Read Banggai BANGAITAN 24 Bible Online

BANGAITAN 24 - Banggai bible

BANGAITAN 24

¹Budodoiya Bileam toiyomo baikon ko Mian Bisa pakatuuwo yana nabalakaatiyo ko bangsa Israel. Tobikon doiya akimo naampakon moumbolii paloosan-paloosan pokakana kona kinubai doi loolukonoo. Bileam mbaleng doi padang lalomo,

²tukon kitayo ko bangsa Israel modaano basandung doi meeng kotambuno meeng kobangsa benseno. Maka ko Mian Bisa na Roh kuasaiyomo Bileam,

³tukon yana bantilemo nanubuat nia, “Naiyamo Bileam nateteba, Beor napau, meeng komian pokita nabantilan

⁴mo lapamo lengele ko Mian Bisa nabantilan-bantilan tukon mokitamo nabatokitaan luwedoi Mobabasal Konakuasa, tukon tolubang bai kotamano bilat.

⁵Bulaando konamonondokan komu sandung-sandung eh Yakub, tukon mutampat-tampat dungolan eh Israel!

⁶Pokakana kopepelako mo moloas topopong, kai asi doi paisubatango bibilo; pokakana kogaharu batango TEMENENO mo sakakene, kai aras batango doi paisubatango bibilo.

⁷Yanila malaat paisu udan molobi-lobian, kolibuang mo sinakakon malaat paisu badaang. Konatomundo naikon sanaang, lobiyoniiyo Agag, tukon konabatomundoan naikon inakabasal.

⁸Ko Mian Bisa mo babayo yanila tobuat luwedoi Mesir, pokakana kobanteng mbosolo Yana polobosi tuuk yanila. Bangsa-bangsa namusuh naikon kabus Nalemese, buku-bukunoila Yana lotoiyomo, tukon konapo panah-panah Nalinotoimo.

⁹ Dobangsadoo buno singa langgilo tukon molukono, mo ngganggalaup tukon bangokoolo. Indee komo barani bangune yana? Boliisi komian mo balakaatiyo ikoo nabinalakaati, tukon komian mokutuke ikoo nakinutuk.”

¹⁰Tukon Balak nanggimalan yana tide-tidekene konapopukul tukon bantile doi Bileam, “Ikoo yaku uange sulano mukutuke daku musuh-musuh, bai ikoo tongo balakaatiyo yanila polong tolu luunggon.

¹¹Budodoiya moolamo mutaus, mule doi mubonua! Yaku dandikene kotambo doikoo, bai ko TEMENENO aki napataikene ikoo motalimayo dotambodoo.”

¹²Bileam timbiliyo, “Bolikonkai yaku lapamo bantile doi ku Tuan nabito-bito baikon,

¹³maukai daku Tuan beena yaku sasaibino kosuasa tukon mosoni mo daano doi ku Tuan nakamali, yaku aki namoola lupaiyo ko TEMENENO naparentah tukon lakukanggene komeeng kolangge tukon tongo kumongiasan? Yaku tongo moola bantile oila ko TEMENENO nasinumboliikon yaku mobantile.”

¹⁴Bileam nabantilano doi Balak, “Budodoiya yaku yase mule doi kubangsa. Bai akiyoon kuampakon, mondoko yaku pailukene doi ku Tuan tentang oila naikon ko bangsa Israel nalinakukon mo tuuk doi Tuan nabangsa oloyo doi bundu.”

¹⁵Maka yana bantilemo nanubuat nia, “Naiyamo Bileam nateteba, Beor napau; meeng kopokita nabantilan-bantilan

¹⁶mo lapamo lengele ko Mian Bisa nabantilan-bantilan, tukon moola tingoniiyo ko Moinakatandak Tuuno; mo mokitamo konabatokitaan kobutongo luwedoi Mobabasal Konakuasa tukon tolubang bai komatano bilat.

¹⁷Kukitayo yana, bai bolikon budodoiya; kumbalenge yana, bai luwedoi naodoonan. Meeng kotomundo luwedoi Israel konalenggetan, naikon lubat pokakana kobituwon pauno motontilang. Sasaibino ko Moab nakatua-katua naikon linopumo Set nabangsa naikon inakamanaso.

¹⁸Tano Edom naikon namusuh dudukiyomo, bai ko Israel mokubai kokubai mo babasal.

¹⁹Luwedoi Yakub naikon sumbut komeeng koponguasa, mo akateyo konamusuh-musuh.”

²⁰Doibundu doi nabatokitaanoo lalomo Bileam kitayo ko Amalek miano. Maka yana bantilemo nanubuat nia: “Luwedoi sasaibino kobangsa doi dunia, Amalek komo balakuasa tuuno. Bai dobangsadoo doi bundu, naikon lapus koidan tuuk posidutukon.”

²¹Doi batokitaanoo lalomo Bileam kitayo Kain naketurunan, maka bantile nanubuat nia: “Komu dungolan takainomo moonggol, buno telea doi bunggo batu bungkukono.

²²Bai komuyu Keni miano, naikon inakate, akimo namalumbit naikon Asyur akute komuyu bunopokakana komian motinaan.”

²³Doibundu Bileam bantilemo nanubuat nia koidan, “Silaka! Indee komo tubo, kalu naikon ko Mian Bisa lakukenemo dolanggedoo?

²⁴Bai luwedoi Siprus naikon lubat komeeng kokapal polobosian, yanila naikon lungguiyo ko Asyur tukon Heber, doibundu kapaldoo polobosianookai naikon silaka.”

²⁵Maka Bileam batotobomo momule doi lipu dungolan, tukon Balak ampakono koidan.