Read Banggai BANGAITAN 25 Bible Online

BANGAITAN 25 - Banggai bible

BANGAITAN 25

¹Daanoon ko bangsa Israel modungol doi Sitim Pepelako, konapo mala-malane tambuuno pololowai tukon boine-boine Moab mo daano idoo.

²Doboiboinedoo tobiyo yanila doi lamean-lamean sosubaan tuuk odotiiyo yanila natemeneno. Ko Israel miano koidan talalaing momakaan dososubakonoo tukon sosubaiyo ko Moab miano natemeneno.

³Sabab ko Israel miano sosubaiyomo ko Baal doi Peor, TEMENENO nggimoliiyo doi yanila tukon bantile doi Musa,

⁴“Lakoyomo sasaibino komian mo katuaiyo dobangsadoo tukon akateyomo yanila doi umum salaano bunopokakana kopolimang Daku parentah, sulano Yaku aki mo kunggimoliiyo doi bangsadoo.”

⁵Doi bundu Musa bantile doi Israel nahakim-hakim, “Komuyu suwe-suwele sio poakateyo sasaibino komian doi mubense-benseno lalomo mo lapamo sosubaiyo ko Baal doi Peor.”

⁶Salataa Musa tukon sasaibino komian daanoon mokokiil doi TEMENENO Sandung tataapono, yanila kitayo komeeng ko Israel miano babayo komeeng koboine Midian usok doi nasandung lalomo.

⁷Doi tempo Pinehas, Eleazar napau, Imam Harun natumbu kitayo dolanggedoo, yana kokondong tukon otinggalemo dopototongianoo. Yana mangalamo meeng kokalait

⁸maka nalelenggene malanedoo tukon boinedoo doi sandung lalomo. Looluakon domianoo yana sokulikene dokalaitoo sambuno buno doiya tademo dobalaadoo modaanoon mo malajalela doi Israeldoo.

⁹Bai mau nabunomo doiya komo matemo 24.000 komian.

¹⁰Maka TEMENENO bantile doi Musa,

¹¹“Pinehas Eleazar napau, Imam Harun natumbu, tukon giat mobelayo Daku taanggaan doi Israel miano tanga-tangano, sampe Daku nggimalan tade tukon yaku aki kusida mosilakaiyo dobangsadoo.

¹²Jadi bantilemo doi Pinehas baikon Yaku mokubai meeng koperjanjian tukon yana.

¹³Yana tukon nakaturunan Kutataapene salaku Imam tuuk sidutu-posidutukon, sabab yana giat tuuno mobelaa-Ku, na Mian Bisa, tukon lapamo mokubai podamean doi Israel miano nalalim.”

¹⁴Do Israel mianodoo mo lapamo inakate pososinggat boinedoo Midian miano kosambuno Zimri, Salu napau, meeng kolangkai doi bonua tumbuno mo luwedoi Simeon nabenseno.

¹⁵Boinedoo kosambuno Kozbi; yana Zur napau, meeng kokaum kapalano doi Midian.

¹⁶TEMENENO beekene naparentah nia doi Musa,

¹⁷“Tumbokiiyomo ko Midian miano, tukon akateyomo yanila

¹⁸sabab kokulokisan mo lapamo yanila batetelikene tuuk komuyu doi Peor, tukon sabab Kozbi meeng kokaum kapalano doi Midian napau. Kozbidoo boine mo mate inakate doi tempo natealian kobalaa sabab kadadian doi Peor.”