapo naboi-boine nakamba! Kubaiyo yanila naaki namoola susuwo kona pau!

¹⁵TEMENENO bantile, “Saibino kokulokisan yanila tambuune doi Gilgal. Idoomokai Daku mulaiyan mosikitene yanila. Sabab yanila nakokubai molokis; Yaku naikon siikayo yanila luwedoi kutano nia. Yaku aki naikon mamasikene yanila koidan; saibino yanila nakatua lawanemo Yaku.

¹⁶Israel miano naikon Yaku ukume. Yanila naikon teali buno mosinakakon moakiyo kosaono, tukon koanggol-anggolo motuullo. Yanila aki naikon nadaano kona pau; bai maukai yanila daano konapau, naikon Kuakateo konapo pau-pau yanila momamasikene.”

¹⁷Mian Bisa yaku moleleaniyo doo naikon tolake Kona umat, sabab yanila aki naiyase ndongoliyo Yana. Yanila naikon lausala doi antara bangsa-bangsa.