Read Banggai BANGAITAN 20 Bible Online

BANGAITAN 20 - Banggai bible

BANGAITAN 20

¹Doi bituwon komeengo lalomo sasaibino ko Israel miano polongo doi Zin padang lalomo tukon tataapo doi Kades. Miryam mate tukon tinadino idoo.

² Doi meeng kotempo doi napo basandungan akiyono kopaisu. Maka lubato domian-mianoo motokuuniyo Musa tukon Harun

³tukon nggimal, “Tadukai mai mate doi TEMENENO salaano posinggat-singgat tukon koutus-utusonggami!

⁴Bulaando komuyu mobabayo kami doi padang lalomo nia? Oilakai sulano mai mate naimbaa posinggat-singgat tukon mai iyayon piniala?

⁵Oila konatotuuk komuyu mobabayo kami tobuat luwedoi Mesir doi tampat mo sakisaa nia moaki namoola sinakai oioila? Naimbaa akiyo kogandum, akiyo koara batango, anggur tukon delima. Mau paisu bai akiyo.”

⁶Musa tukon Harun taus badodoonggon mokita-kitayo domian-mianoo maka kokondong doi loolaniyan ko TEMENENO Sandung tataapono. Yanila somba, maka ko TEMENENO laango kadiolongiyo yanila.

⁷TEMENENO bantile doi Musa,

⁸“Alayomo kotongkat mo daano doi Peti Perjanjian salaano, maka ikoo tukon Harun sio mupototongikene sasaibino komian. Doi yanila sasaibino salaano, sio mubantile doi bunggul batu mo daano idoo sulano naosumbete kopaisu. Bunomo doiya komu tobuatanano kopaisu moluwedoi bunggo batudoo sulano korayat tukon yanila naiyayon piniala moola monginum.”

⁹Maka ampakono Musa moalayo dotongkatoo loingiyo ko TEMENENO napinarentakon.

¹⁰Musa tukon Harun pototongikene sasaibino komian doi bunggo batudoo salaano. Maka Musa bantile, “Polengele, eh komuyu mo nggimal! Oilakai sio mai osumbete kopaisu mo luwedoi bunggo batu nia tuuk doi komuyu?”

¹¹Maka Musa binggate dotongkatoo tukon umbasenemo doi bunggo batudoo lua luunggon. Maka lombamo kopaisu tukon makansang, sampe sasaibino komian tukon iyayon piniala moola monginum.

¹²Bai ko TEMENENO anukene Musa tukon Harun, konabantilano, “Sabab komuyu kinduung poanggaaku sulano kutalakanggene Daku kuasa mo moliyous doi bangsa Israel salaano komuyu mo katuaiyo, komuyu aki naikon popoloon tukon usok doi lipu Yaku mo paladandikenemo doi yanila.”

¹³Doiyamo doi Meriba paisuno uuno. Doi lipudoo ko Israel miano nggimoliiyo ko TEMENENO, tukon idoomo koidan ko TEMENENO natudoikanano Konakuasa mo moliyous doi bangsadoo.

¹⁴Doibundu luwedoi Kades, Musa makapatu bito-bito tuuk mangadap doi Tomundo Edom. Yanila bantile, “Kami luwedoi Israel bense-benseno mo daano konapotaamian utus tukon ku Tuan. Kutuan ugaate toiyo kosakisaa mo tepokiiyo kami.

¹⁵Kotumbunggami ampakon doi Mesir tukon dungol indaa doi taun-taun lalomo konakalumbit. Komai turunan tukon kami ko bangsa Mesir lailainggene,

¹⁶tukon kami bantil doi TEMENENO mangkabi tulung. Yana lengele komai bantilan tukon sumboliiyo komalaekat. Domalaekatoo katuaiyo kami tobuat luwedoi tano Mesir. Budodoiya kami daanomo doi Kades, meeng kokota doi napokalalatanan daku Tuan nawilayah.

¹⁷Kami kabiyo sulano daku Tuan nasanaang mopataikene kami mololoiyo nalipu nia. Kami tukon mai iyayon piniala aki naikon naisa luwedoi loloon tukon aki naikon nausok doi asi-asi kai anggur-anggur asino. Kami aki mai inume Tuan nabubung paisuno. Kami naikon tongo ambakon doi loloon babasal tukon kami tobuat luwedoi ku Tuan nadaerah.”

¹⁸Bai ko Edom miano timbiliyo, “Komuyu aki mai pataikene mololo doi mai wilayah. Kalu komuyu pakisaayo, kami naikon lobosiyo komuyu!”

¹⁹Ko Israel miano bantile, “Kami naikon ambakon loloiyo kololoon babasal, tukon kalu kami kai mai iyayon piniala inume kopoo paisu, kami naikon beale. Kami tongo yase lolo.”

²⁰Ko Edom miano bantile koidan, “Aki namoola!” Maka yanila tobuat tukon suludadu mo bukuan tuuk molobosiyo ko Israel miano.

²¹Maka ko Israel miano abali tukon moumbolii loloon bailon sabab ko Edom miano aki napataikene molinoloi konapodaerah.

²²Sasaibino ko Israel miano otinggalemo ko Kades maka polong doi bunggul Hor,

²³doi napokalalatanan ko Edom. Idoo TEMENENO bantile doi Musa tukon Harun,

²⁴“Harun aki naikon namongusoki kolipu mo lapamo Yaku dandikene doi bangsa Israel; yana naikon mate sabab komuyu looluakon lapamo tumbokiiyo Daku parentah doi loolanian ko Meriba paisuno uuno.

²⁵Babayomo Harun tukon Eleazar, napau, natolibo doi Bunggul Hor.

²⁶Idusemo Harun napakean tukon konoikenemo doi Eleazar. Harun naikon mate doi lipudoo.”

²⁷Musa lakukanggene oila ko TEMENENO napinalentahkon. Musa, Harun tukon Eleazar toliboiyo ko Bunggul Hor sasaibino komian sakisiiyo.

²⁸ Maka Musa idusemo Harun napakean tukon konoikenemo doi Eleazar. Doi bunggul bunggonodoo Harun matemo, doibundu Musa tukon Eleazar tokolu koidan.

²⁹Sasaibino komian lengele baikon Harun momatemo, tukon yanila sasaibino peleenggene yana tolu kolono kooloyo konakalumbit.