Read Banggai BANGAITAN 11 Bible Online

BANGAITAN 11 - Banggai bible

BANGAITAN 11

¹Daano kooloyo meeng dobangsadoo tambuuno mobantil-bantil doi TEMENENO tentang doi napo susa-susaan. Salataa lengele dona pobantilan-bantilanoo, TEMENENO teali nggimal tukon olubatene kobilat doi yanila. Dobilatoo lala doi antara yanila tukon mokopul kosoobos moluwedoi napo basandungan.

²Domian-mianoo nggele-nggeleamon mangkabi tulung doi Musa. Salataa Musa sambeang doi TEMENENO, maka dobilatoo poso.

³Sabab dokadadianoo, maka dolipudoo sinombuikono Tabera, sabab idoomo ko TEMENENO nabilat nanggunggulepanan doi tanga-tanganoila.

⁴Doi ambakonan lalomo doi Israel mianodoo daano koidan komian mo lulubaton mo malaing. Yaniladoo yase tuuno makaan sail, tukon ko Israel miano koidan tambuuno mobantil-bantil. Yanila nabantilano, “Ah, soba nadaano kosail motuuk doi kita!

⁵Kita neneke koikan ndakinaan mobadaang doi Mesir, kootimun, samangka, prei, babang memela tukon babang moute!

⁶Budodoiya kabuso kobukunggita sabab akiyono ko kinaan bailon tongo manna konda kinita.”

⁷ Domannadoo kondondoongo pokakana kolangge batu-batuno mo poipoisik, kotambongo moute moku-mokuni.

⁸ Doi popook domannadoo tuwong posinggat-singgat kosisibu paisuno doi lipu basandunganoo. Dowa-dowa komian ambakon dombaa-dombulo sulano namopototongikon, maka nagilinge kai natumbuwo teali tarigu, maka nakubaiyo teali sinanga matimbuk mo manipi. Kotamiso buno sinanga molinalas tukon zaitun lisisono.

¹⁰Musa lengele do Israel mianodoo moliit, tukon yanila kokondong memeeng kotambuno doi napo basandungan tataapono salaano. Maka tosuungimo ko TEMENENO nanggimalan sampe Musa susah.

¹¹Maka yana bantilo doi TEMENENO, “Bulaando ikoo mokubaiyo susah yaku bunonaiya? Oilakai ikoo aki musanaang doiyaku? Bulaando ikoo momonggidagaikene namono-monondok sasaibino domianoo doiyaku?

¹²Kai yaku komo tiananggene kai mosuunge doyanila nia! Bulaando ikoo mosumboliiyo yaku moteali buno meeng kopeteenak mo malambin pau lumboon, sampe yaku sio kuteenake yanila bangga-banggadudul popolonggon doi lipu ikoo modandikene doi napo turunan?

¹³Kitayokai yanila mangkabi sail momeenggon. Tukon inaandokai daku moumboliikanano sail domianoo sasaibino?

¹⁴Aki kudalame motanggunge doparentadoo mo babasal todudul motoong dolanggedoo doiyaku!

¹⁵Kalu TEMENENO banggadudul kubaiyo yaku buno naiya, mamaasikanakukai; tadukai muakateyaku namosobit sulano naakimo koidan kumotoupi nasakisaawan nia.”

¹⁶Maka ko TEMENENO bantile doi Musa, “Pototongikenemokai kopitu kolono kotoko-toko masyarakat doi Israeldoo miano mo inakui salaku mokatuaiyo kobangsa. Babayomo yanila doi salaanggu doi Ku Sandung lalomo, maka musumboliiyo napo kokondong idoo doi lisukomu.

¹⁷Yaku naikon bulus maka kuposilingonii tukon ikoo doi lipudoo, tukon soobos luwedoi kuasa mo lapamo yaku beekene doikoo, naikon yaku beekene doi yanila. Maka moolamokai yanila natomboniiyo ikoo motanggunge kodagaiyano nabangsa nia, tukon akimo mutanggunge susuumu.

¹⁸Budodoiya bantilemo naiya doi bangsadoo: Koliyousiyomo kobutomuyu tuuk namodowa; komuyu naikon makaan sail. TEMENENO lengelemo kopokokiilan tukon bantilan-bantilan baikon komuyu moiyase makaan sail, tukon baikon kopotuboan lobian monondok doi tempo podaanoan doi Mesir. Budodoiya TEMENENO naikon beenamo komuyu sail, tukon komuyu malaato momakaan.

¹⁹Komuyu naikon momakaan aki natongo meeng kai lua kooloyo konakalumbit, kai lima kooloyo kai songulo kooloyo, tukon koidan aki natongo luakolono kooloyo,

²⁰bai meeng kobituwon moono konakalumbit kopo makaanan, polong komuyu teali seselon tukon tolu-toluwe. Dolanggedoo teali sabab komuyu lapamo akiyenggene ko TEMENENO mo daano doi komuyu. Tukon koidan sabab komuyu lapamo kokiil doi salaano tukon bantil-bantil baikon komuyu lapamo otinggale ko tano Mesir.”

²¹Maka Musa bantile doi TEMENENO, “Bangsa yakumo katuaiyo nia koaito 600.000 komian. Bulaando ikoo momoola bantile baikon ikoo naikon beena yanila sail mobadaang meeng kobituwon konakalumbit?

²²Inaandokai konadaanoan kosapi tukon domba mobuno doiya konakadaang mosio natinembel sulano napo bobosul? Oilakai sasaibino koikan doi tobun sukup teali pongokonii doi yanila?”

²³TEMENENO timbiliyo, “Oilakai daku kakuasaan daano konatolongan. Ikoo naikon mosobito mukitayo oilakai daku binantiloo bisa teali kai aki!”

²⁴Maka tobuato Musa tukon polongikenemo doi bangsadoo oila komo lapamo TEMENENO bantile. Musa pototongikene kopitu kolono kokatua-katua tukon sumboliiyo yanila kokondong doi TEMENENO Na Sandung potikunggon.

²⁵Maka ko TEMENENO bulus doi bunom lalomo tukon basilingan doi Musa, TEMENENO alayo kosoobos luwedoi kuasa mo lapamo beekene doi Musa tukon beekenemo doi mo pitukolonodoo kokatua-katua. Salataa do TEMENENO doo na Roh bulus doi yanila, tambuuno yanila mobaibantil buno nabi, bai aki namalumbit.

²⁶Lua doi antara mopitukolono nia kokatua, Eldad tukon Medad, dungol doi basandungan tukon aki naampakon posinggat-singgat tukon kobailon doi TEMENENO Na Sandung. Doi basandunganoo obulus ko Roh doi yanila, tukon yanila luaila tambuuno mobantil-bantil buno nabi.

²⁷Maka meeng kopaumalane tobuat bulen mopailukene doi Musa oila komo teali doi Eldad tukon Medad.

²⁸Yosua Nun napau, mo lapamo tomboniiyo Musa salataa doi napaumalanean, bantile doi Musa, “Sumboliiyomo yanila natade, Pak!”

²⁹Musa timbiliyo, “Bulaando ikoo mopikikanaku? Yaku takainomo moinikene sulano ko TEMENENO nabeekene kona Roh doi sasaibino konabangsa, tukon kubaiyo yanila sasaibino teali nabi!”

³⁰Maka Musa abalimo doi basandungan polaing domo pitu kolonodoo ko katua-katua doi Israel.

³¹Sosinggoton ko TEMENENO olubatene kombombuul moluwe doi tobun; dombombuuloo babayo kotomisi-tomisi peleet mobenga-benga pepeende tuuno, polong meeng kometer doi buta bunggono. Yanila benga-benga doi basandunganoo bunggono polong kona odoonan bubula kokilometer donapokopilian.

³²Doi meeng kooloyodoo meeng kopopook tukon meeng kooloyo koidan, komian sanaang momalako tomisi peleet. Memeeng komian malako kalu nasoisikan sololoon kokilogram. Dotomisi-tomisidoo yanila abese doi potikunggon kobasandunganoo sulano nateali motuul.

³³Kalu daano mobadaang kosail tuuk mokinaan, TEMENENO teali nggimoliiyo doi bangsadoo tukon lubatene komeeng kobalaa doi antara yanila.

³⁴Maka dolipudoo sinombuikon “Bakibulan Modokoan”, sabab idoomo kona kinibulan komian momate sabab namodokoan.

³⁵Luwe idoo dobangsadoo biyol doi daerah Hazelot, maka basandung doi lipudoo.