Read Banggai BANGAITAN 23 Bible Online

BANGAITAN 23 - Banggai bible

BANGAITAN 23

¹Bileam nabantilano doi Balak, “Kekendengemokai doi tampat nia pitu kobalabaan mo tuuk doiyaku, tukon sadiayomo naimbaa pitu kosapi langgilo tukon pitu kodomba langgilo.”

²Balak loingiyo pokakana Bileam nabinantil doi yana. Doi bungkut sasamba dobalabaanoo bunggono yanila sosubakene komeeng kosapi langgilo tukon meeng kodomba langgilo.

³Maka Bileam bantile doi Balak, “Kokondongokai ikoo daku Tuan loolaniyo domu sosubakon mo sinua. Daano buno doiya yaku ampakon mokitayo oilakai ko TEMENENO yase mopososuung tukon yaku kai aki. Totiili kubontiikonggon sasaibino kolangge TEMENENO mo bantile doi yaku.” Maka Bileam ampakon susuungo doi meeng kobunggul bunggono,

⁴tukon idoo ko Mian Bisa lubat doi yana. Bileam nabantilano doi Mian Bisa, “Yaku lapamo mokokondong pitu kobalabaan tukon mososubakon meeng kosapi langgilo tukon meeng kodomba langgilo doi suwe-suwele dobalabaanoo bunggono.”

⁵Maka ko TEMENENO pailukene doi Bileam oila komo sio nabantile, tukon sumboliiyo naabali doi Balak sulano napelenggene ko TEMENENO nateteba doi yana.

⁶Bileam abalimo tukon laate Balak daanoon mokokondong doi naloolanian konasosubakon mosinua, posinggat-singgat tukon sasaibino ko Moab katuano.

⁷Maka Bileam bantilemo nanubuat nia, “Luwedoi Aram, bunggul taalikon doi oloyo nasumbotan indaa, Balak, tomundo Moab mo uange yaku, konabantilano, ‘Lubatokai, basilingano tuuk doiyaku. Kutukemo dobangsa Israeldoo!’

⁸Moolakai yaku mokutuke, kalu ko Mian Bisa aki nakutuke? Moolakai yaku mohukume, kalu ko TEMENENO aki nahukume?

⁹Luwedoi bunggul-bunggul bungkukono kukitayo yanila; luwedoi bungko-bungko kumbalenge yanila. Kitayo, meeng kobangsa mo tosusuunganggon aki natongusokon golongan banga bailon.

¹⁰Yakub nakaturunan buno ambata mo aki natangait; bangsa Israel konakadaang bolikon langge. Boliisi kumate bunopokakana mian mojujur boliisi daku ajal napokakana domian-mianoo naajal.”

¹¹Maka Balak bantile doi Bileam, “Oilamokai komu linakukon motuuk doiyaku? Ikoo yaku babayo doisumai sulano mukutuke dakumusuh-musuh. Bai ikoo tolongo balakaatiyo yanila.”

¹²Bileam timbiliyo, “Yaku tongo moola mabantil oila ko TEMENENO nasinumbolii mo bantile.”

¹³Maka Balak bantile doi Bileam, “Mai nda ampakon polaing-laing doi tampat bailon; luwe idoo ikoo kitayo kosoobos luwedoi bangsa Israel. Kutukemo yanila luwe idoo.”

¹⁴Maka Balak babayomo Bileam doi padang Zofim, doi Bunggul Pisga bungkono. Idoo koidan yana mokkondong pitu kobalabaan tukon mososubakon meeng kosapi langgilo tukon meeng kodomba langgilo doi suwe-suwele kobalabaan bunggono.

¹⁵Bileam nabantilano doi Balak, “Dungolo naimbaa, doi naloolanian daku Tuan nasosubakon mo sinua, daanoon yaku mo ampakon pososuung ko TEMENENO idoo.”

¹⁶TEMENENO kupayo Bileam tukon pailukene doi yana oila komo sio nabantile, maka sumboliiyomo yana abali doi Balak sulano napelenggene do TEMENENO doo nateteba.

¹⁷Maka Bileam abalimo tukon pososuungo Balak modaano mokokondong doi loolanian kona sosubakon mosinua, posinggat-singgat tukon sasaibino ko Moab nakatua-katua. Balak masadaikene oila komo lapamo TEMENENO bantile,

¹⁸maka Bileam bantilemo nanubuat nia, “Eh, Balak, Zipol napau, mai lubat, sulano mulengelemo oila daku binantil.

¹⁹Mian Bisa aki napokakana kobangkapi mo gampang namanasal tukon yase kala-kala. Kalu ko Mian Bisa paladandi, tantu yana tapaatiyo! Kalu yana basilingan, tantu naikon teali!

²⁰Yaku sinumbolii mobalakaatiyo; tukon kalu ko Mian Bisa balakaatiyo, aki namoola kuakiyenggene koidan.

²¹Doi Yakub aki natokita kokulokisan; doi Israel aki natotingonii kosakisaawan. TEMENENO napo Mian Bisa, loolainge yanila. Yanila kokuweis: Yanamo ko Tomundo!

²²Mian Bisa mo babayo yanila tobuat luwedoi Mesir; pokakana kobanteng mo mbosolo yana polobosi doi yanila.

²³Akiyo kodoti mo kanayo tuuk doi Yakub akiyo kopatanggal mo daano konadaya motuuk doi Israel. Tentang do bangsadoo komian naikon bantile, ‘Kitayomo kolangge minasaindinggon Mian Bisa mo kubaiyo!’

²⁴Bangsadoo bangun pokakana kosinga molu kono, tukon kokondong kokoloyos buno singa langgilo. Yana akiyoon namoolo kalu akiyoon namolomos tukon namonginum namusuh sauno yana mo lakoyo.”

²⁵Maka Balak bantile doi Bileam, “Banggalo, kalu ikoo aki muiyase mokutuke ko bangsa Israel; bai inaikai mo balakaatiyo yanila!”

²⁶Bileam timbiliyo, “Bolikonkai lapamo yaku bantile doi ku Tuan baikon yaku naikon lakukene sasaibino ko TEMENENO napinalentahkon?”

²⁷Balak bantile, “Mai nda ampakon doi tampat bailon. Uga-ugaate ko Mian Bisa batadikenemo ikoo mokutuke ko Israel tuuk yaku doi tampatoo.”

²⁸Maka yana babayomo Bileam doi Bunggul Peor bungkono mo sasalaane ko padang lalomo.

²⁹Bileam nabantilano doi Balak, “Mongokondongo pitu kobalabaan doi tampat nia tukon sadiayomo naimbaa pitu kosapi langgilo tukon pitu kodomba langgilo.”

³⁰Balak lakukene pokakana Bileam nabinatil. Yana mososubakon meeng kosapi langgilo tukon meeng kodomba langgilo doi sasamba do balabaanoo bunggono.