Read Banggai OBAJA 1 Bible Online

OBAJA 1 - Banggai bible

OBAJA 1

¹ Naiyamo Obaja naramalan; yana pelenggene ko TEMENENO Moinakatandak Tuuno nateteba tentang kobangsa Edom: TEMENENO lapamo kirime Kona pobatiikon doi bangsa-bangsa, tukon kita lapamo molongol teteba yana mobabayo buno naia, “Balasadiamo kai popolobosi! Maimo nda lengget lobosio ko Edom.”

²Tukon doi Edom, TEMENENO bantile, “Ikoo kukubaiyo molooyu tobikon sasaibino kobangsa totulaikon.

³Ikoo totipu luwedoi noamu nababanggaalan. Komu Ibukota pokakana kobungko batu momoonggol, komu dungulan bungko bunggono motatandak. Tobikon doiya komuyu pikikene, ‘Inde komo moola motuenge Yaku?’

⁴Maukai mukubaiyo komubonua pokakana konatatandak kotomisi rajawali natelea, tukon pokakana konakatandak kobituwon-bituwon pauno doi timbu, bai ikoo pasti Yaku otuwonggon.

⁵Pondikuk kai parampok molubat doi popook tempono, tolongo mangala konainiyas. Komian mobapupui anggur doi asi, sidutu yanila mangabos bubula kosaono. Bai ikoo kabus mumusuh-musuh sapuwe.

⁶He Esau nakaturunan, Ikoo pinalesa tukon mubuat motosookon kai morinampas.

⁷Komu musu-musu okoliyo ikoo, tukon siakayo ikoo luwedoi mutano. Ikoo musobat-sobat lungguikon, komian mupokaangganan totulaikon. Yanila masadaikene tentang kobutomu, ‘Dia budodoo inaando domupandoiyamo?’

⁸Doi oloyodoo Kuhukumano ko Edom, nomian-miano mopandoi Yaku akabuuno. Tukon sasaibino yanila namotoijan naikon lapus, akiyo konabekas.

⁹Sasaibino kopojuang luwedoi Teman naikon Kuododiiyo, tukon sasaibino kosuludadu Edom naikon mate.”

¹⁰“Ikoo todudul komu nggimaliiyamo koutus-utusomu Yakub nakaturunan tobikon doiya ikoo naikon inakate, tukon komian sosiboliiyo ikoo popuson koloonu.

¹¹Ikoo kokondong doinadodonan doi tempo komusuh namanasano ko Yerusalem tataapono tukon yanila lungguiyomo dokotadoo. Ikoo naimobiok doi tempo akutano sasaibino kobuat doi Yerusalem tukon doi napoobosikanano.

¹²Aki namungkin ikoo mosanaanggene ko Yehuda miano nanasib mosoe tukon tedesene doi utusomu naoloyodoo matean. Aki teali ikoo babanggaal doi tempo yana susa.

¹³Aki napantas ikoo mousakiyo Dakuumat nakota, tukon pelekio komian modaanoon mosakisaa, tukon koidan komuyu ndukuke konapobuat doi oloyo nasolanoo!

¹⁴ Aki nasio ikoo kokondong doi liasan, sulano mudagaiyo komian-mian daano dampasene kobutonggo luwedoi musuh, kabai salakanggene yanila doi namusuh doi oloyo yanila kanakon kosusaan.”

¹⁵“Bisa, lolanimo kooloyono, Yaku, TEMENENO, adiliyo kobangsa. Oila ko Edom nalinakukanggon naikon sinobolikon doi yana. Yana naikon rasakanggene koidan oila komolapamo yana kubayo.

¹⁶Doi Kubunggul bunggono momoliyous Kuumat lapamo monginum-inuman mopomalunggenemo konaukuman. Bai komoininum motuuk doi bangsa-bangsa nia doi buta nia lobian koidan konamosopotan. Ukumanoo yanila aki napomoola dedenggene. Yanila sio nainume polong kabus, doibundu yanila naikon kabus akio konabakas.”

¹⁷“Bai doi Bunggul Sion, naikon daano komosalamat, tukondoo bunggulo teali tampat motanggalas tuuk doi Yaku. Maka Yakub nakaturunan naikon abali alayo yanila nabuta pusaka.

¹⁸Daku umat Israel naikon buno aung mosuayo Esau nakaturunan, buno aung mosuayo kabus kolimbut doi asi. Akiyo komeeng komian kai luwedoi Esau nakaturunan naikon moluput. Yaku, TEMENENO lapamo basilingan!

¹⁹Yehuda taikon lalom komiano naikon dungoliyo ko Edom. Mian-mian moluwedoi bunggul taikon doi talise naikon lungguiyomo kotano Filistin. Benyamin benseno naikon dungoliyo ko Gilead, tukon Israel Kuumat naikon kuasaiyo posapoon ko Efraim tukon Samaria.

²⁰Israel doi lembet komianoo naikon abali luwedoi masakukonan tukon dudukiyomo ko Fenisia polongo doi Zarfat. Yerusalem Mian-miano mo sinakukon doi Sardis, naikon abali tukon alayo kota-kota doi Yehuda taalikon lalom.

²¹Modungoliyo ko Yerusalem morame naikon lobosio ko Edom tukon lungguiyomo. Maka Yaku TEMENENO naikon maparentah buno tomundo.”