Read Banggai AMOS 9 Bible Online

AMOS 9 - Banggai bible

AMOS 9

¹Yaku kitayo ko TEMENENO kokondong lolani kobalabaan. Yana beekene naparentah nia, “Bobokiyo kokobukuan kosudongo mopobosoli-pobosolii doi Ku Bonua sulano kogandariano natounggat. Lubongiikenekai dosudong-sudongoo doi mian-mian oluno bunggono. Yanila moaki namate naikon kuakateo doi polobosian lalomo. Akiyo komeeng komian momoola dambasene kobutongo, akiyo komeeng komian kai naikon moluput.

²Maukai napoberusaha doi mau mate nadunia, yaku naikon laate yanila. Maukai yanila liba doi timbu, Yaku naikon obulusene yanila luwe indaa.

³Kalu yanila basookon doi Bunggul Karmel bunggono, Yaku naikon unggoliyo tukon lakoyo yanila. Kalu yanila basokon doi tobun lalomo dumbakan Yaku naikon parentayo kobindana babasal doi tobun sulano naakatiyo yanila.

⁴Kalu yanila musuh tawane, Yaku naikon parentayo sulano yanila napoinakate. Yaku bapunia sulano kuakabuse yanila, tukon aki naikon tomboniyo yanila.”

⁵Dunia inggot tukon komodungoliyo yanila susah, sabab TEMENENO Moinakatandak Tuuno tukon Mobabasal Konakuasa singgilemo konoanoila. Buno Nil Paisunobatango bundok tukon mooti bunomo kai yanila liba maka otuwong.

⁶TEMENENO kekendenge Kona bonua moodoon doi dapang, doi buta bunggono Yana pasange kotimbu salaku bola, tukon paisu doi tobun Yana kundongikene doi buta tina, komolakukene sasaibino doiya Kosambuno doiyamo TEMENENO!

⁷TEMENENO bantil, “He umat Israel, Yaku palatikanggene ko Sudan mianno pokakana buno Yaku mopalatikanggene komuyu. Yaku lapamo babayo ko Filistin mianno luwedoi Kereta tukon Siria mianno luwedoi Kir pokakana buno Yaku mobabayo komuyu luwedoi Mesir.

⁸Yaku, TEMENENO Moinakatandak Tuuno, daanon papatekene ko Israel nabatomundoan mobaladosa nia, tukon Yaku naikon akiyenggene luwedoi buta bunggono. Bai Yakub nakaturunan aki sasaibino naikon Kuakabuse. Yaku, TEMENENO molapamo basilingan.

⁹Yaku naikon beena parentah tukon tapise kobangsa Israel buno mian motapise kogamdum doi nakeapan lalomo. Sulano naalase sasaibino moakiyo kotakoso doi antara yanila, Yaku naikon derenge yanila doi antara bangsa-bangsa.

¹⁰Komian-mian baladosa doi antara Ku-umat bantile, ‘Mian Bisa aki naikon sodiikene kita nakanakon kasusahan.’ Bai, kona tutuwan yanila naikon inakate doi polobosian lalomo.”

¹¹ TEMENENO bantile, “Naikon laate kotempono Yaku kindedeke Daud nabatomundoan. Diabudodoo dobatomundoanoo lapamo teali buno bonua motolubang. Bai kona beton-benton naikon Yaku kindedeke tukon Yaku bangune koidan tobikon nateali buno doi lolukonoo.

¹²Israel mianno naikon kuasaiyomo kotano Edom modaano kolabino tukon sasaibino kobangsa mololukoo kongguna. Yaku TEMENENO, lapamo basilingan tukon Yaku naikon kubaiyo kolanggedoo.”

¹³TEMENENO bantile, “Naikon laate kotempono kogandum tubo buno mosobit tobikon kotempo bapupuian akiyo kona tade-tadean. Anggur batango naikon tubo mosobit tosuungi tobikon komian naikon banggadudul mokubai anggur paisuno. Anggur Paisuno naikon tulotulo luwedoi bunggul-bunggul tukon lomba luwedoi bunggul-bunggul.

¹⁴Yaku naikon tealikene Daku umat Israel abali monondok. Yanila naikon bangune koidan konapo kota-kota molapamo manas, maka yanila naikon dungol indaa. Yanila naikon sakaiyo kona anggur asi-asino, tukon inume kona anggur. Yanila naikon masakakon pasakai, tukon kaane kohasilo.

¹⁵Yaku naikon abese Daku umat doi tano molapamo Kubeekene doi yanila. Yanila aki naikon nakinubut koidan luwe indaa. Yaku TEMENENO Mian Bisa lapamo basilingan.”