Read Banggai BANGAITAN 10 Bible Online

BANGAITAN 10 - Banggai bible

BANGAITAN 10

¹TEMENENO bantile doi Musa,

²“Mokubaimo lua kotorompet mo luwedoi Suasa motinutuk tuuk pouwang rayat mopototongi kai tuuk po sumbolii napoluwe.

³Kalu loluakon pinuuk kinobulusan, koalatino sasaibino komian sio na pototongi motikume Daku Sandung tataapono salaano.

⁴Bai kalu meeng tolong komo pinuuk, koalatino tongo katua-katua komo sio napototongi doi potikunggon ikoo.

⁵Kalu trompet pinuuk inidan-idan, doiya kopaloosano benseno-benseno komo basandung doi tambikon oloyo nasumbotan sio naluwe.

⁶Kalu pinuuk kina-kinapalus tuuk koluano luunggon, maka ko benseno-benseno doi tambikon Lalom sio naluwe. Jadi koalalo mo palus-palus koaalatino komian sio naluwe.

⁷Sedangkan koalalo mo bulusan koalatino komian sio napototongi.

⁸Dotorompet-torompetoo komo puuke sio Harun napau-pau, moteali imam-imam. Doiyamo koaturano mo sio poloingiyo tuuk sidutu-posidutukon,

⁹Tukon kalu naikon komuyu polobosi doi mulipu sulano mupolitaanggene kobutomu motuuk doi mumusu mo molobosi, puukemo dotorompet-torompetoo. Maka Yaku, TEMENENO mu Mian Bisa naikon tulungiyo tukon salamatene komuyu luwedoi pomusu-musu.

¹⁰Koidan doi oloyo-oloyo polaba-labaan, doiyamo lamean-lamean Bituwon Boolu dan mulamean-lamean mo bailonggon, dotorompetoo sio napinuuk doi tempo pomososubakonan sosubakon mosinua tukon sosubakon podamean doiya-Ku. Maka Yaku naikon tulungiyo komuyu. Yakumo ko TEMENENO mu Mian Bisa.”

¹¹Doi taun koluano lalomo sambuno lapa ko bangsa Israel otinggale ko Mesir, doi tanggal luakolono bituwon koluano, libamo kobunom luwedoi TEMENENO Na Sandung bunggono.

¹²Maka ko Israel miano potutuundu molengget otinggale ko Sinai padang lalomo; tukon dobunomo tade salataa yanila polong doi Paran padang lalomo.

¹³Doiyamo kotumbe-tumbeno yanila naluwean luwedoi TEMENENO naparenta mololo doi Musa.

¹⁴Komo loolukon luwe talenga mosoop doi Yehuda nabandera pomeenggonan, pasukan tukon pasukan: Nahason, Aminadap napau katuaiyo Yehuda nabenseno nabarisan,

¹⁵Netaneel Zuar napau katuaiyo Isakhar nabenseno nabarisan,

¹⁶tukon Eliab Helon napau katuaiyo Zebulon nabenseno nabarisan.

¹⁷Maka ko TEMENENO Na Sandung linombo, tukon komo luwe maka natanggunge do Sandungoo doiyamo Gerson tukon Merari napuli.

¹⁸Doibundu luwemo kotalenga mosoop doi Ruben nabandera pomeenggonan, pasukan tukon pasukan: Elizur Zedeul napau katuaiyo Ruben nabenseno nabarisan,

¹⁹Selumiel Zulisyadai napau katuaiyo Simeon nabenseno nabarisan,

²⁰tukon Elyasaf Rehuel napau katuaiyo Gad nabenseno nabarisan.

²¹Lapamo doiya luwemo ko Kehat miano motanggunge kolangge-langge mo moliyous. Kalu naikon yanila polong doi lipu basandungan bailon, ko TEMENENO Na Sandung kinonoikono koidan.

²²Doibundu tuundu kotalenga mosoop doi Efraim nabenseno nabandera pomeenggonan pasukan tukon pasukan: Elisama Amihud napau katuaiyo Efraim nabenseno nabarisan,

²³Gamaliel Pedazur napau katuaiyo Manasye nabenseno nabarisan

²⁴tukon Abidan Gideoni napau katuaiyo Benyamin nabenseno nabarisan.

²⁵Doibundu luwemo kotalenga mo soop doi Dan nabenseno nabandera pomeenggonan. Yanila daanokai padagai doi bundu sasaibino kopomeenggonan. Yanila ambakon pasukan tukon pasukan: Ahiezer Amisyadai napau katuaiyo Dan nabenseno nabarisan.

²⁶Pagiel Okhran napau katuaiyo Asyer nabenseno nabarisan,

²⁷tukon Ahira Enan napau katuaiyo Naftali nabenseno nabarisan.

²⁸Doiyamo konapotoindunan ko Israel miano nabarisan, pasukan tukon pasukan, sasamba luunggon napo luwe mobiyol.

²⁹Musa bantile doi nadaok, Hobab Rehuel napau Midian miano, “Kami naikon luwemo doi lipu TEMENENO mo bantilemo naikon mobineekon doi kami. TEMENENO lapamo dandikene komo monondok doi Israel miano. Jadi loingiyomo, kami naikon mokubai namondokan doikoo.”

³⁰Hobab timbiliyo, “Talima kaseh, bai yaku yase moabali doi kulipu susuunggu.”

³¹“Inaimo mootinggale kami,” Musa timbiliyo, “ikoo moola teali potudoikon loloon doi kami, sabab ikoo toiyo inaando konda molaan basandung doi padang lalomo.

³²Kalu ikoo malaing, maka sasaibino komo monondok TEMENENO mo lakukene doi kami, naikon kami lakukene koidan doikoo.”

³³Sambuno lapa kobangsa Israel otinggale ko Sinai, bunggo TEMENENO nadungolan, yanila ambakon tolu kooloyo konakalumbit. TEMENENO na Peti Perjanjian sidutu binaba loolukoniyo yanila sulano namoumbolii lipu basandungan doi yanila.

³⁴Kalu naikon yanila luwemo luwedoi napo lipu basandunganoo, kalu oloyo ko TEMENENO nabunom sidutu daano doi bunggonoila.

³⁵ Sasamba luunggon do Petidoo Perjanjian naikon nabiniyolan, Musa bantile, “Kokondongo, oh TEMENENO, poalaasenemo komu musuh sampe komian mo mosikitene ikoo dambasene kobutongo.”

³⁶Tukon sasamba luunggon do Peti Perjanjianoo napolong doi lipu tadean, Musa bantile, “Abalimokai, oh TEMENENO, komuseang doi lolloono ko Israel miano.”