Read Banggai YUNUS 1 Bible Online

YUNUS 1 - Banggai bible

YUNUS 1

¹ Daano kooloyo meeng ko TEMENENO basilingan doi Yunus, Amitai napau.

²Nabantilano, “Tausokai doi Niniwe, dokota babasaloo sulano muancame, sabab yaku toiyo baikon komodungoliyo lokis tuuno.”

³Bai Yunus tolongo ampakon doi lipu bailon tuuk dedenggene ko TEMENENO. Yana taus doi Yope tukon posunggene kokapal mo motaus doi Sepanyol. Sambuno lapa beale kopobeal naampakonan, yana lakito doi kapaloo, maka talabut polaing komo balimang doi kapaloo motaus doi Sepanyol, tuuk modedenggene ko TEMENENO.

⁴Yunus obulus doi tampat mo doibilit tuuno tukon moolo idoo maka yana tombosokono. Lapa doiya TEMENENO lubatene kosokoi doi tobun bunggono, maka teali kosokoi makausang, mo pakapuung doi kapaloo sampe adukon manas. Saibino mobalimang doi kapalo matakut tuuno tukon wokon-wokon makabi tulung, suwe-suwele doi nailah-ilah. Sulano naatadeo kosilakaan koyolan, yanila sakukene kokapal namuatan doi tobun lalomo.

⁶Doi tempo dokapitengo kapal yana obulus doibilit, yana posunggene Yunus idoo daanon moolo. Maka yana bantile, “Bulaando ikoo moola moolo nakaadaania mobunonia! Ayo bangun! Basambeangkai doi muilah tuuk makabi tulung. Tadubanggonkai naikon seseange doi kita sulano aki ndasilaka.”

⁷Sambuno lapa Yunus tukon dokapitenoo liba doi bungkuk, saibino komobalimang doi kapaloo bantile doi yanila tulano. “Maimo, nda bacabut undi sulano ndatoiyo indee komo salah tobikon kita kanakon silakaan nia!” Yanila cabutemo koundi, maka Yunus sambuno komo kana.

⁸Maka yanila bantile doi Yunus, “Bisamokai ikoo komo lubatene nasilakaan nia? Ikoo luwedoi yaa? Bangsa indee? Bulaando ikoo modaano dimbaa?”

⁹Yunus timbiliyo, “Yaku Ibrani mianno. Yaku sosubaiyo ko TEMENENO, Mian Bisa doi surgaa, mo pasitakayo ko tobun tukon buta.”

¹⁰Salataa lapa doiya yana basalitakenemo bulaando kona usaha kona dambasano kobutongo luwedoi TEMENENO. Salataa yanila lengelemo, maka sasaibino komo balimang doi kapaloo yanila teali matakut tuuno koidan tukon bantile doi yana, “Lokis tuuno komukakabai doo!”

¹¹Boabus kitaan dosokoidoo pololakono tubo-tuboi kona makansangan, maka komo balimang doi kapaloo sadaiyo yana, “Oila komai linakukon doikoo sulano nasokoi nia natade?”

¹²Yunus timbiliyo, “Posakukenemo yaku doi tobun lalomo, tantu nasokoi nia naikon tade. Sabab diabudodoo yaku toiyo, baikon yakumo kona sabab sokoi sampe nasokoi nia momakansang tepakomuyu.”

¹³Bai saibino mobalimang doi kapaloo daanon yanila mokokobukuan molimbate kapaldoo doi tina. Bai do sokoi doo pololokon makansang koidan tobikon yanila nausaha akiyo kona totuuk.

¹⁴Tobikon doiya yanila masadai doi TEMENENO, “Oh TEMENENO, kami kabiyo inaikai mai silaka sabab kami alayomo komian naansaang moakiyo konakinubai musala doi kami. Oh TEMENENO, Ikoo lapamo lakukene oila Komu inias.”

¹⁵Maka yanila sakukene Yunus doi tobun lalomo. Maka dosokoi doo tade konamakansangan.

¹⁶Saibino mobalimang doi kapaloo teali matakut tuuno doi TEMENENO, tukon sambuno yanila daanomo doi buta tina, yanila mososubakon sosubakon tukon berjanji bulabulaa kolangge doi TEMENENO.

¹⁷ Sambuno lapa doiya ko TEMENENO lubatene komeeng koikan babasal molemese Yunus. Maka Yunus dungolo doi ikanoo tiano lalomo tolu kooloyo tolu kopook kona kalumbit.