Read Banggai AMOS 2 Bible Online

AMOS 2 - Banggai bible

AMOS 2

¹ TEMENENO bantile, “Modungoliyo koMoab badaango lunggon namokubai lalim, tobikon doiya yaku tantumo naikon ukume yanila. Yanila totulaiyo do Tomundo Edom momatemo, yanila lomboyo konakibul tukon alayo kobuku-bukuno tukon suayo teali abu.

²Tobikon doiya, yaku naikon kirime koaung doi tano Moab, tukon suayo kabus kobenteng-benteng Keriot. Moab miano naikon mate doi polobosian lalomo tanga-tangano, daanon kotrompet mopinuuk, tukon kilison wookan komian doi polobosian.

³Komo berkuasa doi Moab tukon sasaibino kosambu naikon Kuakateo.”

⁴TEMENENO bantile, “Yehuda miannno badaango lunggon namokubai lalim, tobikon doiya Yaku tantumo naikon ukume yanila. Yanila langgaremo Daku parentah-parentah tukon aki napaduliyo Daku otunggul-otunggul. Yanila tapamo sabab yanila sosubaiyamo koilah-ilah napombumbu nasinosubai.

⁵Tobikon doiya, Yaku naikon kirime koaung doi Yehuda tukon suayo kabus kobenteng-benteng doi Yerusalem.”

⁶TEMENENO bantile, “Israel miano badaango lunggon namokubai lalim, tobikon doiya Yaku tantumo naikon ukume yanila. Mian mojujur moaki namoola abalinggene konabingkat, yanila balukenemo teali ata. Bunomo doiya koidan konapakokubai motalalais moaki nabeale konasamea, mau tolongo samea doo pokakana koanggano meeng kopaan kosapatu.

⁷Yanila pipiike komian motalalais moakiyo kona usaha, tukon alaase komian motalalais. Tamano tukon napau gauliyo koata boine molongo uang, tobikon Kosambunggu moliyous kinulokisono.

⁸Doi samba kotampat kaledaan, komian-mian moolo tukon nakalambi yanila moalayo salaku posoboli samea luwedoi mian motalalais. Doi Mian Bisa Na Bonua, yanila monginum anggur yanila moalayo luwedoi mian mobasamea doi yanila.

⁹ Maukai nabunodoiya, he Kuumat, tuuk komuyumo Yaku lopuwomo ko Amori miano mopotodondokii buno kauwalu tukon monggol buno kayung terpentin.

¹⁰Komuyu lapamo kubayo sumbut luwedoi Mesir, tukon kubabayo loloiyo kopadang bone sangkapolono kotaun konakalumbit. Amori miano nabuta lapamo Kubeekene doi komuyu teali mutano susuumu.

¹¹ Yaku lapamo piliyo bubula luwedoi mupau-pau tuuk teali nabii tukon bubula komian motabokon tuuk teali mian moaki naiyase kubayo kolobo molokis.” Bolikonkai doiya bisa, he Israel miano? Yaku, TEMENENO lapamo basilingan.

¹²Bai komuyu beena monginum anggur komian modedenggene kolobo molokis, tobikon kubaiyo yanila toliminggene koperjanjian. Tukon komuyu larange konabi-nabi pelenggene Daku teteba.

¹³Diabudodoo komuyu naikon Kudedekene polong doi buta, sulano komuyu nggook buno kereta momoono tukon pongolokiti gandum.

¹⁴Moobulen mosobit bai aki naikon nalolos; komian bukuan naikon lapuso konabukuanan, tukon mian mobarani aki nateali salamatene kobutongo susuungo.

¹⁵Komopana aki namoola betaanggon, momosobit obulen akikai namoola obulenggene kobutongo, tukon polokiti adalan aki naikon nalolos.

¹⁶Doi oloyodoo kosuludadu mobarani tuuno naikon tinggalemo kosanjata, maka naobulen. Yakumo ko TEMENENO molapamo basilingan.”