Read Banggai YOEL 2 Bible Online

YOEL 2 - Banggai bible

YOEL 2

¹Puukekai kotrompet, bulunganekai kopalosan silakaan doi Sion Bunggulo mo moliyous, Mian Bisa nadungolan. Lolondongkai, he komodungoliyo ko Yehuda! Sabab TEMENENO Naoloyo lolanimo tukon mosobito lubat.

²Oloyo doo kalipookan tukon kiis, moono alibbus tukon lainggon kalipookan. Ko suludadu betek polubotiimo bunokai bunom motobinggakon doi bunggul bunggono. Kajadian nia akiyon nabiasa teali, tukon akimo naikon naulangiyo sidutu-posidutukon.

³Bunokai aung mosuayo tukon mokopulo yanila manasekai sasaibino komo sinakakon. Doi tumbe dotanodoo pokakana ko Eden, TEMENENO nataman, sambuno lapa, buno padang bone mo moonas tuuno. Akiyo kolobo meeng kai mototinggal, akiyo komoluput luwedoi yanila namolobosian.

⁴ Yanila duduso buno adalan; naobulen buno adalan doi lapangan palatandingan.

⁵Yanila osut-osuut doi bunggul popuutano, konabulunganan buno kereta polobosian nabulungan tukon buno aung mopalaput mosuayo komelang. Yanila babaris buno pasukan mobarani, mobasadia maju doi lapangan potandingan.

⁶Tempo yanila molobosi, sasaibino komian mbombokon, sasaibino koduduso teali mbules tukon molooyu.

⁷Bunokai talenga, yanila molobosi, tukon liba doi beton buno pejuang. Yanila moloyos kona balisan doi muka, aki nabelok kai boliiyo konatujuan.

⁸Yanila aki napodesak-desak, doi naloloon susungo yanila ampakon. Rame-rame yanila duduwo sasaibino kopertahanan, aki namoola konapo barisan tinadekon.

⁹Yanila molobosi doi kota lalomo, tukon obulen donabeton bunggono. Yanila liba doi bonua-bonua lalomo; buno pondikuk, yanila usok lolo doi jendela.

¹⁰ Salataa yanila maju, lolondong kodunia, tukon kotimbu pakandang. Maka kalipookano kooloyo matano tukon bituwon, tukon bituwon-bituwon pauno laango lapuso.

¹¹ TEMENENO alalo buno duluk, beena paloosan-paloosan, doi naangkatan polobosi. Babasal tuuno kona suludadu! Molakukene Kona parentah! Bisakai mobabasal tukon hebat ko TEMENENO Naoloyo! Akiyo kai ko meeng komian momoola bataanggon.

¹²TEMENENO bantile, “Bai diabudodoo nia, abalimokai doiya-Ku tukon sasaibino konoano, tukon bapuasa, mandaung tukon kokiil.

¹³Bukayomokai konoamu tukon inai natolongo mupakean.” Bangabaliinggonakai doi TEMENENO mu Mian Bisa. Bulusan kona sabaran tukon maasi monondok konoano tukon badaang konamaasi. Sanaang moompunio tukon aki naiyase ampakonkene koukuman.

¹⁴Uga-ugaate ko TEMENENO mu Mian Bisa tobolii kona pendirian, tukon balakaatiyo komuyu tukon tosu-tosungi. Sulano komuyu malaat pososubakon sosubakon anggur tukon gandum tuuk TEMENENO mu Mian Bisa.

¹⁵Puukekai kotrompet doi Sion Mian Bisa nabunggul, popitoikenekai kooloyo puasaan, kubaiyokai kopososungon babasal.

¹⁶Kumpulekai sasaibino korayat, atulekai ko umat napototongian. Sumboliyokai komian-mian motua nalubat, labuk-labuk tukon koidan pau-pau mopoipoisik. Tukon sasaibino komoosoan boolu sio koidan nalubat. Sumboliyokai yanila natinggale kona kombiang.

¹⁷Sumboliiyokai yanila sasaibino komian mo leleaniyo ko TEMENENO, kokiil doi antara balaban tukon doi gandaria, tukon bantile, “Seseangekai Komuumat, oh TEMENENO; inai mosodiikene Komulangge teali sinosibolii,” tobikon ko bangsa-bangsa bailon nasindire tukon bantile, “Inaanoo konapo Mian Bisa?”

¹⁸Maka TEMENENO palaatikanggene Kona buta, tukon mamasikene Kona umat.

¹⁹Yana timbiliyo yanila bunonia, “Budodoiya komuyu sasaibino Yaku beena, gandum, anggur tukon zaitun lisosono tuuk pokinaan, sulano komuyu sasibino bobosul. Yaku aki naikon sodiikene komuyu tinotulai, kai kinokumbit luwedoi bangsa-bangsa.

²⁰Pasukan betek luwedoi lembet naikon Kusiikayo, kosoobos Kusikayo doi padang bone. Ko Tobun Mate Kudesake ko barisan doi salaano, ko Tobun Tanga Kutolayo kobarisan doi tonggulungo. Konapo mayat-mayat naikon boanno. Yanila Kusilakayo sabab lapamo sakisaayo komuyu.

²¹Inai matakut, he asi, sananggene konoamu; neneeke naikon langgedo basal TEMENENO nakinubai tuuk ikoo!

²²He iyayon-iyayon, inakai moiyos. Padang-padang bulungo diabudodoo manampalo. Tukon hebat kokayung-kayung mosao, anggur saono tukon ara lobi-lobian.

²³He korayat doi Sion potedeskai! Polamekai tukon pokokuweiskai! sabab sasaibino Kona monondokan luwedoi TEMENENO mu Mian Bisa. Doi loonu namotondongian kokayung loono binee cukup koudan doi komuyu. Doi loonu mokumelon Yana lubatene koudan, koidan doi loonu nosopian kokayung bunomokai domolapadoo.

²⁴Maka gandum naikon inusokon koidan doi tampat batu-batudangan; anggur tukon zaitun lisosono naikon toduap luwedoi tampat bapiisan.

²⁵Yaku naikon soboliyo sasaibino komu karugian; doi taun-taun salataa kobetek nakaanano kopatanaman hasilo. Sabab Yakumokai komo kirime kobetek napasukan doi komuyu.

²⁶Komuyu naikon cukup kokinaan tukon rasayo bobosul. TEMENENO mu Mian Bisa naikon komuyu muliakanggene, sabab lakukenemo doi-Koo badaang komo manasaindinggon. Daku umat akimo nateali koidan nasinasibolii!

²⁷Maka komuyu toiyomo, Israel, baikon Yaku daano doi komuyu tanga-tanggano, tukon baikon Yaku, TEMENENO, danoon mu Mian Bisa. Akiyo Komian Bisa bailon, tolongokai Yaku susuunggu. Daku umat akiyo naikon moinakamaa koidan!”

²⁸ “Sambuno lapa doiya sasaibino komian naikon Koonoiyo tukon Ku Roh. Maka malane-malane naikon pelenggene Dakuteteba-teba; kolaka-lakai doi antaramu naikon malaat olumon tolokita naikon bineekon doi muda-mudi.

²⁹Doi tempodoo Daku Roh naikon Kulebesenggene koidan doi peleani-peleani malane tukon boine.”

³⁰Doi timbu tukon buta naikon Kulakukene badaang komominasaindinggon. Naikon daano kosauh motokundang, aung mokolot tukon tibulong mobubut.

³¹ Kooloyo matano naikon kalipookan tukon bituwon teali memela buno sauh. Sasaibino doo naikon teali bai akiyoon nalaate ko TEMENENO Naoloyo lubatan, oloyo babasal tukon mominatakuton!

³² Bai inde komiano momakabi potulungi doi TEMENENO naikon sinalamaton. TEMENENO bantile, “Doi Yerusalem miano Yaku molilikomo naikon salamat.”