Read Banggai BANGAITAN 13 Bible Online

BANGAITAN 13 - Banggai bible

BANGAITAN 13

¹TEMENENO bantile doi Musa,

²“Luwedoi sasamba ko Israel benseno utusemo komeeng komian mo luwedoi lembet miano nakatua-katua sulano namata-matayo kotano Kanaan yaku mo beekene doi Israel miano.”

³Pokokonoi tukon do Mian Bisa doo naparentah, Musa utuse yanila luwedoi Paran padang lalomo. Sasaibino domianoo daanomokai Israel miano komoteali katua-katua. [BENSENO] — [KATUA] Ruben — Syamua Zakul napau Simeon — Safat Holi napau Yehuda — Kaleb Yefune napau Isakhar — Yigal Yusuf napau Efraim — Hosea Nun napau Benyamin — Palti Rafu napau Zebulon — Gadiel Sodi napau Manasye — Gadi Susi napau Dan — Amiel Gemali napau Asyer — Setul Mikhael napau Naftali — Nahbi Wofsi napau Gad — Guel Makhi napau

¹⁶Doiyamo komata-mata Musa moutuse sulano namata-mataiyo dolipudoo. Hosea Nun napau Musa soboliyo kosambuno Yosua.

¹⁷Salataa Musa sumboliiyo yanila lengget, yana beteteba doi yanila, “Poampakono doi lembet taalikon, potujuiyo tambikon lalom kotano Kanaan, maka pobanggadudul doi daerah mo bunggul-bunggul.

¹⁸Posolidikiyo bulaando dolipudoo, oilakai kotumbuno badaang kai soisik, oilakai yanila bukuan kai aki.

¹⁹Palesayomo oilakai dolipudoo monondok kai aki, tukon oilakai kotumbuno dungol doi desa-desa mo tobuka kai doi kota-kota lalomo mo pinagar betoon.

²⁰Ekeenggele konoamu. Kitayomo oilakai kotanono molumbang tukon badaang kokayung-kayungo. Inai motomilinggene mumule mababa soisik kokayung saono mo tubo indaa.” Doiya singgat kana koanggur tempono nasaowan.

²¹Maka tauso domianooila doi lembet tambikon tukon solidikiyo dolipudoo tambuun luwedoi Sin padang lalomo doi lalom sembeleng tambikon lembet polong doi kota Lehab, loolani kololoon doi Hamat.

²²Tumbe-tumbe yanila ampakon tambikon lalom dolipudoo tukon polong doi kota Hebron, doi Ahiman miano nalipu dungolan, Sesai tukon Talmai, Enak nakaturunan. Hebron kinokondong pitu kotaun akiyoon kokota Zoan nadaano doi Mesir.

²³Maka polongokai yanila doi Eskol Pepelako. Idoo yanila mapatol meeng koanggur pangano mo motoong, sampe sio natinanggung lua komian. Yanila mababa koidan bubula kodelima saono tukon ara saono.

²⁴Dolipudoo sinombuikon Eskol Pepelako, sabab doangguroo pangano saono Israel miano komo patele idoo.

²⁵Sambuno lapa yanila selidikiyo dolipudoo sangkap kolono kooloyo konakalumbit, domata-matadoo abalimo,

²⁶tukon mebee lapuran doi Musa, Harun tukon sasaibino ko Israel miano modaano mo pototongi doi Kades, doi Paran padang lalomo. Yanila basalitakene oila komo lapamo yanila kitayo tukon otudoikene kokayung-kayung saono yanila mo kanggiyo.

²⁷Yanila nabantilano doi Musa, “Kami lapamo solidikiyo dolipudoo tukon kitayomo baikon kotanono kaasa tukon molumbang tukon naiyamo kosoisik kokayung-kayung saono molengget indaa.

²⁸Bai dolipudoo kotumbuno pobukuonii. Yanila nakota-kota pobbosolii tukon pinagar betoon. Tukon koidan, kami kitayo komian mo katurunan talenga indaa.

²⁹Ko Amalek miano dungol tambikon lalom doi lipudoo; Het miano, Yebus tukon Amori dungol doi daerah mo bunggul-bunggul; bai ko Kanaan miano dungoliyo kodaerah doi popupuson ko tobun bibilo doi popupuson ko Yordan Paisunobatango.”

³⁰Bai Kaleb tenangkanggene komian-mian noano mobantil-bantil doi Musa. Kaleb bantile, “Dolipudoo sio ndalobosiyo tukon kita lambase budodoiya koidan, sabab kita sukup konda bukuanan mo akalayo yanila.”

³¹Bai komian-mian mo abali tukon doi Kalebdoo bantile, “Aki, kita aki nda moola mo lobosiyo yanila. Dolipudoo tumbuno lobian kona bukuan tukon kita.”

³²Maka yanila babilitakenemo kosalita mo kala doi Israel miano tentang dolipudoo mo lapamo yanila mata-mataiyo. Yanila bantile, “Dolipudoo kulokis tuuno, mau dolipudoo tumbuno susuungo bai matakutene. Komian kami mo kitayo indaa bobosolii tuuno kobutongo.

³³ Tukon koidan kami kitayo ko mian mopokakana ko manusia lobo mobobosolii doiyamo Enak miano nakaturunan. Kalu pinokanakon kami tukon yanila, kami lasayo kami baino buno betek, tukon pastimo bunomodoiya yanila napangaanggon motuuk doi kami.”