Read Banggai BANGAITAN 17 Bible Online

BANGAITAN 17 - Banggai bible

BANGAITAN 17

¹TEMENENO bantile doi Musa,

²“Sumboliiyomo ko Israel miano na beena ikoo songulo lua kotongkat, sasamba ko benseno meeng kotongkat, sio mokatuaiyo ko benseno komo salakanggene. Tulisekai kosambuno sasamba dokatuadoo doi natongkat,

³tukon Harun sambuno doi Lewi nabenseno natongkat. Sasamba komokatuaiyo ko benseno sio na suwe-suwele daano kotongkat.

⁴Babayomo dotongkat-tongkatoo doi ku Sandung tukon abesemo doi Peti Perjanjian salaano, tampat kubiasaan pososuung tukon komuyu.

⁵Mian yaku molilike kona tongkat naikon sopiimo. Tukon do kokubaidoo yaku naikon atadeyomo komian nabantilan mobanggadudul momenggon nggimoliiyo doi komuyu.”

⁶Langgedoo Musa pelenggene doi Israel miano. Maka komo katuaiyo yanila salaakanggene doi yana komeeng kotongkat tuuk doi sasamba komo katuaiyo kobenseno. Sasaibino daano songulo lua kotongkat, tukon Harun natongkat talaing idoo.

⁷Maka Musa abesemo dotongkat-tongkatoo doi TEMENENO Na Sandung lalomo doi Peti Perjanjian salaano.

⁸ Modowakon kooloyo, salataa Musa usok doi TEMENENO Sandung lalomo, yana kitayo baikon Harun na tongkat, doiyamo Lewi nabenseno natongkat, sopiimo. Dotongkatoo lendeimo, bungaimo tukon saokenemo koketapang saono momotuamo!

⁹Musa alayo sasaibino dotongkatoo maka natudoikene ko Israel miano. Yanila kitayo oila komo lapamo teali, maka sasamba ko katua alayo kona tongkat koi-koidan.

¹⁰Doibundu TEMENENO bantile doi Musa, “Abesemo Harun na tongkat koi-koidan doi Peti Perjanjian salaano. Dotongkatoo sio nainabos buno meeng kotondondoon doi Israel miano moiyase nggimal baikon yanila mate kalu yanila aki natade mo nggimal.”

¹¹Musa lakukanggene oilamo ko TEMENENO napinarentakon.

¹²Maka ko Israel miano bantile doi Musa, “Kalu buno doiya, silakamo kami! Kami naikon matemo!

¹³Kalu mian mo lolaniyo ko TEMENENO Sandung sio namate, maka akiyono komai moinian koidan!”