Read Banggai AMOS 5 Bible Online

AMOS 5 - Banggai bible

AMOS 5

¹NDongoliyo he umat Israel! Yaku naikon manyanyikene komeeng konyanyian susaan motuuk doi komuyu:

²Israel moperawan bai otuwongo, yana akimo natubo koidan! Doi nabuta susuungo yana batadikenemo, akiyo komotombonio sulano nakokondong.

³TEMENENO Moinakatandak Tuuno bantile, “Meeng kokota doi Israel sumboliyo kosuludadu soloong komian, bai komo abali tolongo sakat; kota bailon sumboliyo sakat komian, komoabali baino sungulo.”

⁴TEMENENO bantile doi umat Israel, “Abalimo doiyaku, maka komuyu naikon tubo.

⁵Inai motaus doi Bersyeba sulano bakaleda. Inai mounggoliyo Yaku doi Betel sabab komo dungoliyo kota doo naikon biningkat doi masakukonan.”

⁶Abalimo doi TEMENENO, maka komuyu naikon tubo. Kalu komuyu aki poabali doi Yana, Yana naikon lubat buno aung molanda tukon suayo kabus ko Israel mianno. Doi Betel akiyo ko meeng komian kai momoola posoiyo doaungoo.

⁷Silakamo komuyu, komuyu mopasekene kokaadilan tukon pakisayo komian nahak!

⁸ TEMENENO komokubaiyo kobituwon-bituwon pauno doi dapang — bituwon pauno Balantik tukon bituwon pauno Kartika. Yana boliiyo kalipokan teali madialan, tukon kooloyo teali popook; paisu luwedoi tobun kinundongikon Yana doi butatina. Komo lakukene saibino doiya Kosambuno doiyamo TEMENENO.

⁹Yana akabuse komian berkuasa tukon konapopertahan.

¹⁰Komuyu mosikitene komian motantange konaakiyonan kokaadilan tukon basilingan mokana doi pangadilan lalomo.

¹¹Komuyu pipiike komian motalalais tukon kona gandum komuyu rampase. Tobikon doiya komuyu naikon aki podungol doi mubonua-bonua lalomo momonondok, molapamo komuyu kubaiyo. Komuyu naikon aki pomonginum anggur luwedoi anggur asi-asino komuyu mosakakene.

¹²Yaku toiyo komukulokisan babasal tuuno tukon bulaa kona kadaang komulalim. Komuyu pipiike komian monondok; komuyu matalima tambo tukon sodiikene komian motalalais nalinakukanggon tukon aki naadil doi pangadilan.

¹³Sabab domu kakabaidoo, maka komian mopandoi pikikene tadukai naaki ndabiok doi tempo molokis mopokakana doiya.

¹⁴Balausahamo kai mokubai monondokan tukon inai mokubai lokis, sulano komuyu tubo. Maka TEMENENO Mian Bisa Mobabasal Konakuasa naikon tutuu dungol doi antara komuyu bunokai pobantilano.

¹⁵Mosikitene komo lokis, kilakene komonondok tukon kenggele kokaadilan. Moolakai TEMENENO naikon mamasikene komian-mian mototinggal luwedoi bangsa Israel.

¹⁶TEMENENO Mian Bisa Mobabasal Konakuasa bantile, “Kokota doi loloon-loloon, komian naikon mandaung tukon monggoe sabab susah. Ode sasaibino kopatani naikon inuang sulano naturut kokil polaing komian-mian motinambo sulano namandaunggene komian mate.

¹⁷Doi sasaibino koanggur asino, komian naikon mandaung sabab Yaku lubat tukon ukume komuyu. Yaku TEMENENO, lapamo basilingan.”

¹⁸Bisa silakamo komuyu morindukene ko TEMENENO naoloyo! Oila kototuuk doi oloyo doo doi komuyu? Oloyo doo tolongo babunokon oloyo mokalipookan, bolikon oloyo momadialan motuuk doi komuyu.

¹⁹Konabunoan buno mian modampasene kobutongo luwedoi singa, bai pososuunggene koberuang. Kai buno mian momule doi nabonua tukon kolimano batumbakene doi beton maka binda nasokuwo!

²⁰Ko TEMENENO Naoloyo takainomo lubatene kokalipoakanan, bolikon madialan — oloyo momol tuuno.

²¹ Ko TEMENENO bantile, “Yaku mosikitene tukon toluwe kalu Yaku kitayo kopolamekanano kopoagama!

²²Kalu komuyu mababa sosubakon gandum, Yaku aki naikon momatalima. Yaku aki Kuyase matalima muiyayon-iyayon momala-malanak komuyu mososubakene doi Yaku salaku sosubakon podamean.

²³Tademo kopomanyanyian mokubaiyo bangol komian; Yaku aki kuyase mondongolii komumaengganano komukasapi.

²⁴Tadukai muberusaha sulano kokaadilan lomba buno paisu, tukon kajujuran buno paisu batango moaki namomotuul.

²⁵ He umat Israel, doi tempo Yaku babayo komuyu lolodoi padang lalomo sangkapolono kotaun konakalumbit, Yaku aki kumonuntut mosinosubakon tukon sosubakon luwedoi komuyu.

²⁶Bai diabudodoo komuyu sosubaiyo ko Sakut komuyu moanggene potomundo, tukon Kewan, iyayon komuyu mokubaiyo ilah. Tobikon doiya timbalang-timbalang molapamo komuyu kubayo sio poakute susumuyu.

²⁷Kalukai Yaku sakukene komuyu doi meeng kotano molobian modoon luwedoi Damsyik. Yaku TEMENENO mosinumbuikon Mian Bisa Mobabasal Konakuasa lapamo basilingan.”