Read Banggai BANGAITAN 12 Bible Online

BANGAITAN 12 - Banggai bible

BANGAITAN 12

¹Musa pokilamo komeeng koboine doi Kus teali naboloki, tukon dolanggedoo Miryam tukon Harun tealikene alasan sulano natotulaiyo Musa.

²Yanila bantile, “Oilakai tongo lolo doi Musa ko TEMENENO nabasilingan? Bolikonkai lolo doi kita yana moola basilingan?” TEMENENO lengele oila konapoo binantil.

³Musa daano meeng komian mo monondok konoano, lobioniiyo sasaibino komian mo tubo doi dunia nia.

⁴Sosinggot ko TEMENENO bantile doi Musa, Harun tukon Miryam, “Komuyu tolu komuyu poampakono doi Ku Sandung.” Maka yanila ampakon idoo

⁵tukon TEMENENO bulus doi bunom sudongo lalomo. TEMENENO kokondong doi Na Sandung tataapono tukon uange Harun maka Miryam. Domianoo molua maju,

⁶tukon ko TEMENENO bantile, “Lengelemo Daku bantilan-bantilania! Kalu doi antara komuyu daano komeeng konabi, Yaku nyatakanggene ko butonggu doi yana doi pokita-pokita lalomo, tukon pobasilingonii yana doi monii lalomo.

⁷ Bai aki nabuno doiya tukon Daku peleleani Musa. Yanamo komian motulu-tulutan doi antara Daku mian.

⁸Tukon yaku basilingan tukon yana posasalaan, tukon tontong tukon aki nabaino sosombot. Mau kai nalapamo kitayo kodudusonggu! Bulando komuyu barani tumbokiiyo Musa daku atadoo?”

⁹TEMENENO nggimoliiyo tuuno doi yanila luaila, tukon yana ampakon.

¹⁰Salataa dobunomo otinggale ko TEMENENO Sandung, tokitamo Miryam kanakono takatol mo silakaiyo komian; kokulito moute buno kapos. Salataa Harun mbalenge Miryam tukon kitayo baikon yana kanakono doseseloo,

¹¹bantilo yana doi Musa, “Tulungiyaku Tuan, inai batadikene kami sinakisaa sabab mai dosa kami mokubaiyo doimai longasan lalomo.

¹²Inai batadikene yana nateali buno pau lumboon mosinuung matemo, tukon kosailo mulaimo boowan.”

¹³Maka Musa uang doi TEMENENO, “Oh Mian Bisa, yaku kabiyo, tangalinggene yana!”

¹⁴ TEMENENO timbiliyo, “Kalu andeno koduduso tamano tupeiyo, bolikonkai pitu kooloyo kona kalumbit yana sio natanggunge komaano? Saakene yana luwedoi basandungan pitu kooloyo kona kalumbit tukon naapa doiya yana moolamo usok koi-koidan.”

¹⁵Maka Miryam tinobuatono luwedoi basandungan konakalumbit pitu kooloyo, tukon doi bangsadoo aki nabiyol luwe idoo polong Miryam minolakon abali doi basandunganoo.

¹⁶Doi bundu yanila otinggalemo ko Hazwlot tukon basandung doi Paran padang lalomo.