Read Banggai BANGAITAN 1 Bible Online

BANGAITAN 1 - Banggai bible

BANGAITAN 1

¹Doi tanggal meeng bituwon koluano doi taun koluano lalomo sambuno lapa kobangsa Israel otinggale ko Mesir ko TEMENENO basilingan doi Musa doi TEMENENO Na Sandung lalomo doi Sinai Padango moluas. Konabantilano,

²“Ikoo tukon Harun sio poaite sasaibino ko Israel miano, pokokonoi konapuli tukon nakaluargaa suwe-suwele. Tulisemo sasaibino komala-malane sambuno

³kona umur moluakolonomo lobian kotaun momoola teali suludadu. Yanila sio natinulis luwedoi napasukan suwe-suwele.

⁴Luwedoi sasamba kobenseno makabimokai mian mokatuaiyo kopulino mo tomboniiyo komuyu.”

⁵Naiyamo kosambuno komian mo linilik luwedoi mian mo tomboniiyo Musa tukon Harun tukon komo teali katua suwe-suwele kobenseno, doiyamo: [BENSENO] — [KATUA] Ruben — Elizur Syedeur napau Simeon — Selumiel Zurisyadai napau Yehuda — Nahason Aminadab napau Isakhar — Nataneel Zuar napau Zebulon — Eliab Helon napau Efraim — Elisama Amihud napau Manasye — Gamaliel Pedazur napau Benyamin — Abidan Gideoni napau Dan — Ahiezer Amisyadai napau Asyer — Pagiel Okhran napau Gad — Elyasaf Rehuel napau Naftali — Ahira Enan napau

¹⁷Tukon domianoo mosongulo lua motomboniiyo, Musa tukon Harun

¹⁸sumboliiyo sasaibino komian napototongi doi tanggal meeng bituwon koluano, maka konapoturunan sinusun mololoi puli-puli modaano doi sasamba kobensenoila. Sasaibino komala-malane moluakolono lobian kotaun kona umur tinulis tukon inait.

¹⁹Pokakana ko TEMENENO napinarentakon. Sasaibino doiya Musa lakukanggene doi Sinai Padango moluas.

²⁰Komala-malane molua kolono lobian kotaun kona umur momoola teali suludadu, tinulis kosambuno mololoi tukon nakaluargaa, tambuun doi Ruben, Yakub napau langgongo polong tukon Naftali. Koaitoila doiyamo: [BENSENO] — [KOMIAN AITO] Ruben — 46.500 Simeon — 59.300 Gad — 45.650 Yehuda — 74.600 Isakhar — 54.400 Zebulon — 57.400 Efraim — 40.500 Manasye — 32.200 Benyamin — 35.400 Dan — 62.700 Asyer — 41.500 Naftali — 53.400 Sasaibino: — 603.550

⁴⁷Ko Lewi miano aki natinulis posinggat-singgat tukon bense-benseno bailon,

⁴⁸sabab ko TEMENENO lapamo bantile doi Musa,

⁴⁹“Doi tempo mutilisano komian sambuno momoola teali suludadu, ko Lewi miano aki namoola tinulis.

⁵⁰Sumboliiyo yanila nauluse Dakusandung tukon sasaibino kololongguno. Konapai limang doiyamo motanggunge Daku Sandung tukon lolongguno polong mouluse. Yanila sio nabasandung doi napotikunggonan.

⁵¹Kalu naikon komuyu biyol, ko Lewi mianodoo sio nabiyele Dakusandung maka nakonoikene koidan doi sasamba kotampat basandungan mo boolu. Sangalaasan yanila, indee miano tolong komo loolaniyo do Sandungoo sio nainukum mate.

⁵²Ko Israel miano bailon sio napo kekendenge konapoo sandung sio nabadaang kotambuno, meeng komian doi nakolompok lalomo suwe-suwele doi potikunggon kona bandera susuungo.

⁵³Bai ko Lewi miano sio nabasandung doi potikunggon Dakusandung. Yanila sio natotooliyo sulano naakiyo komian mo loolaniyo, sulano naaki namangaanikene kunggimal tukon moukume ko Israel miano.”

⁵⁴Maka ko Israel miano lakukanggene sasaibino ko TEMENENO napinarentahkon doi Musa.