Read Banggai AMOS 3 Bible Online

AMOS 3 - Banggai bible

AMOS 3

¹Ndongoliyokai TEMENENO nia nateteba, he bangsa Israel molapamo TEMENENO babayo sumbut luwedoi Mesir! TEMENENO bantile,

²“Luwedoi dunia sasaibino kobangsa, komuyu komeeng-meengo kobangsa Yaku motingoniiyo tukon Yaku palaatikanggene. Doiyamo kosabapo babasal komulalim, tukon Yaku tantumo ukume komuyu.”

³Moolakai lua komian motaus polaing-laing aki napobatikon lolukon?

⁴Oilakai kosinga doi mosolot ngaaton, kalu yana akiyon namalaat musuh? Oilakai kosinga napau ngaaton doi nabuang lalomo kalu yana akiyon namalako oi-oilah?

⁵Oilakai kotomisi kanamo doikobo lalomo, kalu kobo aki napinasang? Oilakai koperangkap tatatup kalu akiyo komo usokiyo?

⁶Oilakai komian doi kota aki nalolondong kalu molongol torompet alalo doi polobosian paloosano? Moolakai komeeng kokota kanakon susa, kalu TEMENENO aki nakirime?

⁷TEMENENO Moinakatandak Tuuno aki nalakukene kolobo moaki tokita luwedoi Naniat doi sasaibino konabi, Napala-palaleani.

⁸Kalu kai singa ngaaton, indekai komoaki namatakut? Kalu kai TEMENENO Moinakatandak Tuuno basilingan, indekai komoaki nabiok tukon aki napelenggene Kona teteba?

⁹Pelenggene naiya doi mian-mian modungol doi kamali Mesir tukon Asdod, “Pototongi doi bunggul-bunggono potikunggon ko Samaria, tukon palaatikanggene konggabutan babasal tukon bapakisaawan moilakukukon inadaa.”

¹⁰TEMENENO bantile, “Mian-mianoo ontokiyo konapokamali-kamali doiya tolongo luwedoi barang-barang yanila molaate pakisaayo luwedoi kekerasan. Tukon kai yanila aki kai natoyo lakukene kokajujuran.

¹¹Tobikon doiya konapolano naikon musu kepuunge bai konapopalatahan minanas, tukon yanila nakamali-kamali tirampok.

¹²Buno meeng komian padagai momalaat koidan tolongo meeng kopatalo koaino kai tolongo meeng kopatolo konadomba tolingaino molapamo singa sokuwo, bunomokai koidan, tolongo soisik tolong naikon komototinggal luwedoi modungoliyo ko Samaria diabudodoo mosanaang-sanaang banggogolong doi natampat mooloan momonondok.”

¹³TEMENENO Mian Bisa Mobabasal Konakuasa tukon Moinakatandak Tuuno bantile, “Palaatikanggene diabudodoo, tukon ingotiikene Yakub naturunan.

¹⁴ Dooloyo doo Yaku ukume ko Israel mianno sabab nalalim. Yaku naikon manase kobalabaan-balabaan doi Betel. Samba kobalabaan bundu-bunduno linoto tobikon natuwong doi buta.

¹⁵Bonua-bonua doi tempo nakumelonan tukon kobonua-bonua tadean doi tempo pital naikon Yaku manase. Bonua-bonua mobinubungai tukon panggis naikon molombo; saibino kobonua mobabasal naikon manas.