Read Banggai BANGAITAN 16 Bible Online

BANGAITAN 16 - Banggai bible

BANGAITAN 16

¹ Korah Yizhar napau luwedoi Kehat miano, Lewi nabenseno, nggimal tuuk doi Musa. Tolu komian moluwedoi Ruben nabenseno tomboniiyo yana, doiyamo Datan, tukon Abiram Eliab napau-pau, tukon On Pelet napau, tukon doi 250 komian katuano motololongol mo linilik doi rayat.

³Yanila polaing-laing ampakon somba doi Musa tukon Harun tukon bantile, “Sukupo doiya, Musa! Sasaibino ko Israel miano inalaasanggon tuuk doi TEMENENO, tukon TEMENENO daano doi kita sasaibino tanga-tangano. Bai bulaando ikoo moaanggene kobutomu lobian tatandak luwedoi TEMENENO namian?”

⁴Lengele doiya, Musa somba doi tano tukon sambeang doi TEMENENO.

⁵Maka yana bantile doi Korah tukon napololaing-pololaing, “Modowa dodowa TEMENENO naikon tudoikene doi kita indee Konamian; tukon indee komiano komo inalaas doi Yana. Komian mo linilik naikon Yana moolakene mololaniyo Yana.

⁶Modowa dowa-dowa ikoo tukon sasaibino komu pololaing-pololaing sio namangala mangabosan-mangabosan bilat, natotuiyo tukon bilat balano tukon kamangian, tukon napo babayomo doi balabaan. Budodoiya kita naikon kitayo inde doi antara kita komo lapamo TEMENENO lilike. Sukupo doiya, eh Lewi miano!”

⁷

⁸Boobus koidan Musa bantile doi Korah, “Lengelekai, eh ko Lewi miano!

⁹Kai komuyu pikikene naiya langge poipoisik baikon ko Israel miano na Mian Bisa lilike komuyu luwedoi antara Israel miano sulano pomoola lolainge yana, tukon balimang doi Na Sandung, tukon balimang tuuk doi Israel miano tukon leleaniyo yanila?

¹⁰Ikoo, Korah, tukon sasaibino ko Lewi miano lapamo malaat dopongodotiidoo moluwedoi TEMENENO — tukon budodoiya komuyu palaluuwo poteali imam koidan!

¹¹Kalu ikoo tukon mupololaing-pololaing nggimal tuuk doi Harun, konabisaan komuyu tumbokiiyo ko TEMENENO!”

¹²Maka Musa monggiuanggene Datan tukon Abiram, bai yanila bantile, “Kami aki mai yase lubat!

¹³Kai akiyoon nasukup ikoo mo babayo kami tobuat luwedoi tano Mesir mo molumbangoo sulano muakateyomo kami doi padang lalomo nia? Siokai ikoo muparentayo kami koidan?

¹⁴konabisaan ikoo aki mubabayo kami doi tano mo molumbang, kai mobeena kami asi-asi tukon anggur-anggur asino moteali mai pusaka! Budodoiya ikoo yase motipuwo kami! Aki, kami aki mai yase lubat!”

¹⁵Musa nggimal tuuno tukon bantile doi TEMENENO, “TEMENENO, inaikai motalimayo konapoo sosubakon. Aki nabiasa yaku moolugiyo doi meengkai komian mo luwedoi yanila; tukon koidan mau natongo meeng kokeledaidoo aki nabiasa yaku mo alayo luwedoi yanila.”

¹⁶Maka Musa bantile doi Korah, “Lubato namodowa doi TEMENENO Na Sandung polaing ko 250 komu pololaing. Harun koidan naikon daano indaa. Komuyu sio pobabayo kopo mangabosan bilat suwe-suwele. Obosiyomo kamangian doilalomo, maka pososubakene doi TEMENENO.”

¹⁷

¹⁸Maka sasamba komian alayo kona bangabosan bilat, ontokiyomo tukon bilat balano tukon kamangian, maka kokondong doi TEMENENO Na Sandung tataapono polaing Musa tukon Harun.

¹⁹Doibundu Korah pototongikene sasaibino komian, tukon yanila kokondong posasalaan Musa tukon Harun doi TEMENENO Na Sandung tataapono. Sosinggoton sasaibino komian kitayo ko TEMENENO laango montotilang.

²⁰Maka ko TEMENENO bantile doi Musa tukon Harun,

²¹“Posaakonokai luwedoi mianoo; yaku iyasemo moakateyo yanila budodoiya koidan.”

²²Bai Musa tukon Harun somba maka sosubaiyo tukon bantile, “Oh Mian Bisa, ikoo komo beena tuboan doi sasaibino komo tubo. Kalu tongo meeng komian tolong komo baladosa, oilakai ikoo nggimoliiyo sasaibino komian?”

²³TEMENENO bantile doi Musa,

²⁴“Sumboliiyomo komian nasaakon luwedoi Korah nasandung-sandung, Datan tukon Abiram.”

²⁵Maka Musa tukon linolaing sasaibino kokatua-katua Israel, ampakon doi Datan tukon Abiram nadungolan.

²⁶Musa bantile doi Israel miano, “Posaakonokai luwedoi mian-miania molokis nasandung tukon inai posinggile konapo langge-langge. Kalu komuyu aki poloingiyo, komuyu naikon inakate pososinggat yanila sabab yanila nalalim-lalim.”

²⁷Maka do Israel mianodoo saakono luwedoi Korah, Datan tukon Abiram nasandung-sandung. Datan tukon Abiram tobuato tukon daano mokondong doi na sandung tataapono suwe-suwele, tukon napau-pau maka na boloki.

²⁸Maka Musa bantile, “Tukon naiya komuyu naikon toiyo baikon ko TEMENENO utusakumo sulano ku lakukanggene sasaibino naiya tukon baikon doiya bolikon kumongiasan susuunggu.

²⁹Kalu domianoo mate tukon mate biasa, akiyo koukuman oioila moluwedoi Mian Bisa, doiyamo kopaloosano ko TEMENENO aki nautuse yaku.

³⁰Bai kalu TEMENENO kubaiyo ko langge meeng mo akiyoon pobiasa lengele buunia, tukon kalu tabata ko buta sulano nalemese yanila tukon sasaibino yanila nalangge, sampe yanila usok danoon mo tubo, doi mian mate nadunia lalomo, komuyu potoiyomo baikon domian-mianoo tumbokiiyomo ko TEMENENO.”

³¹Soisoibiton salataa Musa alapayo kona basilinganan kobuta tambikon doi yanila tabata,

³²tukon lemesemo yanila tukon yanila nakaluargaa tukon sasaibino Korah napoloolaing, tukon sasaibino konapo buat.

³³Maka tongusokono yanila tubo-tubo doi mian mate nadunia lalomo tukon sasaibino konapokaluargaa. Buta mo motabatadoo tatutup koidan tukon yanila lapus banggadudul dunia mo lemesemo.

³⁴Sasaibino ko Israel miano modaano idoo dambasene kobutongo salataa lengele yanila monggeleamon, “Bulen! Naikon kita dunia lemesemo!”

³⁵Maka TEMENENO olubatene ko bilat mookopule ko 250 komian mo mososubakon dokamangianoo.

³⁶Maka TEMENENO bantile doi Musa,

³⁷“Sumboliiyomo Eleazar Imam Harun napau mobingkate kobangabosan-bangabosan bilat moluwedoi langge-langgedoo motosua labi-labino tukon tipasene koayong abuno doi lipu bailon, sabab dobangabosanoo bilat daano moliyous. Dobarang-barangoo doiyamo mian-mian molapamo inukum mate sabab nalalim nasosubakon. Dobarang-barangoo moliyous sabab lapamo sinosubakon doi TEMENENO salaano, sabab doiya sio natinutuk teali bisi-bisilo manipi tuuk palapis balabaan tonggulungo. Do langgedoo naikon buno pokakana kotondoon tuuk doi bangsa Israel.”

³⁸

³⁹Maka nalapa doiya Imam Eleazar alayo dobangabosan-bangabosan bilatoo tukon mosumbolii mian natutuke teali bisi-bisilo manipi tuuk palapis balabaan tonggulungo.

⁴⁰Doiya bunopokakana tondoon doi bangsa Israel baikon kalu sangalaasan Harun nakaturunan, akiyo komeeng komian moola lubat doi balabaan tuuk momosua kamangian doi TEMENENO. Mian mo lupaiyo do aturanoo naikon inakate pokakana Korah tukon napololaing-pololaing. Sasaibino doiya linaksanakanggon pokakana ko TEMENENO napinarentakon doi Eleazar lolo doi Musa.

⁴¹Modowakon kooloyo sasaibino ko Israel miano nggimo-nggimoliiyo Musa tukon Harun. Yanila bantile, “Komuyu akateyomo ko TEMENENO namian.”

⁴²Daano yanila pototongi molobosiyo Musa tukon Harun, yanila mbaleng doi TEMENENO Na Sandung tukon kitayo kobunom motombukiyo do Sandungoo, maka tokitamo ko TEMENENO laango nadaanoan.

⁴³Musa tukon Harun ampakon doi TEMENENO Sandung lalomo,

⁴⁴maka TEMENENO bantile doi Musa,

⁴⁵“Saakono luwedoi mianoo. Yaku naikon akateyomo yanila doi tampatoo koidan!” Yanila luaila somba mososubaiyo,

⁴⁶maka Musa bantile doi Harun, “Alayomo komubangabosan bilat, ontokiyomo tukon bilat balano moluwedoi balabaan tukon obosiyo kamangian doi bungkono. Babayomo mosobit doi mian tukon kubaiyomo kobakolobokiyan ompuniyano kolalim tuuk doi yanila. Mosobit! TEMENENO nanggimalan bukal-bukal tukon kosesel tambuno.”

⁴⁷Harun lakukanggene oila Musa na binantil. Yana bulen doi mian badaang tanga-tangano mo daano pototongi tukon tambuuno kanakon sesel. Maka Harun mangabos kamangian doi bilat bungkono, tukon lakukanggene ko bakolobokiyan ompuniyano kolalim tuuk doi mian.

⁴⁸Seseloo tademo, tukon Harun yana daano doi antara mian modanoon mo tubo tukon momatemo.

⁴⁹Komo mate doi tempodoo daano 14.700 komian, aki natongusokon yanila momate doi Korah na molobosian lalomo.

⁵⁰Salataa doseseloo tademo, Harun abalimo doi Musa doi TEMENENO Na Sandung tataapono.