Read Banggai BANGAITAN 22 Bible Online

BANGAITAN 22 - Banggai bible

BANGAITAN 22

¹Bangsa Israel lenggeto koidan tukon basandung doi Moab seanono, doi daerah Yordan Paisunobatango, loolani kokota Yerikho.

²Salataa tomundo Moab kosambuno Balak, Zipor napau, ndongoliiyo bulaando kobangsa Israel molapamo lakukanggene ko Amori miano, tukon baikon dobangsa Israeldoo badaang koaito, yana bubusako tukon sasaibino konarayat.

⁴Maka ko Moab miano bantile doi Midian miano nakatua-katua, “Akimo namalumbit koidan domianoo mo lokis lemesemo sasaibino kolangge doi napoloolanikonan kita buno sapi mo makaan bulung doi padang.” Maka Tomundo Balak

⁵ makapatu bito-bito tuuk mouange Bileam, Beor napau mo dungol doi kota Petor loolani ko Efrat Paisunobatango doi daerah Amau. Yanila sinumbolii mopelenggene doi Bileam nateteba nia mo luwedoi Balak, “Potoiyokai, daano komeeng kobangsa mo lubat luwedoi Mesir: Komian-miano sasabul doiyayaa tukon batotobo momolobosi komai daerah.

⁶Yanila lobian kona bukuanan doi kami. Jadi, lubato! Kutukemo yanila tuuk yaku. Ugaate kami moola lungguiyo yanila tukon siikayo yanila luwedoi lipu nia. Sabab yaku anggayo ko mian ikoo mo balakaatiyo naikon malaat balakaat, tukon mian ikoo mo kutuke naikon malaat kutuk.”

⁷Maka ampakono sasaibino ko Moab miano nakatua-katua tukon do Midianoo tukon mababa tambo tuuk doi Bileam sulano yana naiyase kutuke ko Israel miano. Salataa yanila polong doi Bileam, yanila pelenggenemo doi yana Tomundo Balak nateteba.

⁸Bileam bantile doi yanila, “Pomoolomo naimbaa. Modowa naikon yaku popitoikene doi komuyu oila ko TEMENENO nabinantil doi yaku.” Maka sasaibino ko Moab miano nakatua-katua dungolo doi Bileam natampat.

⁹Maka ko Mian Bisa lubat doi Bileam tukon mansadai, “Indee komiano komo dungol doi mutampat, Bileam?”

¹⁰Bileam timbiliyo, “Yanila Tomundo Balak nabito-bito luwedoi Moab tuuk mobabilitakene

¹¹baikon meeng kobangsa mo lubat luwedoi Mesir lapamo tasabul doi yayaa. Tomundo Balak sumboliiyo yaku mokutuke dobangsadoo tuuk doi yana, sulano yana namoola lobosiyo tukon siikayo yanila.”

¹²Mian Bisa bantile doi Bileam, “Inai moampakon tukon domianooila, tukon inai mokutuke dobangsadoo, sabab yanila lapamo Yaku balakaatiyo.”

¹³Modowakon kooloyono Bileam bantile doi Balak nabito-bitodoo, “Pomulemo, TEMENENO aki napataikanaku moampakon tukon komuyu.”

¹⁴Maka yanila abalimo doi Balak tukon babilitakene doi yana baikon Bileam aki naiyase lubat polong yanila.

¹⁵Maka Balak kapatuwe konabito-bito mo lobian konabadaangan doi tumbedoo tukon molobian tatandak konasambu.

¹⁶Yanila pelenggene doi Bileam nateteba nia mo luwedoi Balak, “Yaku kabiyo tukon tutuu: lubato, tukon inai motolake.

¹⁷Yaku naikon beenggon tambo mo badaang tuuno, tukon lakukene oilamo tolong komu binantil. Lubato, tukon kutukemo dobangsadoo tuuk doiyaku.”

¹⁸Bai Bileam timbiliyo, “Maukai nasasaibino kosuasa tukon mosoni modaano doi Tomundo Balak nakamali lalomo nabinabeyakon doiyaku, yaku aki namoola lupaiyo ko TEMENENO naparentah, Mian Bisa yaku mososubaiyo. Maukai doi langge lalomo mo poipoisik yaku aki namoola motumbokiiyo.

¹⁹Bai konamonondokan pomoolomo naimbaa, pokakana dobito-bitodoo tumbeno napo kinubai. Yaku yase toiyo oilakai daanoon koidan ko TEMENENO nainiyas mobantile doiyaku.”

²⁰Dopopookoo ko Mian Bisa lubat doi Bileam tukon bantile, “Domianoo lubat tuuk mokabiyo ikoo ampakon tukon yanila. Jadi bato-batotobomo sulano muampakon. Bai lakukenemo tongo mo pinalentahkon doikoo.”

²¹Modowakon kooloyono Bileam tombongiiyo kona keledai, maka malaingo tukon sasaibino do Moab poo miano nakatua-katua.

²²Bai salataa Bileam ampakon, nggimalo komian Bisa. Daano Bileam molokitiyo konakeledai, linolaing doi lua konapeleleani, TEMENENO namalaekat kokondong doi loloon tangano tuuk mosembang-sembange yana.

²³Salataa yana kitayo komalaekat mo kokondong idoo tukon nabakoko, dokeledaidoo isa luwedoi loloon, tukon babelok doi asi. Bileam nanale dokeledaidoo tukon babayomo koidan doi loloon.

²⁴Doi bundu TEMENENO namalaekat kokondong tambikon doi loloon mo madipot, antara lua koasi anggur tukon sosuwele kobibilo pinagar batu.

²⁵Salataa dokeledaidoo kitayo ko TEMENENO namalaekat, yana lilit doi bibil sampe Bileam aino madipot doi pagar. Bileam nanale koidan dokeledaidoo.

²⁶Maka TEMENENO namalaekat biyol, tukon kokondong doi loloon molobian konamadipotan sampe akiyono kololoon sulano nalolo doi bobo kai bakalingano.

²⁷Salataa dokeledaidoo kitayo ko TEMENENO namalaekat, dokeledaidoo balubanggono. Bileam teali nggimal maka nanale dokeledaidoo tukon natongkat.

²⁸Maka ko TEMENENO tealikene dokeledaidoo namoola basilingan. Doiyayonoo nabantilano doi Bileam, “Oilamokai daku linakukon doi ku Tuan sampe Tuan nanale yaku polong tolu luunggon?”

²⁹Bileam timbiliyo, “Ikoo mae-maengganaku! Kalu andeno daano daku bakoko, tantukai yaku akatekomon!”

³⁰Dokeledaidoo timbiliyo, “Bolikonkai yaku nia Tuan nakeledai mo salataa buunia komu lokitiyano yaku? Kai biasamo yaku motumbokiiyo Tuan?” Bileam timbiliyo, “Aki.”

³¹Maka ko TEMENENO bukayo Bileam matano sulano namoola kitayo ko TEMENENO namalaekat mokokondong idoo tukon nabakoko.

³²TEMENENO namalaekat mansadai, “Bulaando ikoo moumbase komu keledai polong tolu luunggon? Yaku lubat semba-sembange ikoo, sabab yaku pikikene, aki namonondok kalu ikoo ampakon.

³³Doi tempo mukeledai nakitaano yaku, yana lilit polong tolu luunggon. Kalu aki tantu yaku akatekomon, bai dokeledaidoo yaku salamatene.”

³⁴Bileam timbiliyo, “Yaku baladosamo aki kutoiyo baikon Tuan mo kokondong doi loloon tangano tuuk mosembang-sembange yaku. Bai budodoiya kalu menurut Tuan napalaat aki namonondok yaku mo banggadudukene daku ampakonan nia, yaku naikon mulemo.”

³⁵Bai ko TEMENENO namalaekat bantile, “Malaingokai tukon domianoila. Bai ikoo tongo moola mobantile oila daku sinumboliikon mobantile.” Maka Bileam banggadudukene konaambakonan tukon Balak nabito-bito.

³⁶Salataa Balak lengele baikon Bileam naikon molubat, yana ampakon motalimayo Bileam doi kota Moab, motangabos doi Arnon Paisunobatango bibilo, doi napokalaltanan kodaerah Moab.

³⁷Balak nabantilano doi yana, “Bulaando ikoo moaki mulubat doi tempo kuuangano tumbe ikoo? Oilakai ikoo anggene yaku aki kumoola beale komu tambo?”

³⁸Bileam timbiliyo, “Jadi, budodoiya yaku lubato. Bai aki kumoola momabantil oi-oila alaasene ko Mian Bisa nasinumboliikon yaku mobantile.”

³⁹Maka ampakono Bileam tukon Balak doi kota Huzot.

⁴⁰Idoo Balak mososubakon moimoiya kosapi tukon domba. Kosoobos luwedoi sailloo bineekono doi Bileam tukon katua-katua mopolaing-laing tukon yana.

⁴¹Modowakon kooloyono Balak babayo Bileam motolibo doi bunggo Bamot Baal. Luwe idoo Bileam moola nakitayo ko soobos ko bangsa Israel.