Read Banggai BANGAITAN 21 Bible Online

BANGAITAN 21 - Banggai bible

BANGAITAN 21

¹ Arad daano meeng kokota doi tambikon lalom kolipu Kanaan. Salataa kotomundo doikotadoo lengele baikon ko Israel miano lubat loloiyo kololoon Atarim, yana ampakono molobosiyo yanila tukon taane komoimoiya komian doi antara yaniladoo.

²Maka ko Israel miano baniat bunonaiya doi TEMENENO, “Kalu ikoo beena manaangan mo bisa doi kami doi bangsadoo, yanila tukon konapo kota-kota naikon kami manase pokabuson.”

³TEMENENO talimayo koIsrael miano nakakabi tukon tulungiyo yanila molungguiyo koKanaan miano. Maka ko Israel miano akateyomo do Kanaan mianodoo tukon konapo kota-kota, maka dotampatoo yanila sombuikene Horma.

⁴ Doibundu ko Israel miano otinggalemo ko Bunggul Hor, tukon loloiyo kololoon mopolong doi Akaba Minangano, tuuk moboilingiyo kodaerah Edom. Bai doi loloon tanga, dobangsadoo kabuso konakasabalan,

⁵ tukon nggimoliiyo ko Mian Bisa tukon Musa. Yanila bantile, “Bulaando ikoo mo babayo kami tobuat luwedoi Mesir? Kai ikoo naikon akateyo kami doi padang lalomo nia? Naimbaa akiyo kokinaan, tukon paisukai akiyo. Kami mangaelo tukon nakinaan nia molokis!”

⁶Maka ko TEMENENO olubatene kobinda-binda mo upason doi bangsadoo tanga-tangano. Badaang ko Israel miano momate dobinda-bindadoo mokakate.

⁷Maka dobangsadoo lubat mo mangadap doi Musa tukon bantile, “Kami baladosamo sabab nggimoliiyo ko TEMENENO tukon ikoo. Posambeango doi TEMENENO sulano nabinda-binda nia nadinoodoonggon doi kami.” Maka Musa sambeanggenemo dobangsadoo.

⁸Maka ko TEMENENO sumboliiyo Musa momokubai meeng kobinda moluwedoi tambaga tukon abesemo doi meeng kosudong tubono. Sasamba komian binda mo kakate, naikon tangalin kalu yana mbalenge do bindadoo moluwedoi tambaga.

⁹ Maka Musa mokubai binda moluwedoi tambaga tukon abesemo doi meeng kosudong tubono. Sasamba komian binda mokakate, moola tangalin kalu mbalenge dobinda tambagadoo.

¹⁰Ko Israel miano lenggeto koidan maka yanila basandung doi kota Obot.

¹¹Salataa lapa otinggale dolipudoo, yanila basandung doi Abarim natabaakan doi padang lalomo tambikon tolopot doi daerah Moab.

¹²Doi bundu yanila basandung doi Zered Pepelako.

¹³Luwe idoo yanila lengget koidan tukon basandung doi Arnon Paisunobatango doi padang lalomo sembeleng mo topopong doi Amori miano nawilayah. Doi Arnon Paisunobatango buno pokakana meeng kokalalatan antara daerah Moab miano tukon Amori miano nadaerah.

¹⁴Doiyamo kosababpo doi ‘TEMENENO na Buku Polobosiyan’ totulis: “.......Desa Waheb, doi daerah sufa tukon kopepelako-pepelako; Arnon Paisunobatango

¹⁵tukon doi pepelako-pepelako saukono doi bokulung mo topopong polong doi desa Ar tukon loloiyo kopokalalatan ko Moab miano nadaerah.”

¹⁶Luwe idoo yanila taus doi tampat mo sinombuikon Beer, koalatino bubung-bubung. Idoo ko TEMENENO biasa bantile doi Musa, “Sumboliiyomo komian napototongi; Yaku naikon beena paisu doi yanila.”

¹⁷Doi tempodoo kobangsa Israel mananikene nalagu nia, “Eh, bubung-bubung, obukalemo kopaisumu, kami naikon talimayomo tukon nyanyian.

¹⁸Bubung katua-katua mo kaliomo tukon sasaibino kobangsa katua-katuano yanila kaliyo tukon napo tongkat pusaka tukon koidan napo tongkat natotingoniian konapo kuasa.” Luwedoi padang lalomo yanila biyol doi Matana,

¹⁹tukon luwe idoo yanila taus doi Nahaliel, maka napo banggadudul doi Bamot,

²⁰doibundu yanila taus koidan doi Moab miano nadaerah, doi Bunggul Pisga adeno mo sasalaan doi padang lalomo.

²¹Maka kobangsa Israel makapatu bito-bito doi Sihon, tomundo Amori, tuuk mopelenggene nateteba nia,

²²“Pataikanggami mololoiyo Tuan nalipu. Kami tukon mai iyayon piniala aki naikon naisa luwedoi loloon tukon aki naikon mai usok doi asi-asi kai anggur asi-asino monginum bubung-bubung paisuno. Kami aki naikon mai isa doi loloon babasal polong domai tobuatan luwedoi ku Tuan nadaerah.”

²³Bai ko Tomundo Sihon aki napataikene ko Israel miano mololoiyo konalipu. Yana pototongikene konasuludadu maka ampakon doi Yahas doi padang lalomo tukon lobosiyo ko Israel miano idoo.

²⁴Bai dopolobosianoo lalomo badaang ko Amori suludaduno Israel miano moakateyo. Maka ko Israel miano dungoliyomo konapo daerah luwedoi Arnon Paisunobatango polong doi Yabok Paisunobatango, doiyamo napokalalatanan ko Amon miano nadaerah, sabab doi pokalalatananoo sukup tuuno kona pobadagaiyan.

²⁵Tukon bunodoiya ko Israel miano alayomo sasaibino ko Amori miano nakota, tongusokon ko Hesybon tukon sasaibino kokota poipoisik doi napoloolanikonan, maka yanila tataapo idoo.

²⁶Hesybon doiyamo kokotano Tomundo Sihon nadungolan. Yana biasa polobosi lawane ko tomundo Moab tukon lambase konadaerah polong konaodoonan ko Arnon Paisunobatango.

²⁷Doiyamo kosababpo kotalenga bakidung bunonaiya, “Lubatokai doi Hesybon, doi Tomundo Sihon nakota. Kami yase mokita nakota nia binangun tukon kiniboolu koidan.

²⁸ Tongo idan luunggon kokadadian luwedoi kota nia ko Sihon suludaduno mo buno bilat. Momanase ko kota Ar doi Moab, tukon kuasaiyomo kobunggo-bunggo doi popupuson ko Arnon.

²⁹Eh bangsa Moab, ikoo silaka! Komo sosubaiyo ko Kamos, ikoo mate! Komu Mian Bisa batadikonggon muteali mian modambas, komu boine teali tomundo Amori namian tinaan.

³⁰Bai budodoiya matemo konapo ketulanan, doi popupuson kololoon mo luwedoi Hesybon polong doi Dibon, luwedoi Nasyim polong doi Nofah loolani ko Medeba.”

³¹Tukon bunodoiyamo kobangsa Israel natataapan doi Amori miano nadaerah.

³²Doibundu Musa sumboliiyo komian moampakon moumbolii loloon mo monondok tuuno sulano nalobosiyo kokota Yaezer. Maka ko Israel miano lambasemo dokotadoo tukon kota mo poipoisik doi napoloolanikonan tukon sikayo ko Amori miano mo dungol indaa.

³³Lapadaiya ko Israel miano mangala loloon mo loloiyo ko Basan. Tomundo Og luwedoi Basan ambakon tukon nasuludadu sulano nalobosiyo ko Israel miano doi kota Edrei.

³⁴TEMENENO bantile doi Musa, “Inai matakut doi yana. Yaku naikon beena manaangan doi komuyu. Ikoo naikon lungguiyo yana, sasaibino konarayat tukon konalipu. Polakukenemo yana buno komo lapamo ikoo lakukanggene doi Tomundo Sihon mobaparentah doi Hesybon.”

³⁵Maka ko Israel miano lungguiyomo tukon akateyomo ko Tomundo Og, napau-pau tukon sasaibino konarayat; akiyono komo totinggal. Doibundu yanila dungoliyomo dolipudoo.