Read Banggai BANGAITAN 19 Bible Online

BANGAITAN 19 - Banggai bible

BANGAITAN 19

¹TEMENENO parentahkene Musa tukon Harun

²sulano nabeekene naaturan-aturan nia doi bangsa Israel: Mangalamo meeng kosapi molukono memelah moakiyo kopakolo tukon akiyoon nabiasa pinake momatanggung lolokiton.

³Salakanggenemo dosapidoo doi Imam Eleazar, doiyayonoo sio nabinaba doi basandungan tonggulungo maka nakinolot doi imam salaano.

⁴Maka imam Eleazar sio namangala doiyayonoo sauno soisik tukon natiposiikene pitu luunggon doi TEMENENO Sandung salaano.

⁵Sasaibino doiyayonoo, tongusokon kokulito, sailo, sauno tukon kombongo sio nasinua doi imam salaano.

⁶Naapa doiya imam sio namangala soisik kokayung aras, meeng kohisop pangano tukon meeng koalos patolo memelah, maka nasakukene doi bilat lalomo sulano dosapidoo momemela namokopul.

⁷Doibundu imam sio nabusoiyo konapakean tukon namansau. Salataa lapa doiya yana moola usok doi basandungan lalomo, bai yana daano momanggilit polong doi oloyo nasosoopan.

⁸Mian mosuayo dosapidoo koidan sio nabusoiyo konapakean tukon namansau; yana koidan daano momanggilit polong doi oloyo nasosoopan.

⁹ Maka komeeng komian moaki namanggilit sio napototongikene dosapidoo abuno tukon naabese doi tampat mo bilisii doi basandungan tonggulungo. Doabudoo inabos idoo sulano ko Israel miano moola namapake tuuk mokubaiyan paisu pokoloboki bakiliyousian doi bangapusan lalim.

¹⁰Mian mo pototongikene dosapidoo abuno sio nabusoiyo konapakean, bai yana manggilit polong sosoop kooloyo. Doaturanoo tapake tuuk sidutu-posidutukon, mau mo tuuk doi Israel miano maukai motuuk doi imam mo lulubaton mo podungoliyomo yanila.

¹¹Mian mosinggile kobajan teali manggilit pitu kooloyo konakalumbit.

¹²Doi oloyo kotoluno tukon kopituno yana sio nakiliyousio kobutongo tukon paisu bakolobokiyan; maka nasodo yana bilisii. Bai kalu doi oloyo kotoluno tukon kopituno yana aki nakiliyousiyo kobutongo, yana tataap manggilit.

¹³Mian mosinggile kobajan tukon aki nakiliyousio kobutongo yanakai manggilit, sabab yana akiyoon nambinetokii tukon paisu bakolobokiyan. Yana kanggilitiyo ko TEMENENO Na Sandung tukon sabab doiya akimo koidan nainaanggon Mian Bisa Namian.

¹⁴Kalu daano komeeng komian momate doi meeng kosandung lalomo, indee miano tolong komo daano doi sandungoo lalomo kai mousok doi lalomo, teali manggilit pitu kooloyo konakalumbit.

¹⁵Sasaibino koselekan tukon tobunan mo akiyo kopokukupo koidan teali manggilit.

¹⁶Sasamba komian mo mosinggil mian mo mate inakate bajano, kai mo mate susuungo doi naasi, teali manggilit pitu kooloyo konakalumbit. Bunomo koidan komian mo mosinggil bakibulan kai mian mate bukuno.

¹⁷Tuuk kiliyousiano komian mo manggilito, sio naminangalakon soisik kosapi molukono memele abuno mo sinua tuuk bangompunian lalim. Doabudoo sio nainusokon doi meeng kotobunan lalomo, maka nabinee paisu mo inala luwedoi paisu mo lomba.

¹⁸Doi langge lalomo tumbe, doiyamo kalu daano komian mo mate doi sandung lalomo, mian mo aki namanggilit sio namangala meeng kohisop pangano, nasepeke doi paisu lalomodoo, maka natiposiiyo dosandungoo tukon sasaibino kolanggeno mo daano doi lalomo, tukon koidan komian-mian mo daano idoo. Doi langge koluano, doiyamo kalu daano komemeeng komian momosinggil bajan, bakibulan kai mian mate bukuno, mian mo aki namanggilit sio natiposiiyo domianoo mo manggilit tukon kokubai mo pokakana koidan.

¹⁹Yana sio natiposiiyo doi oloyo kotoluno tukon doi oloyo kopituno. Doi oloyo kopitunodoo lapamo lapa kobakolobokiyan pokoliyous domianoo mo manggilit. Domianoo sio nabusoiyo konapakean tukon namansau. Tambuun doi oloyo nasosoopan yana tealimo bilisii.

²⁰Komian mo teali manggilit tukon aki nabakoloboki pokoliyous butongo, yana tataap manggilit sabab akiyoon nambinetokii tukon paisu bakolobokiyan. Yana kanggilitiyo ko TEMENENO Na Sandung, tukon akimo koidan nainaanggon Mian Bisa Namian.

²¹Doaturanoo pinake tuuk sidutu-posidutukon. Komian mo motipas paisu bakolobokiyan koidan sio nabusoiyo konapakean, tukon mian mo kanakon dopaisudoo teali manggilit polong doi nasosoopan kooloyo.

²²Meeng kolangge domianoo mo manggilit mosinggile doiya manggilit tukon mian bailon nasinggile teali manggilit koidan polong doi oloyo nasosoopan.