Read Banggai AMOS 7 Bible Online

AMOS 7 - Banggai bible

AMOS 7

¹Yaku malaat meeng kobatokitaan luwedoi TEMENENO Moinakatandak Tuuno. Yaku kitayo Yana mopasitakayo meeng kotambuno kobetek doi tempo komian nabapatolan bulung motuuk doi tomundo, tukon tambuno tubo kobulung boolu koidan.

²Betek-betekoo kabi nakaane kabus sasaibino kolobo motubo doi buta. Maka yaku bantile, “TEMENENO Moinakatandak Tuuno, ompuniyo Komu umat! Yanila tolongo soisik tuuno tukon muyuk, bulandokai yanila momoola balaanggon?”

³TEMENENO boliyo Konatetel tukon bantile, “Domukinibadoo aki naikon nateali.”

⁴Yaku malaat meeng kobatokitaan koidan luwedoi TEMENENO Moinakatandak Tuuno. Yaku kitayo Yana daano mobala-balasadia sulano naukume Kona umat tukon aung. Doaungoo dalepe kabus kondalangon doi buta taikon tukon tambuuno mosua mokopul koasi.

⁵Yaku bantile, “Oh TEMENENO Moinakatandak Tuuno, tadeiyomokai doaungoo! Komuumat popoisik tukon muyuko, bulaandokai yanila moola bataanggon?”

⁶TEMENENO boliyo Kona tetel koidan tukon bantile, “Naiya kai aki naikon nateali.”

⁷Yaku malaat meeng kobatokitaan bailon luwedoi TEMENENO. Kukitayo Yana kokondong doi meeng kobeton bibilo mokinubai tukon mogunakanggene koalos pongukur moloyos tuuno. Doilima-No Yana taniyo koalos pongukur sulano nakitayo oilakai dobentongoo moloyos kai aki.

⁸Yana masadai doi yaku, “Oila komu kinita Amos?” Yaku timbiliyo, “Alos pongukur moloyos tuuno, TEMENENO.” Maka TEMENENO bantile, “Yaku mapake alos pongukur nia sulano natudoikene baikon Dakuumat buno beton moaki namoloyos. Yaku aki naikon mobaliiyo Dakuumat koidan, Yaku tantumo naikon moukume yanila.

⁹Tampat-tampat Israel naturunan mopakeo napobakaledaan naikon minanaso. Ko Israel mianno natampat-tampat moliyous naikon linubango. Yaku naikon lopuwomo ko Tomundo Yerobeam nakaturunan.”

¹⁰Amazia imam doi Betel, kirime konalapuran nia doi Yerobeam tomundo Israel, “Amos daanon pomeenggon tukon rayat molawane ko Tomundo. Nabatilan-bantilan moderenge naikon korayat naikon kabaiyo natano nia manas.

¹¹Yana bantile baikon Tomundo naikon mate doi polobosian lalomo tukon Israel mianno tantumo inakate doi masakukonan, modoon luwedoi natano susuungo.”

¹²Maka Amazia bantile doi Amos, “He Nabi, mulemo doi Yehuda! Mongotunggul indaa. Sodiyomo yanila komo beena tempo doi koo!

¹³Inamo koidan mongotunggul doi Betel. Kota nia inalaas tuuk tomundo, tukon tampat bakaledaan dobangsado.”

¹⁴Amos timbiliyo, “Yaku bolikon nabi tolongo balimang. Konabisaan yaku popiala iyayon tukon mopupui ara saono.

¹⁵Bai TEMENENO alayo yaku luwedoi kubalimangan, tukon sumboliyo yaku pelenggene Konateteba doi Israel mianno.

¹⁶Tobikon doiya ndongoliiyokai ko TEMENENO nabinantil doi koo. Sebab ikoo larange yaku mongotunggul motantaange kobangsa Israel.

¹⁷TEMENENO bantile baikon komuboloki teali balolowa doi kota loloon-loloono, tukon komupau-pau inakate doi polobosian lalomo. Komubuta naikon inobos-obos doi mian bailon, tukon ikoo susuumu naikon mate doi mian natano moaki natingonio ko TEMENENO. Podungoli Israel motantu naikon inakut doi masakukonan, moodoon luwedoi natano susuungo.”