Read Banggai BANGAITAN 18 Bible Online

BANGAITAN 18 - Banggai bible

BANGAITAN 18

¹TEMENENO bantile doi Harun, “Ikoo, mupau-pau tukon Lewi miano sio tanggunge kokasalahan-kasalahan bailon mo teali doi Ku Sandung lalomo, bai tongo ikoo tukon mu pau-pau tolong komo sio natanggunge kokasalahan-kasalahan doi imam-imam na balimangan lalomo.

²Ko utus-utusomu, Lewi nabenseno, sio muusekene salaku potombonii doi limangano kolimang lalomo tukon mupau-pau nalimang.

³Lewi nabenseno sio napolimange konapolimang motuuk doi komuyu tukon limange konapolimang doi Ku Sandung, bai yanila aki namola loolaniyo kobalabaan kai singgile ko langge-langge mo moliyous doi Kombiang Moliyous. Kalu yanila lupaiyo doaturanoo, mau yanila maukai komuyu naikon mate.

⁴Yanila sio nabalimang posinggat-singgat tukon komuyu tukon lakukanggene kolimang-limang mopotaami tukon sasaibino kobaleleaniyan doi Ku Sandung lalomo, bai komo aki nabinee do limangoo, pinantan mobalimang posinggat komuyu.

⁵Tongo ikoo, Harun, tukon mupau-pau kai komo sio nalakukanggene kolimang doi Kombiang Moliyous tukon balabaan, sulano akimo Kunggimoliiyo ko bangsa Israel.

⁶Konabiasaan, Yaku lapamo lilike komu utus-utus Lewi miano moluwedoi antara bangsa Israel salaku sabeat tuuk doikoo. Yanila lapamo inalaas tuuk doi Yaku, sulano nameleleani doi Ku Sandung.

⁷Bai tongo ikoo tukon mupau-pau tolong komo moola ambakonggene kolimang salaku imam, doi sasaibino kolimang lalomo mo potaani tukon balabaan tukon oila komo talaat doi Kombiang Moliyous tuuno. Doiyamo komu limang, sabab yaku lapamo beena komuyu kedudukan salaku imam. Sasamba komian moakiyo konahak naikon inukum mate kalu yana loolaniyo dolangge-langgedoo moliyous.”

⁸TEMENENO bantile doi Musa, “Neneekemo! Sasaibino kososubakon motangalaas mo bineekon doi Yaku moaki na sinua daanokai koomu. Doiyamo komuobos mo lapamo tinantukon sidutu-posidutukon. Doiya Yaku beekene doi ikoo tukon doi mukaturunan.

⁹Luwedoi sosubakon-sosubakon mo moliyous tuuno moaki nasinua doi balabaan bungkono, kobailon nia daano mo tuuk koomu: Sosubakon mokinaan, sosubakon ompuniyano kolalim tukon sosubakon posoboli lugi. Sasaibino doiya sosubakon moliyous mo teali muobos tukon mu pau-pau naobos.

¹⁰Doiya daanokai moliyous doikoo, jadi sio po kaane doi tampat moliyous koidan. Tongo mala-malane komomoola kaane.

¹¹Sasaibino kososubakon motangalaas bailonggon ko Israel miano nasinosubakon doi Yaku, daanokai tuuk doikoo koidan. Yaku beena doikoo tukon doi mupau-pau mala-malaneno tukon boineno. Do aturanoo pinake tuuk sidutu-posidutukon. Sasamba komu anggota kaluargaa moaki namanggilit moola namakaan.

¹²Yaku beekonggonmiyu sasaibino komo monondok tuuno moluwedoi bapupuiyan tumbeno ko Israel miano mososubakene doiya-Ku sasamba kotaun, doiyamo zaitun lisisono, anggur paisuno tukon gandum.

¹³Sasaibino doiya daanokai koomu. Sasamba komu anggota kaluargaa moaki namanggilit moola namakaan.

¹⁴ Sasaibino kolangge doi tano Israel mo lapamo inalaasanggon tuuk doiya-Ku, daanokai motuuk doi komuyu.

¹⁵Sasaibino komo sosuung tumbe doi antara manusia maukai iyayon Israel miano mososubakene doiya-Ku, daanokai muobos. Bai komuyu sio potelese ko pau-pau langgongo, koidan iyayon mo pinantanggon napau mo tosuung tumbe.

¹⁶Kopau-pau sio natinolos doi tempo konapo umur meengo kobituwon. Koolino motinantukono tuuk doiya doiyamo lima kodoy suasa, mololoi angga mo pinake doi Ku Sandung.

¹⁷Bai sapi, domba tukon mbembe mo tosuung tumbe, aki namoola tinolos. Iyayon pinialadoo pantas tuuk doiya-Ku tukon sio nasinosubakon. Kundongiikene kosauno doi balabaan tukon suayomo koinakko salaku sosubakon. Koboono sanaanggene Konoanggu.

¹⁸Kosailo daanokai tuuk doikoo pokakana tukon kooyopo tukon banano bakalingano luwedoi sosubakon motinudoikon doiya-Ku.

¹⁹Tuuk sidutu-posidutukon, sasaibino kososubakon mo tangalaas Israel miano nabinaba doiya-Ku, Kubeekene doi komuyu tukon mupau-pau malaneno tukon boineno. Doaturanoo tataap sidutu-posidutukon tukon teali meeng koperjanjian mo aki namoola inakiyonggon antara yaku tukon ikoo tukon muketurunan.”

²⁰TEMENENO bantile koidan doi Harun, “Komuyu aki pomalaat pusaka oi-oila. Doi lipu yaku mojanjikenedoo akiyo komeeng kobuta tambuno mo teali mubuta. Yaku TEMENENO, daanokai muobos pusaka.”

²¹ TEMENENO nabantilano doi Harun, “Sasaibino ko Israel miano nasosubakon meeng koobos moinobos songulo yaku beekene doi Lewi miano. Doiyamo yanila napusaka oboso tuuk yanila nalimang doi Ku Sandung.

²²Ko Israel miano bailonggon akimo namoola koidan loolaniyo doSandungoo sulano yanila inai nalubatene kolalim tukon ukuman mate doi butongoila.

²³Tambuun budodoiya tongo Lewi miano komo moola uluse Daku Sandung tukon tanggunge kodagaiyano doi limangoo. Doaturanoo tapake koidan tuuk muketurunan polong sidutu-posidutukon. Ko Lewi miano akiyo konapo pusaka doi Israel,

²⁴sabab tuuk yanila napusaka oboso Yaku lapamo beekene sasaibino kososubakon motongobos songulo mo sinosubakon luwedoi Israel miano doiya-Ku salaku sabeat motangalaas. Doiyamo kosababpo tentang Lewi miano yaku bantile baikon yanila aki naikon namalaat obos pusaka doi Israel.”

²⁵TEMENENO sumboliiyo Musa

²⁶mopelenggene naparentah nia doi Lewi miano: Kalu naikon komuyu mantalima luwedoi Israel miano meeng kososubakon motongobos songulo TEMENENO mosalakanggene doi komuyu tuuk muobos, komuyu sio pobeena meeng koobos moinobos songulo doi TEMENENO tuuk musosubakon motangalaas.

²⁷Sosubakon motangalaasoo inaanggon pokakana tukon sosubakon gandum boolu tukon anggur paisuno moboolu.

²⁸Tukon buno doiya komuyukai sio pomososubakon tuuk sosubakon motangalaas doi TEMENENO kosoobos moluwedoi Israel miano nasosubakon meeng kososubakon moinobos songulo. Dososubakonoo motangalaas sio posalakanggene doi Imam Harun.

²⁹Beenamo obos mo monondok tuuno luwedoi oila kopo tinalima.

³⁰Salataa lapa komuyu salakanggene doobosoo, komuyu moola alayo kolabino, pokakana komeeng kopetani koidan moalayo oila komo totinggal salataa lapamo yana babayo konasosubakon.

³¹Dolabinodoo moola pokaane doi inaando tolong posinggat-singgat komu kaluarga, salaku tambo doi mubalimangan doi TEMENENO Sandung.

³²Komuyu aki posalah kalu komuyu kaane, asal konaobos mo monondok tuuno komuyu sosubakenemo doi TEMENENO. Inai mokanggilitiyo ko Israel miano nasosubakon tukon makaan meeng kolangge moluwedoi sosubakonoo kalu akiyoon konaobos mo monondok tuuno inalaasanggon tuuk doi TEMENENO. Kalu komuyu lupaiyo doparentahdoo, komuyu naikon mate.