Read Banggai BANGAITAN 14 Bible Online

BANGAITAN 14 - Banggai bible

BANGAITAN 14

¹Popupuson kopopook ko Israel miano nggele-nggeleamon tukon koki-kokiil.

²Yanila nggimoliiyo doi Musa tukon Harun tukon yanila bantile, “Tadukai ndamate doi Mesir kai doi padang lalomo nia! Tadumokai ndamato tolong!

³Tuuk oila ko TEMENENO mababayo kita doi lipudoo? Naikon kita mate doi polobosian tukon konda bolo-boloki maka ndapau-pau yanila tinaan. Tadukai nda abali doi Mesir!”

⁴Maka yanila pobantikon meeng maka bailon, “Tadukai ndamolilik meeng kokatua tukon nda abali doi Mesir!”

⁵Maka Musa tukon Harun somba doi sasaibino korayat salaano.

⁶Yosua Nun napau tukon Kaleb Yefune napau, lua doi antara domata-matadoo, siyake kona popakean kotandano susah.

⁷Yanila bantile doi sasaibino dorayatoo, “Dolipudoo kami mo selidikiyo deikon langge konamonondokan.

⁸Kalu ko TEMENENO pokokonoi doi kita, yana naikon babayo kita indaa tukon bekene dotanodoo mo kaasa tukon molumbang doi kita.

⁹ Inaimokai motombukiyo ko TEMENENO, tukon inai matakutene komian modungol doi lipudoo, sabab mumuda konda lungguyano yanila. Komo totooliyo yanila lapamo tinggale yanila, tukon ko TEMENENO lolainge kita. Jadi, inaimokai matakut.”

¹⁰Sasaibino korayat lubotiiyo yanila mo sakule batu namate. Bai sosinggot do mianoo kitayo ko TEMENENO laango motobuat doi Na Sandung bungkono.

¹¹TEMENENO bantile doi Musa, “Bulando kona kalumbit koidan namian nia natumbokiiyano Yaku? Polong oila kotempono yanila aki naiyase maangga doi nalawanano yaku, maukai nalapamo badaang kolangge-langge minasaindinggon yaku mokubaiyomo doi yanila?

¹²Yaku naikon lopuwo yanila tukon olubatene kosesel mo badonggiti. Bai ikoo naikon yaku tealikene tama luwedoi meeng ko bangsa molobian babasal tukon lobian kona bukuanan luwedoi yanila!”

¹³ Maka Musa bantile doi TEMENENO, “Oh TEMENENO, naikon ko Mesir miano lengele dolanggedoo! Bai tukon mu kuasa ikoo lapamo babayo kami tobuat luwedoi lipudoo,

¹⁴tukon yanila naikon basalitakene doi mian nalipu nia, molapamo lengele baikon Ikoo TEMENENO moloolainge kami. Yanila lapamo lengele koidan baikon ikoo okitakene kobutomu doi kami tempo tukon doi oloyo ikoo ambakon doi salaanggami doi bunom sudongo, tukon doi popook doi bilat sudongo lalomo.

¹⁵Kalu ikoo akateo sasaibino na mian nia, maka kobangsa-bangsa mo sidutumo molongol tentang Komutololongolanoo naikon bantilemo baikon

¹⁶Ikoo akateyomo komumian doi padang lalomo sabab akimo mumampu mobabayo yanila doi lipu mo lapamo ikoo dandikene.

¹⁷Sabab doiya, TEMENENO yaku kabiyo, okitakene komu kuasa doi kami tukon kubaiyomo oila komo lapamo ikoo dandikene. Ikoo lapamo bantile,

¹⁸ ‘Yaku TEMENENO, aki namosobit nggimal. Yaku tudoikene Daku seang tukon tulu-tulutanan molobi-lobian. Yaku ampuniyo komian mo baladosa tukon motumbokiiyo Yaku. Maukai nabunodoiya, koorang tua nakasalahan naikon Yaku balase doi napau-pau tukon natumbu-tumbu, polong doi nakaturunan kotoluno tukon kosanggapo.’

¹⁹Budodoiya, TEMENENO, ko nababasalan komumaasi tukon Ikoo tulu-tulutan doi mujanjidoo, yaku kabiyo, ampuniyomo namian nia nalalim pokakanamo ikoo molapamo ampuniyo yanila salataa konapo otinggalano kotano Mesir.”

²⁰Maka ko TEMENENO timbiliyo, “Monondoko, Yaku naikon ampuniyomo yanila pokakanamo komu kinabi.

²¹ Bai Yaku paladandi tuuk doi butonggu tukon demi Yaku motubo tukon balakuasa doi dunia nia,

²²baikon luwedoi mian-mian nia akiyo komeeng komiankai modaanoon motubo komo mongusoki ko lipu molapamo Yaku dandikene doi tumbunoila. Sabab akimo napo tulu-tulutan doiya-Ku, tukon banggadudul momeeng mosobaiyo Yaku. Padahal yanila lapamo kitayo kolaangonggu mo motontilang, tukon langge-langge mominasaindinggon Yaku molakukanggene doi Mesir tukon doi padang lalomo.

²³Aki! Yanila aki naikon namongusoki dolipudoo. Luwedoi antara yanila motumbokiiyo Yaku, akiyokai komeeng komian naikon momopiik dolipudoo.

²⁴ Bai aki nabunodoiya ikoo Kaleb Daku peleleani yana tataap tulu-tulutan doiyaku. Tobikon doiya Yaku naikon babayo yana doi lipu molapamo nausokiyo. Budodoiya ko Amalek miano tukon Kanaan miano dungol doi lipu nameseaanoo. Bai dodaerahdoo naikon teali Kaleb nakaturunan nalipu, Dakuatadoo. Modowa komuyu sio poabali tukon ampakon doi padang lalomo doi Minanga Akaba tambikon.”

²⁶TEMENENO bantile doi Musa tukon Harun,

²⁷“Polong oila kotempono domian-mianoo molokis nanggimalan motuuk doiyaku? Sasaibino yanila nabantil bantilan lapamo Kulengele.

²⁸Komuyu sio potimbiliyo yanila bunonaiya: TEMENENO bantile, ‘Yaku batotopi demi Yaku motubo baikon komuyu naikon Kukubaiyo pokakana kopobinatil doi salaanggu. Yaku, TEMENENO, lapamo basilingan.

²⁹ Sabab komuyu lapamo nggimal tuuk doiya-Ku. Tobikon doiya komuyu naikon mate, tukon pobajan-bajan sasabukono doi padang lalomo nia.

³⁰Sangalaasan Kaleb tukon Yosua, akiyo kai komeeng komian doi antara komuyu kona umur molua kolono kotaun lobian naikon komo mongusoki dolipudoo Yaku modandikene doi komuyu.

³¹Komuyu lapamo bantile baikon komu pau-pau naikon tinaan. Bai yanilamokai naikon Daku binaba doi lipu moaki poiyase, tukon dolipudoo naikon teali napolipu.

³²Baikai komuyu naikon mate doi padang lalomo nia.

³³ Sangkap kolono kotaun kona kalumbit komupau-pau naikon lausala doi padang lalomo. Sabab akimo potulu-tulutan, komupau-pau naikon sakisaa, polong komian mo tobindukon doi antara komuyu matemo.

³⁴Komuyu naikon tanggunge kopo dosa-dosa bailon sangkap kolono kotaun konakalumbit; meeng kotaun inait tuuk meeng kooloyo luwedoi sasamba nasangkap kolonoan kooloyo komuyu mopakeyo tuuk posolidikiyano dotanodoo. Komuyu naikon toiyo bulando kolasano kalu Yaku lawane komuyu!

³⁵Yaku batotopi baikon Yaku naikon lakukanggene dolanggedoo motuuk doi komuyu, mian molokis moposumokoli sulano tumbokiiyo Yaku. Doi padang lalomo nia komuyu sasaibino naikon mate. Yaku, TEMENENO, lapamo basilingan.’ ”

³⁶Komian-mian molapamo Musa utuse sulano nasolidikiyo dotanodoo, yanila abali mababa lapuran moaki nabisa tentang dolipudoo, tukon dolanggedoo mangaanikene ko Israel miano nggimoliiyo ko TEMENENO. Tobikon doiya ko TEMENENO ukume yanila sampe yanila mate kanakon sesel.

³⁸Luwedoi songulo lua komata-mata Yosua tukon Kaleb komo daano mo tubo.

³⁹Salataa Musa pelenggene ko TEMENENO nateteba doi bangsa Israel, dobangsadoo kokiil susah.

⁴⁰Modowakon kooloyono dowa-dowa tuuno, bato-batotobomo tabo yanila moliba doi bunggul bungkono. Yanila bantile, “Takainomo kami baladosamo. Bai dia budodoo kami batotobomo moampakon doi lipu molapamo TEMENENO tudoikene.”

⁴¹Bau Musa bantile, “Bulando komuyu budodoiya moiase lupaiyo ko TEMENENO naparentah? Komuyu naikon aki pountung!

⁴²Inaimo poampakon! Komuyu naikon musuh-musuh lungguiyo komuyu sabab ko TEMENENO aki nalolainge komuyu.

⁴³Doi tempo poposasalaanan ko Amelek miano tukon do Kanaan mianodoo, komuyu naikon mate doi polobosian lalomo. TEMENENO naikon aki nalolainge komuyu sabab komuyu aki poiyase doi yana.”

⁴⁴Bai do Israeldoo miano daano batetel koidan moampakon doi bunggul bungkukono, maukai Musa tukon Peti Perjanjian aki naotinggale dobasandunganoo.

⁴⁵Maka ko Amalek miano tukon Kanaan miano mo dungol indaa lobosiyo tukon lungguiyomo ko Israel miano tukon lelenggene yanila polong doi Horma.